兩個人影吓相,  兩個人醫吓肚,  和你Taste,  小食甜品,  野餐隨行

【野餐隨行】維多利亞女皇銅像下草地野餐!人氣爆餡熱狗款式眾多 一度被封「世一」麵包

瀏覽次數: 35
個人瀏覽過





如果大家有出街食飯,就算只係拍拖兩個人買外賣,亦不難發現目前有唔少有Heart嘅店舖唔再只係側重於打卡位或表面宣傳,反而將Budget放於食材之上,較為在乎食物品質。本土有一間人氣熱狗店,4間分店遍及港島、新界,食材配搭同選料方面都有驚喜,款式眾多,麵包更一度被連登仔封為「世一」熱狗,今次編輯就一嘗呢款被稱為「世一」嘅熱狗,並帶到維多利亞女皇銅像之下嘅草地野餐。

唔少人對人氣店Bulldog Hotdog都係採慕名而來嘅心態,編輯只係好奇小店憑乜Set到個價咁高,由2019年開業至今,雖然有分店結業,現仍有4間分店,平常行過其他分店可見店面較細,而2020年開業嘅銅鑼灣店則有較多空間,有立食位置,亦可外賣用餐,相對寬敞。

據了解,該熱狗店採用7款芝士,當中有White Cheddar、Orange Cheddar、Edam、Parmesan、Mozzarella、Provolone、Blue Cheese,口味不一,芝士同各款食材配搭上亦巧花心思。不過,呢間熱狗店喺價錢上就比坊間其他熱狗店明顯貴,如果齊柏林熱狗店係經濟型,咁Bull Dog Hot dog就係中產型。

維多利亞公園地方偌大,係全港面積第二大嘅公園,僅次於長年累月唔開放公眾入場嘅葵涌公園。維園每年都係公眾集會嘅地方,不過現時用途逐漸出現變化,睇嚟只有逢星期日嘅外傭聚會係唯一可以喺維園出現嘅聚會,跟隨「姐姐」於大草地內野餐係幾乎僅餘可以實行嘅維園活動。

維園靠近香港中央圖書館,前身係銅鑼灣避風塘,其實都係二戰後填海工程得嚟嘅大型公園,1957年正式開放,所謂維多利亞公園,顧名思議係紀念維多利亞女皇嘅公園。一直以來,公園正門都有一個維多利亞女皇銅像,1896年鑄造之時係紀念女皇登基60週年,來自意大利雕塑家Mario Draghi筆下,銅像最初放置中環皇后像廣場,後來日治時期曾經搬運到日本橫濱倉庫,有指銅像本來幾乎被熔化作軍事兵器,不過二戰後終歸還當時嘅香港政府,令女皇銅像未有被熔化,最後先至放置於銅鑼灣維多利亞公園。

招牌熱狗$55、皇牌熱狗$68,包含Mozzarella、Provolone、White Cheddar、Orange Cheddar,原來單單一款熱狗已經包括有4款芝士,濕軟而水份較多嘅Mozzarella質感柔軟,入口逐漸溶化,帶有奶油香,夾雜質地較硬而較清淡嘅Provolone,可以拉絲,再加上質感厚實而硬身嘅Cheddar Cheese,口感細膩,而橙色同白色嘅車打芝士分別在於橙色多咗脂溶性色素,多款芝士融為一體,令整體更添層次,配搭得天衣無縫。

皇牌熱狗內亦有焦糖洋蔥、安格斯牛肉、炸蒜,牛肉片份量適中,無油膩感,只係質感略有粗嚡,就靠洋蔥香搭夠,一隻熱狗好大隻,法蘭克福腸亦好大條,大概有8吋長,比麵包更長,一份熱狗足以飽肚。法蘭克福腸向來被稱為熱狗腸,以本地豬肉、雞肉製作,表皮香脆,肉汁被鎖緊,腸衣經過煙燻,入口微鹹。至於「世一」麵包烘烤過後只係表面略有微脆,但唔會𠝹口,內裏仍然鬆軟,保持濕潤,夠彈手,似空氣麵包,有指麵包同香腸一樣,都係由香港製造嘅手工麵包,其他食材通通都係採購自本地同外國。

