30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸

30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸

隨香港疫情持續,堅持清零唔通關,一度興起本地遊,不過所謂秘境幾乎已經被搜刮出嚟,香港靚景之地更加被搵到盡,甚至愈走愈偏僻,今次編輯亦帶大家到邊境一遊,不足30分鐘步程,全走瀝青路,大家就可以拍拖兩個人登上一個邊境小山峰,一邊探索英式碉堡,一邊遠眺邊境分隔線。

從上水出發,一程巴士路線就可以直抵邊境蓮麻坑、香園圍,沿途會經過香園圍公路、打鼓嶺警署,落車後於松園下村涼亭旁邊繼續前往蓮麻坑路,只要依循蓮麻坑路一直走,5分鐘後就會經過「蓮麻坑泵房」,左邊有一道小山路,入口綁有絲帶,的確係可以連接白虎山,但就唔係正常路線,山路亦崎嶇,草叢會愈來愈高同茂密,甚至有墓地,編輯帶大家走嘅係最輕鬆散步嘅路線,所以只需要繼續依循蓮麻坑路走就得。

沿途可見香園圍、蓮麻坑敬修學校嘅指示牌,於蓮麻坑路前行3分鐘就會到達分岔路口,係行動基地入口,路口前會見到香園村避雨亭。即使係唔走剛才嘅山路捷徑,都只不過係15至30分鐘步程,就可以登上邊境小山峰,探視碉堡、機鎗堡,環瞰邊境兩岸景色,分隔線暫時仍算清晰可見。

轉上小路1分鐘後,最先會見到白虎山行動基地,亦係Google Map上可以見到嘅路標,繼續上行2分鐘則會到達一個直昇機停機坪,而旁邊則有一個破舊鐵皮屋,山邊更有一座機槍堡穩固地屹立山坡之上,據悉係日戰時期嘅產物,目前已經被廢棄。

直昇機停機坪背後有一道小樓梯,指示牌寫有「白虎山定壓池」,只要依循小樓梯上行,就可見左右兩邊樓梯,先沿加邊樓梯上行,2至3分鐘即到達目的地麥景陶碉堡。

如果有留意eatwo文章嘅你,應該對麥景陶碉堡(MacIntosh Forts)毫不陌生,事實上麥景陶碉堡係英屬香港時期嘅建築物,全港有7座,通通置於新界邊境禁區山峰,本身用作監視對岸解放軍、深圳河,阻止非法入境,如同觀察哨站,同時被稱為香港警崗,7座碉堡分別建於1949至1953年。當初建立碉堡係由於新中國成立後兩邊經常發生衝突,威脅香港社會安全,而且難民湧入,故此當時嘅警務處處長麥景陶(Duncan W. MacIntosh)就下令興建邊境碉堡,所以7座碉堡又叫做麥景陶教堂或麥景陶碉堡。

每一座麥景陶碉堡幾乎一式一樣,樓高2層,以八角形或圓形設計,風格一致,佇立邊境山頭,只係現時白虎山碉堡顏色稍有不同,白虎山碉堡顏色甚為有趣,上層為迷彩綠色,而下層則為淺藍色,至於係褪色定刻意髹上就不得而知啦!碉堡全為鋼筋混凝土建造,瞭望台、生活區,以鐵絲網完全包圍,碉堡被指有防彈牆,甚為堅固,於1997年已經被古物古蹟辦事處列為香港二級歷史建築物,不過就唔開放俾公眾進入。更細心嘅你,不難發現碉堡對下有一個戰壕,隱藏於草叢當中,與碉堡為同期產物。

大家步行上碉堡時要小心,雖然麥景陶碉堡已經於2016年被剔出邊境禁區範圍,令邊境神秘面紗逐步掀開,但7座警崗現時仍然被使用當中,甚至由人手操作改為使用CCTV監控,有指係用嚟打擊罪行同反偷渡用途。而白虎山、香園圍本來都屬於打鼓嶺禁區範圍,現時則可以步行入內。

碉堡兩旁有小路可以直通白虎山山頂,不過位置較為危險,我哋都係折返剛才嘅樓梯分岔路口啦!沿左邊樓梯走,樓梯有髹上天藍色欄杆,一直上行2至3分鐘就可到達水務署設施「白虎山定壓池」,轉上小平地就係白虎山山頂標高柱位置。

白虎山位於邊境蓮麻坑,原名為白花山,僅高約98米,小山丘上有一座麥景陶碉堡,山腳為香園圍、松園下、竹園村,位於香港最北端邊陲,一端可俯瞰香港北區風景,例如係打鼓嶺黃茅坑山,甚至係近距離直視新界東北堆填區,以至剛才嘅起步點蓮麻坑路;而另一端則能夠清楚眺望2020年中旬先開放嘅深圳香園圍口岸,亦即係蓮塘口岸,對岸風景亦一覽無遺,遍佈城市高樓大廈樓景,同新界北區荒蕪鄉村嘅清幽環境構成強烈對比。

香園圍口岸為香港、深圳第7個陸路跨境口岸,離文錦渡、沙頭角不遠,現場所見甚為荒蕪,而兩岸分隔線亦清晰可見,只係一道蓮麻坑路之隔,就係對岸深圳,有可能係香港離深圳最接近嘅地方,亦有機會係最北端而又一般人能夠到達嘅小山崗。由於小山崗位置靠近堆填區,所以有風吹起時有機會嗅到垃圾氣味,戴上口罩會好些少,編輯無諗過竟然會離垃圾堆填區咁近,還好當日無乜味。

回程時只需原路折返,就可以返回蓮麻坑路,沿途有機會有來回上水廣場嘅小巴路線經過,不過返回巴士站亦只係15分鐘步程。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

E.A.Tips :

❶ 巴士路線79K比較方便,可以直達打鼓嶺松園下總站,時間方面較容易控制,車程約45分鐘。

❷ 小巴路線59K喺上水廣場總站係並無站頭,只係會停泊近橋嘅一端,車程雖然較快,但等候時間亦較長,而且時間無保證。

❸ 巴士落車後需要沿蓮麻坑路走約10至15分鐘,而小巴站落車則步行較短步程。

❹ 乘搭小巴嘅話,要於禁區前嘅香園圍落車,因為繼續走就係蓮麻坑禁區部份。

❺ 踏上蓮麻坑路時必須小心,因為香園圍打後就係禁區部份,需要禁區紙先可以進入。

❻ 轉上小路可直達白虎山行動基地,繼續上行就會到達直昇機停機坪,而背後有小樓梯,前行分岔路口右邊可以直上麥景陶碉堡,而左邊就係白虎山山頂。

❼ 碉堡旁邊雖然有小路可以直通白虎山平地,但其實係懸崖位,而且佈滿突出而有刺嘅鐵絲網,容易受傷,折返樓梯一樣可以登上白虎山,情況安全得多。

❽ 蓮麻坑路不時有車經過,所以最好靠邊走。

❾ 蓮麻坑路可能會有狗隻,要小心安全,唔好挑釁。

❿ 碉堡同行動基地都係禁止進入,千祈唔好以身試法。

⓫ 由於蓮麻坑村為禁區範圍,編輯未查清楚蓮麻坑路步行直入盡頭得唔得,所以未有繼續步行,亦未知有無小路可以避過禁區範圍,下次再諗啦。

EATWO
Miss A
30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸

白虎山

蓮麻坑路

在〈30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸〉中有 1 則留言

留言功能已關閉。