維多利亞城係編輯細細個就聽過嘅嘢，對生於英屬香港嘅讀者一定唔陌生，港英政府喺多個香港島城市界線都設有界碑，又叫維城邊界。每一座界石刻有一個字樣作標記，一式一樣如同倒模，屹今被發現嘅維多利亞城界碑有10座，1座已被消失，1座曾被親移，當中有3座位處山坡之上嘅界石更加係近一至兩個月先被發現，今次編輯就一次過帶大家從最安全嘅路線找尋港島10座界石啦！
英國殖民時期每一座維多利亞城界碑都為四方形石柱，而頂端則呈錐形，前端刻有「CITY BOUNDARY 1903」字樣，採用花崗岩建造，而每座都高約1米。而維多利亞城界牌嘅英文可以直譯為City Boundary Stone，又或者叫City Boundary Marker，都係由英國人於1841年登陸並取得香港島之後建立，更逐漸將海旁建立城區，界碑就用作標記香港島維多利亞城具體範圍，據了解每座界石相距約有500米。
此外，當時港英政府在位人物為維多利亞女皇（Queen Victoria），所以城區先會被稱作「維多利亞城」（City of Victoria），維多利亞女王在位期間為大英帝國黃金時代。香港歷史屹今有逾180年，據悉維多利亞城界線分為東、南、西、北面，東面大概由銅鑼灣至黃泥涌，南面為龍虎山，西面約為現時堅尼地城，北面則固然為海港。
不過，由於維多利亞城界碑曾經歷二戰時期同市區擴展，所以部份界石都可能已消失，可能係被拆毀，亦可能被遷移，當中被發現後再被拆走嘅例子就有馬己仙峽道界石。若然要講界石其實有幾多座，就真係不得而知，因為由始至終都無人能夠搵到確實數字，目前只知道已經被發現嘅維多利亞城界碑總共有10座。
至於點解每一座界石柱身中央都刻有「CITY BOUNDARY 1903」呢？如果對殖民歷史稍有認知，應該會知道維多利亞城界碑又叫做四環九約界碑，同華人「四環九約」有關。據當時嘅香港政府憲報顯示，界石上嘅「CITY BOUNDARY」象徵維多利亞城嘅界線範圍，同時亦刻有「1903」，代表係1903年底建立，事實上港英政府係為咗將維城劃界，劃定城市界線，等公眾都清楚維多利亞城嘅範圍，所以豎立界石、設立界碑。雖然界石係殖民地著名歷史痕跡，但就一直未有被列為法定古蹟。
而華人所講嘅「四環九約」，據了解「環」同「灣」讀音近似，而「約」就只係以前清朝嘅管理單位，如果以近代嚟講，維多利亞城分劃出嚟嘅「四環」可以指「下環」、「上環」、「中環」、「西環」，當中「下環」即灣仔、銅鑼灣；而「九約」就係代表港島九個界線，分別係堅尼地城、石塘咀、西營盤、干諾道西、上環街市、中環街市、軍器廠街、灣仔道、鵝頸橋，直至銅鑼灣，故此一直泛指維多利亞城一帶。
一般人嘅界石路線都係從西走向東、由第一約走到第九約，全程可能有至少20公里，今次編輯就由東至西帶大家找尋港島十界石，從第九約返回第一約，從跑馬地黃泥涌道行到堅尼地城摩星嶺山坡，除咗三座於2021年12月中先喺山坡被發現嘅界石會涉及爆林路線之外，編輯會全部帶大家走最安全嘅界石路線，為土生土長嘅香港加添認識，就算找尋昔日文化產物，香港人都要先保住自身安全。
（1）【6號界石】黃泥涌道界石
維城界石第一站為最接近銅鑼灣、跑馬地市區嘅6號界石，位處黃泥涌道，界石對面為跑馬地黃泥涌道聖保祿天主教小學對面。黃泥涌道維多利亞城界石英文為Wong Nai Chung Road City Boundary Stone，係維城內最接近「下環」地段嘅界石。
由銅鑼灣起步，向跑馬地方向走，穿過禮頓道，步行至黃泥涌道，向聖保祿天主教小學方向走，對面就係6號界石，位處跑馬地遊樂場隔離公園一隅，而界石旁邊則有一小句界石解說。6號界石豎立於行人路面，對比之後幾座界石，明顯係最容易找尋嘅一座，皆因其他好多都位處護土牆或山坡側。
（2）【5號界石】寶雲道界石
