中環節果決明樹

紅棉路節果決明樹開花 5月驚艷中環



5月來臨,中區紅棉路嘅節果決明樹開花啦!過咗春天賞花季節,夏天一樣可以賞花。一株已經罕見嘅古樹生長喺中環商業區內,比起酒店舊有連接停車場嘅斜路,一串又一串長達一米嘅花枝更加值得兩個人去影吓相。

延伸閱讀﹕【2021賞花地圖】中環紅棉路美利酒店打卡 4月百年古樹綻放粉嫩奪目節果決明

座落於中環紅棉路嘅香港美利酒店The Murray,位置靠近香港公園,酒店門口停車場有一株歷盡滄桑嘅節果決明樹,花開時白色同粉紅色交織,顏色鮮艷極搶眼。

翻查資料,呢棵歷經百年嘅古樹喺2004年曾被獲封為香港「古樹名木」,節果決明全棵花開時極璀璨,節果決明縱橫伸展,密密麻麻嘅粉紅色同白色花朵,仰望時感覺似足繁星,拍拖去睇更壯觀。

節果決明高約16米,大概兩層樓高,樹冠可覆蓋12米,大家可於酒店大堂內或停車場平台外觀賞。節果決明由無數白色同粉紅色小花構成,花序可長約一至兩米。微風吹拂,紅蕾、白瓣、黃蕊自然飄落,意境夢幻,似足走入童話世界。

細心睇睇,位處香港美利酒店The Murray嘅節果決明嘅樹幹其實有啲傾斜,以兩條鋼筋支撐,大概有保護作用,可加固承托。事實上,呢棵節果決明歷經百年,飽歷風霜,絕對係香港珍貴又稀有嘅古樹。

節果決明英文名為Pink & White Shower,學名係Cassia javanica var. indochinensis,為蘇木科、決明屬,除咗中環美利酒店The Murray,仲可以喺迪欣湖觀賞。

唔少少女只識喺美利酒店舊有連接停車場嘅斜路打卡,的確美利大廈本來嘅白色牆身同拱廊設計窗戶係幾有特色,不過位置欠缺文青味,比較適合一眾Sell自己嘅KOL拍攝。5月大家可以賞花為目的,觀賞一下呢棵百年歷史嘅節果決明樹啦!

e.a.tips
(1)打卡還打卡,記得保持安靜。
(2)節果決明為珍稀古樹,唔好胡亂採摘同破壞。

交通﹕
(1)地鐵中環站J出口,會經過遮打花園,沿行人天橋行,由花園道行上斜路,腳程約10分鐘;
(2)由天星碼頭搭15C,喺山頂纜車總站落車,過對面就係The Murray;
(3)地鐵香港站搭電車去,沿銅鑼灣方向,皇后像廣場落車,經HSBC,路口上斜,見到政府大樓,用扶手電梯上行人天橋,過馬路就見到;
(4)揸車去可以喺花園道路口入。

延伸閱讀﹕激罕哥德復興式建築 中環聖約翰教堂打卡

香港美利酒店 The Murray

地址: 中環紅棉路22號
電話: 3141 8888

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈紅棉路節果決明樹開花 5月驚艷中環〉中有 1 則留言

留言功能已關閉。