套餐小食有薯條、薯角、芝士薯波、洋蔥圈,而美國水牛雞翼則顛覆以往所認識嘅Buffalo印象,皆因水牛城雞翼本身係生炸,然後再淋上辣椒為原料嘅特製醬汁,店內嘅水牛雞翼係無醬汁,帶有辣椒嘅香辣味醬汁反而同雞翼二合為一,似乎係預先以醬汁醃製,然後先至生炸,雞翼相對變得較乾身。

熱狗款式眾多,餡料分別有櫻花蝦、松露蛋、特濃芝士、黑啤肉醬,亦有野菌、手撕豬、手撕雞、韓式泡菜,而日式鰻魚熱狗$58 則將鰻魚放入熱狗內,有如Fusion菜。麵包中除咗夾有法蘭克福腸,亦加上一條鰻魚,頂端加添木魚碎、醬汁,有如鰻魚丼飯。魚肉較幼身,但長度與法蘭克福腸相近,軟嫩魚肉同脆皮腸衣質感構成強烈對比。

現時,維多利亞女皇銅像連同基座有逾2米高,但就被困於一個莊嚴肅穆嘅小花園內,貌似四面被圍困嘅模樣。銅像雖然有幾分係狀似男人,但細心啲睇的確係女皇,單睇銅像都Feel到幾分霸氣。女皇穿上祭袍,端坐於附有皇冠嘅皇位上,英國皇室貴氣盡現,即使係至高無上,仍然令人感覺臉容和善,溫文爾雅,女皇頭頂披上頭紗,亦戴上皇冠,左手拎住一支權仗,象徵住權力與地位,右手戴有串珠飾物,同時捧住一個小盒,一舉一動都略帶女性先天魅力。

殖民地色彩本來令香港變得繁華而多元化,但近年愈趨減弱,連皇后碼頭都可以拆毀,經過幾十年日曬雨淋、風吹雨打嘅女皇銅像,會唔會都係凶多吉少呢?


E.A.Tips﹕

❶ 熱狗加$20可配套餐,包括一款小食及一款汽水。

❷ 加$8可以轉紐倫堡腸、Salami匈牙利辣腸、皇牌牛腸。

❸ 加$24可以配2隻雞翼,可揀香草芝士雞翼或美國水牛雞翼。

❹ 熱狗即叫即整,所以等候時間會較長,大概需時15分鐘。

❺ 二人自選套餐比較抵食,指定兩款熱狗最平$100埋單,套餐包括2隻熱狗、薯角或薯條,重有2罐汽水。

❻ Bulldog Hotdog 4間分店地址為大埔廣福道60-62號地下C舖、銅鑼灣駱克道513-515號永勝大廈地下A號舖、灣仔軒尼詩道150號修頓中心地下D3號舖、大埔安祥路2號大埔體育會李福林體育館地庫。








Bulldog Hotdog

  • 銅鑼灣駱克道513-515號永勝大廈地下A號舖
  • 星期一至五11:30 – 23:30;星期六11:30 – 00:30;星期日11:30 – 23:30
  • 2882 2322

維多利亞公園

  • 銅鑼灣興發街1號
  • 24hours
  • 2890 5824

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


樓上咖啡店自選高水準五品料理!旺角西洋菜南街神秘角落點只賣咖啡綠茶
【野餐隨行】大埔商場便攜素食便當/一口雲吞蝦籽麵 元洲仔全海景公園Chill住歎咖啡
上水Homy Cafe 9月尾結業 咖哩雞扒香口惹味 上水千萬公廁旁小公園野餐
【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?
太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿
大角嘴海南雞專門店外賣孖寶套餐人均$79 除咗雞飯重有乜?
【邊境一日遊】尖鼻咀濕地5分鐘登龜山眺后海灣 沙橋村蠔殼田絕美夕陽餘暉
大隱隱於市!尖沙嘴鬧市藏維多利亞時代百年歷史建築物 遊走法定古蹟探視紅磚遊廊金字瓦頂
【野餐隨行】長洲歎人氣沙嗲牛米通 堤邊樹蔭全海景野餐 甜品有炸芒果糯米糍!
採環保餐盒+餐具!土瓜灣舊區鐵路便當地道台式口味 3款配菜期期轉換主食足料
【野餐隨行】元朗11款人氣名物瀑布蛋治有咩特別?大棠燒烤場變草地野餐場