第二站係寶雲道維多利亞城界石，英文為Bowen Road City Boundary Stone，界石位處寶雲道與司徒拔道交界嘅5號界石，對面為箕璉坊配水庫休憩處。界石離司徒拔道交匯處距離約半公里，不過界石並非正對迴旋處，而係需要於寶雲道健身徑向灣仔方向步行約半公里，即係迴旋處開始數嘅第二條樓梯旁邊，樓梯向上行會見到御峰、曉廬，而下方則為松栢新邨。
（3）【9號界石】玫瑰崗界石
而第三站就係2021年12月12日先被發現嘅9號界石，位處半山區司徒拔道玫瑰崗學校南面嘅山坡，海拔有約212米高，玫瑰崗界石係最多入口可以前往嘅一座山坡界石，基本四通八達，但大多數路段都為林間，鮮見瀝青路。
9號界石位置靠近剛才嘅寶雲道5號界石，循5號界石小樓梯上行至司徒拔道，然後一直向玫瑰崗學校走到盡頭，會發現學校門口右邊有一個小缺口，此為其一入口。路口有絲帶可以跟隨，只需依循小缺口步行上山坡，一直向最頂端上行，靠近末端可轉左，一直沿水渠邊走，接連見到兩個大渠，穿越之後上工程樓梯就可以前往配水庫位置。不過，由於中段大渠過於危險，編輯首次前往裝備不足，所以未有繼續前行。
第二次通往玫瑰崗界石，先前往灣仔峽道遊樂場，然後到迴旋處對面布力徑，一直向前行，直到見到一道較大型嘅工程樓梯。然後依工程樓梯向下行，樓梯末端會見到一個配水庫大草地。
繼續下行就會到達30年代嘅配水庫，前行會見到CCTV同保安亭，穿過之後就會見到配水庫，沿坑渠前行幾步就會進入山坡範圍，循絲帶路轉左走，中途會有一個小平台。而小平台為一個懸崖，平台上有一座奇形怪狀石頭，據資料顯示，該石被稱為不倒翁石。
不倒翁石後方有一道小山路，同樣一直有絲帶引路，一直向前走，路段雖然稍長，但基本都算清晰，比摩星嶺界石容易步行。只需穿過竹林隧道，不久後就會見到9號界石正確位置，界石離玫瑰崗學校距離極接近。
（4）【7號界石】馬己仙峽道界石
至於第四站就係最下落不明嘅7號界石，原本位處半山區馬己仙峽道15號牆角，大概係郵筒背後，現時仍可見到石牆有補過痕跡。馬己仙峽道界碑英文為Magazine Gap Road City Boundary Stone，海拔高約212米，據悉有別於其他界石於1903年豎立，而係1920年豎立。
不過，已經湮沒於鬧市之中，皆因7號界石已經於2007年6月被移走，當時一度被各界關注，古物古蹟辦事處最終得出下落不明結果，而且無人需要為移走界石負責，而且係不了了之。所以，7號界石至今依舊遺失，未有被正式紀錄，仍未有人知道界石去向。
（5）【4號界石】舊山頂道界石
去到第五站，繼續於半山區逗留，前往半山區舊山頂道就可以搵到4號界石，位處舊山頂道與地利根德里交界處，離涼亭約幾十米，向山頂方向步行1分鐘左右就會見到4號界石。舊山頂道界石英文為Old Peak Road City Boundary Stone，靠近路邊，位於石牆之下，附近可見樹根。
由香港動植物公園轉出羅便臣道，然後上行舊山頂道，有零星豪宅，經過曉峰閣就可以步行上地理根德里，轉入舊山頂道向山頂方向走就會到達4號界石。如果由山頂步行落山，就會更為方便，毋須辛苦由香港動植物公園上行。
（6）【3號界石】克頓道界石
而第六站就係前往龍虎山克頓道界石，離龍虎山松林炮台不遠，位置為西半山克頓道，離旭龢道約400米左右，於龍虎山公廁、16號涼亭直上2分鐘步程就會到達。
龍虎山克頓道界石英文為Hatton Road City Boundary Stone，位於克頓道路邊，海拔高約212米，係上行龍虎山郊野公園必經之路，界石側有展板介紹維多利亞城界石歷史，為10座界石中比較罕見地備受重視。
（7）【8號界石】龍虎山界石
