2020-10-28
雪山咖啡館

蛋包飯無蛋 果Jam製特飲 大窩口咖啡店仍門庭若市?



大窩口基本上可以話係美食沙漠,兩個人要喺附近搵食唔容易,良心小店更罕見,通常要行到荃灣或葵涌搵食。近一年有一間咖啡店座落大窩口國瑞路,門口光潔雪白,予人一種悠閒舒適感,到底選址呢區做食肆,質素可否留住附近居民呢?

咖啡店室內同樣以白色為主調,裝飾亦貫徹一般文青咖啡店,不過望到廚房內部昏暗非常,有種殘舊嘅感覺。位置只係縉庭山隔離,加上座落鹹田村,同時有村屋居民同私樓住客幫襯,可謂附近居民嘅飯堂,獨市經營的確有優勢。食物味道基本不過不失,有待改進,只係出餐速度緩慢,根本做唔切,大部份客人都係坐著乾等,門口等待外賣嘅客人表示,逾30mins都未有出餐。

試試日式咖喱手打漢堡扒蛋包飯 $58,心裏本來諗蛋包飯應該幾穩陣,點知蛋包飯竟然無蛋?大家無睇錯!店員落單後15至30mins前嚟道歉表示無蛋,食材售罄嘅情況本來都好平常,一般會更換其他食物或取消order,但店員指已經截單,唔可以換其他食物,只能將蛋改為罐頭午餐肉。其實可以取消order,做法等同政府逼大家揀接受定離開,只能二揀一,但小編等待太耐真心肚餓,附近亦無其他餐廳揀,唯有硬食。

味道呢?手打漢堡扒肉質可接受,略厚實,尚算軟腍,不過咖哩汁絕對唔似咖哩汁,入口超鹹,咖哩味欠奉,基本難以繼續食落去,感覺似人流多唔夠分,咖哩磚落得唔夠,似溝水再溝調味料。而白飯亦偏乾,加上冷氣太低,冷氣直接吹向食物,不消半分鐘,白飯通通變涼。

睇睇另一道最穩陣嘅All Day Breakfast 雪山英式全日早餐 $60,最大優點係對比其他咖啡店算平價,本來包含炒滑蛋、香脆煙肉、挪威煙三文魚、黃金炸薯餅、茄汁焗豆、小牛角酥、沙律菜,份量本身唔算多。All Day Breakfast同樣因雞蛋缺貨而未能供應炒滑蛋,另茄汁焗豆亦缺貨,店員稱會以蕃茄取代茄汁焗豆,並以腸仔取代炒滑蛋。事有湊巧,鄰座夫婦拍拖去亦叫咗All Day Breakfast,等候時間更長,女士直言無蛋就唔係All Day Breakfast,然後直接取消order。

欠缺食材下嘅All Day Breakfast,的確失色不少,但人流眾多導致食材極速用畢,呢個理由係可以接受。不過,味道方面的確難以接受,茄汁豆換大蕃茄一片都算合理,只係無諗過會以廚師腸取代炒滑蛋,本來以為係德國腸等相近級數腸仔,廚師腸既乾又巢皮,黃店拯救隊曾經表示All Day Breakfast用廚師腸絕對要加入拯救行列,估唔到小編亦有幸一試。

其他材料都可以接受,牛角包幾鬆軟,只係欠缺酥脆感,薯餅亦香脆,但油份未印乾,入口好重油味。而沙律菜就新鮮爽脆,淋上少量油醋幾開胃。

抺茶鮮奶 +$8 係比較穩陣嘅嘢飲,因為只係加入抺茶粉同鮮奶,有抺茶味,但未夠香濃,鮮奶比較重水嫩感,反而奶味較輕,雪山主題意思大概係飲品頂頭擠滿忌廉,營造雪山感覺。而本店最中伏嘅飲品絕對係粒粒草莓鮮奶特飲 +$8,小編從來無諗過一杯飲品會用果醬嚟炮製,粒粒士多啤梨意思即係果Jam入面嘅軟爛士多啤梨,唔通特飲意思就係特別嘅飲品?今次呢杯特飲的確令人眼界大開,胃口盡收。

e.a.tips
(1)周末假期人流眾多,大概都係附近居民,靠近郊野,有好多小昆蟲,比蚊更可怕,如果多人就要喺門口等候,一定要帶備蚊怕水等噴霧。
(2)假期中午營業時間只到15:00,而14:30就已經截單,想試一定要盡早去。

小編講吓嘢﹕

事實上,一間食店,尤其係小型無管理系統之食店,臨時欠缺食材導致客人需要更換其他食材,的確係經常發生,但發生後點處理就係留住客人嘅因素之一。可以好似大部份店舖咁以更優質食材填補自己嘅缺失,又或者奉送其他美食,甚至提供折扣,雖然用金錢解決問題係一個方法,但相信香港人更在乎食店本身食物質素、解決問題時是否尊重顧客。
今次該店做咗一個最錯誤嘅示範,以比原材料更差劣兼唔配合主體嘅食材俾客人,拒絕更換食品之餘,亦藉詞推說已截單無得更改,情況令人覺得係交行貨,抱得過且過嘅心態對待客人。當然,一間食店喺面對問題時,廚師嘅轉數同廚藝功力都好重要,該店似乎力有不逮,只係附近全無其他食肆,以獨市經營姿態獲勝。附近既有村屋居民,亦有私樓住客,完全不愁生意多寡、客人多少,不思進取亦能理解。我哋支持黃店,但黃店都要好食先得㗎!

交通﹕巴士32M/235都可到達附近,由港鐵大窩口站步行,腳程就要約10mins。

雪山咖啡館

地址﹕ 荃灣國瑞路鹹田村28號地舖
營業時間﹕ 星期一全日休息星期二至日07:30 – 21:00
電話﹕ 9440 4348
地址﹕ 荃灣國瑞路鹹田村28號地舖
營業時間﹕ 星期一全日休息星期二至日07:30 – 21:00
電話﹕ 9440 4348

Please Like & Follow & Subscribe /
歡迎讚好、追蹤、訂閱

     

One thought on “蛋包飯無蛋 果Jam製特飲 大窩口咖啡店仍門庭若市?

Comments are closed.