近月馬草壟生態園、南屋仔新開幕，吸引唔少人專程前往落馬洲邊境遊覽，但其實除咗南屋仔，亦可以拍拖兩個人前往英屬香港時期建設嘅歷史遺跡，從二級歷史建築物旁邊可直接於山頂處俯視山腳魚塘群，有別於南屋仔水平線觀望魚塘，而且景觀遼闊，同時可眺望大石磨山頂燈塔。
事實上，馬草壟原為邊境禁地，於2013年先正式開放邊境六條鄉村，讓公眾自由出入，給予一般市民到邊境找尋禁地風光，雖然馬草壟邊境禁地已經大多解禁，但當中一座英屬香港嘅歷史遺跡仍舊唔對外開放。
由馬草壟南屋仔起步，前往信義新村公廁約5分鐘步程，而信義新村公廁旁邊有小巴站，位置離馬草壟警崗只係7分鐘步程。一條路線就可以直接抵達馬草壟警崗，位置同時係英屬香港興建嘅麥景陶碉堡。
全香港合共有7座麥景陶碉堡，分別於1949年至1953年期間由當時嘅警務處處長麥景陶下令興建，7座碉堡都建於本地邊境禁區小山丘，有指英國人稱作麥景陶教堂。每座碉堡原本作用係英屬香港政府監察當時中國解放軍同深圳河對岸形勢，以防新中國威脅當時嘅香港社會同共產黨難民湧入，後來建築物於1997年被列為香港二級歷史建築，其後更演變成反偷渡、打擊跨境罪行、邊境禁區管制之用。據《邊境禁區修訂令2015》顯示，7座麥景陶碉堡嘅警崗已經全部被剔出禁區範圍，並改由電子系統監察，無人駐守，不過至今仍然重門深鎖，禁止內進。
碉堡由鋼筋混凝土建成，面向香港北方深圳河方向，7座麥景陶碉堡設計基本相似，從馬草壟警崗嘅麥景陶碉堡可見，係一座擁兩層高嘅建築物，頂端呈八邊形，如同邊防堡壘，目前全由鐵絲網圍封，閘口左邊有洗手間，閘內有大草地，亦有水塔、發電機房。據了解，每一座麥景陶碉堡都建有防彈牆，以作邊境防衛。
由於馬草壟生態園同南屋仔新建於邊境禁地，馬草壟近月就以大量鄉村魚塘、農田堆砌出靚景聞名，但其實要飽覽魚塘群同鄉村農田又豈止南屋仔？只需稍稍上行至馬草壟警崗，向山坡方向步行約50米，就可以從高點俯瞰整個落馬洲馬草壟風景，黃昏時夕陽斜照更添上金黃色調，令魚塘瞬間演變成天然調色盤，景色醉人。
山崗座落古洞北部，位置近上水西面，山上不單可俯首山下靚景，山上亦有連綿芒草群，另一端更可眺望大石磨燈塔，而深圳河旁邊有香港蠔殼圍，對岸則為福田區，可享270度風景，如同邊境觀景台，本地鄉村樸實寧靜荒蕪嘅環境同對岸現代建築高樓大廈嘅喧鬧構成強烈對比。
從馬草壟麥景陶碉堡落山，前往料壆村亦只需11分鐘步程，料壆村係一個寧靜怡人嘅邊境小村落，歷史可追塑至18世紀，現時仍然居住嘅人只有少數。由料壆村步行至得月樓警崗，經過遊樂場、籃球場，再前行至羅湖得月樓村，於分岔路口轉左，即可以直踩得月樓警崗邊境地，腳程亦為大概11分鐘。位置毗連梧桐河，小橋對面就係羅湖口岸，口岸通道上仍保留有2019年起嘅宣傳廣告，橋身一邊為香港，另一邊已為大陸地方，即禁區邊緣處，步行至此時，謹記要小心每一步。
此後，只需依循梧桐河走，再切入雙魚河畔，15至20分鐘左右就可以到達人氣打卡景點大水管，而大水管離寶石湖邨則為20分鐘步程，再步行約9分鐘就可以折返上水廣場。
E.A.Tips :
❷ 於上水廣場旁邊小巴總站乘搭小巴路線51B，於南屋仔之前嘅信義新村落車，落車後折返分岔路，再向料壆方向步行一個分岔路口，左邊上山到盡頭，再步行上樓梯就可以到達馬草壟警崗，警崗右邊小山路就係小山崗盡頭位置；或者於料壆村落車，然後向南屋仔方向步行至馬草壟警崗。要注意小巴服務時間為05:20-21:00，車程約20分鐘，每班次約15至50分鐘。
❸ 另一邊可以由上水小巴總站乘搭小巴路線51K，於河上鄉落車，先經大水管、得月樓警崗邊境地，然後沿梧桐河步行至馬草壟警崗。
❹ 不過要留意小巴班次比較疏落，但的士車費照距離計約需$50。
❺ 如果步行至馬草壟，腳程大約係1.5小時。
❻ 警崗係禁止進入，不過旁邊就有小山路可以通往山頂觀景地。
❼ 小山可望魚塘景，但山邊為懸崖，勿於懸崖邊影相，注意安全。
❽ 小山路沙泥、碎石繁多，小心跣腳。
❾ 謹記人群多時唔好玩航拍，玩航拍前要先熟讀規則，特別係要離人群30米以上。
❿ 記得自己垃圾自己帶走。
⓫ 每個警崗門口有CCTV，記得唔好以身試法，只有持該地禁區紙先可以穿梭得月樓警崗至羅湖口岸，即係一定唔可以穿過。
⓬ 得月樓警崗旁邊有條橋，係通往羅湖口岸，但一般人係唔可以進入，千祈唔好行上橋面，以免有咩意外，雖然一接近條橋就會有警崗嘅人欲步出勸阻。
⓭ 基本上全段路都係人車走同一路，而且係單程路，所以必須小心車輛通過。
麥景陶碉堡（馬草壟）
馬草壟路馬草壟警崗
在〈離南屋仔僅15分鐘步程！落馬洲邊境尋英屬麥景陶碉堡 俯首馬草壟魚塘群眺大石磨燈塔〉中有 1 則留言
留言功能已關閉。