繼續循龍虎山山路上行，可以找尋另一座於2021年12月5日先至重見天日嘅界石，龍虎山界石被發現躲藏於龍虎山山坡之間，海拔高約212米，位置為郊野公園內克頓道以下山坡，近整座龍虎山西南面方向，為維多利亞城界碑中8號界石。
龍虎山界石英文為Lung Fu Shan City Boundary Stone，從龍虎山克頓道界石上行，於迴旋處轉向龍虎山瀑布方向，其後再轉向龍虎亭，全程只係山腰山徑，毋須上行，只需一直向下走，直到經過兩個山邊佛像。到達2號涼亭後，面向對面山坡，位置就係龍虎山界石入口處。
於路邊山坡下行，沿途會一直見到橙色絲帶引路，山坡稍有崎嶇不平，遍佈樹藤、沙泥，貌似山坑，必須緊捉堅穩樹幹，路段絕對係新手不宜。龍虎山山坡界石比玫瑰崗界石、摩星嶺界石路程較短，而且相對比較簡單，基本上前行5至10分鐘就可以搵到龍虎山8號界石，睇完8號界石折返原路就可以前往碧珊徑。
到達8號界石會發現有人於界石表面塗上白色油漆，貌似想令維多利亞城界石上嘅「CITY BOUNDARY 1903」字樣更清晰，但其實會唔會係已經塗污咗歷史文物呢？
（8）【2號界石】薄扶林道界石
從龍虎山碧珊徑下行至蒲飛路，轉往薄扶林道，可以搵到另一座位於沙灣坳嘅界石，正確位置為行人隧道48907號電燈柱側，位處薄扶林道士美菲路交界，靠近富林苑，薄扶林道界石英文為Pok Fu Lam Road City Boundary Stone，地埗為薄扶林道84號，亦係維多利亞城界碑中2號界石。
至於點解薄扶林道界石會靠近路邊呢？其實歷史久遠都難以追查，據稱係因為有斜坡維修工程，所以界石先至被向南移動約500米，最終於薄扶林道行人隧道旁邊落地。
（9）【1號界石】西寧街界石
於薄扶林道下行至堅尼地城，一直向西行，前程域多利道以北、西寧街堅尼地城臨時遊樂場，會發現1號界石位處遊樂場近西面入口內，正對西寧閣，位置為維多利亞城西面界線。1號界石英文為Sai Ning Street City Boundary Stone，界石離堅尼地城巴士總站只係3分鐘步程。
1號界石位置係最令人摸不著頭腦，雖然位處海旁，但位置為臨時遊樂場內，疫情期間遊樂場封閉未能進入都算數，但竟然將垃圾桶放置於界石旁邊，政府會唔會有啲唔太唔尊重本土歷史文物呢？據了解，原來1號界石本來係位處西寧閣，後來於1978年經市政局建議先移動至現時臨時遊樂場內，以免被廢物遮掩。
（10）【10號界石】摩星嶺界石
最後一座界石為摩星嶺界石，同玫瑰崗界石一樣於2021年12月12日先至被發現躲藏於摩星嶺公民村山坡內，山坡海拔高約140米，位處摩星嶺西北面。摩星嶺界石英文為Mount Davis City Boundary Stone，位處域多利道以南、摩星嶺、前公民村之間山坡，為維多利亞城界碑10號界石。
摩星嶺界石初段雖然只係上行樓梯，但爐灶之後就係山坡路段，必須攀爬上行探索，位置極為危險，雖然肯堅持同有毅力係可以做到好多事，但事實上摩星嶺界石比龍虎山界石、玫瑰崗界石更加新手不宜，裝備不足、經驗不足者不宜冒險前往。
於西環西寧閣域多利道對面舊公民村位置起步，循樓梯上行至爐灶後，左面攀上山坡，其後一直為山坡段，其後會到達竹林，穿過竹林之後，留意右邊方向，就會發現10號界石正確位置。
摩星嶺舊公民村山坡陡峭，滿佈荊棘、沙泥，到處樹藤，而且地面樹枝尖削，故此摩星嶺係最艱險嘅1座界石，而下行比上行更險要，要找尋界石嘅話，絕對要三思而後行。
E.A.Tips :
❷ 如果要搵3座新發現界石，要小心安全，因為都係位處山坡內。
❸ 最好穿著爬山鞋，戴上手套，手套係必備，以免沙泥跣腳或被尖刺吉到。
❹ 如果要一次過行晒，就一定要預充足時間，最好拎定頭燈。
❺ 注意新3座界石需要上落斜坡，最好先補充足夠糧水。
❻ 最好係帶多幾個朋友陪同，多個照應。
❼ 巴士路線1,10,5X,101,104 都可以來往堅尼地城。
