2020-12-06

荃灣低調正宗越南菜 一秒飛到越南

越翠苑


    荃灣出名嘅黃色小店好多,事實上都有好多低調嘅良心店,呢間隱藏喺悅來坊後面嘅越南餐廳,炮製正宗越南菜,比起連鎖餐廳有種耳目一新感覺,拍拖搵食當然要識揀啦!

    武漢肺炎影響下,餐廳抗疫措施都好充足,先為入座客人量度體溫,每張枱再提供消毒用品,而每位店員都有佩戴口罩,每張枱都有分隔一定距離,唔會俾人搭枱,用餐時間限時30mins,避免等候時間過長。不過,餐具就放枱邊等客人自己攞,其實疫症衍生衛生問題,最好都係好似大渣哥茶記咁由店員遞上會更好。

    室內裝潢陳設簡單,以黃色為主,據悉菜式由越南人主理,難怪可以炮製相當正宗嘅越南菜,菜式的確好驚喜。

    蟹膏檬粉 $54 絕對係必食菜式之一,一碗極足料,配料包含有札肉、豬紅、豆卜、生菜、香葉,當然仲有一大餅蟹膏。湯底入口酸酸甜甜,好重蕃茄味,碗內有幾乎原個蕃茄,所以味道更濃郁,感覺真材實料。各款配料都好索湯,其中豆卜最吸收湯底精華,食到有少少爆香咗嘅乾蔥,味道幾香。蟹糕有鮮味,無腥味,伴有肉碎同蛋香味,好濃郁。美中不足係檬粉比較碎,唔可能成條夾起。

    吹波雞髀飯 $ 65 係好驚喜嘅菜式,睇英文先知原來係雙髀飯!兩隻炸髀放置喺黃薑飯旁邊,幾霸氣,兩個人食都夠。雞髀係已經好少見嘅生炸雞髀,雖然唔算好大隻,但係表皮香脆,唔會太鹹,入面好juicy,肉質唔會好乾,仍然保持嫩滑。而用黃薑炒成嘅炒飯,幾乾身,清清哋,配搭油膩嘅炸雞髀就好適合。

    飲品揀咗鹹檸檬七喜+$15同青檸梳打+$15,好耐無見過有得飲鹹檸七嘅餐廳,有種懷舊味道,兩者都好清爽,適合配搭偏油膩嘅越南菜。

    延伸閱讀﹕新鮮水果炮製茶飲 荃灣茶飲店粉粉嫩嫩極吸睛

    越翠苑

    地址﹕ 荃灣德士古道36-60號東亞花園地下A101B號舖
    營業時間﹕ 11:00 – 21:00
    電話﹕ 2772 1299
    地址﹕ 荃灣德士古道36-60號東亞花園地下A101B號舖
    營業時間﹕ 11:00 – 21:00
    電話﹕ 2772 1299

    Please Like & Follow & Subscribe /
    歡迎讚好、追蹤、訂閱

           

    One thought on “荃灣低調正宗越南菜 一秒飛到越南

    Comments are closed.