龍脊同鶴咀係一早吸引唔少人前往遊覽嘅郊外路線，編輯純粹記起未寫過呢兩條人氣路線，所以先特別再去一趟。的而且確，龍脊、鶴咀都係難度極低而風景優美嘅路線，無論係拍拖兩個人散吓步，抑或係一家大細合家歡行山都非常適合，當中鶴咀則恍如穿越台灣墾丁！
先遊鶴咀，再行龍脊，然後返回筲箕灣，或者前行至小西灣方向離開，都係唔錯嘅路線。由筲箕灣巴士總站乘搭石澳巴士路線，既可以經過龍脊行山徑，亦會途經鶴咀道，如果前往鶴咀，可於鶴咀道落車，而若要前往龍脊，可於土地灣或石澳道歌連臣角落車。
依循鶴咀道走，全程為瀝青路，只需直行到底就可以通往鶴咀海岸保護區，而鶴咀本身係一個海角，可眺望石澳、東龍島。原來鶴咀最初名稱曾經叫大浪頭、鶴咀灣，後來鶴咀之名係來自一位駐港英軍總司令兼首任副總督德己立爵士（Sir George Charles D’Aguilar），所以鶴咀英文都叫做Cape D’Aguilar。而最初地圖上其實係寫成鶴嘴，寫法有如大角嘴、尖沙嘴，不過後來又唔知點解約定俗成通通寫成鶴咀，為多人Search到，編輯決定照寫成鶴咀。
要選鶴咀最有人氣嘅影相熱點，就必定係蟹洞、雷音洞、鶴咀炮台、鶴咀燈塔，海岸保護區於1996年先劃定，而鶴咀燈塔早於1875年就已經落成，而鶴咀村更有逾200年歷史，鶴咀海岸保護區盡頭亦有一座香港大學設立嘅太古海洋科學研究所，鶴咀道沿途一直為海景步道，視野開揚，全海景觀盡收眼底。
沿鶴咀道一直走到近鶴咀海岸保護區，先於鶴咀海底電纜站分岔路口轉上鶴咀燈塔，路牌會寫明叫鶴咀高台發射站，直到分岔路口有約3,2公里，需時約45分鐘，該小路可以直接到達鶴咀燈塔，而燈塔之下則為宿舍用途。鶴咀燈塔如同墾丁鵝鑾鼻最南端燈塔，純白色燈塔加花崗石舖砌，門框為麻石磚，造型的確甚為相似，而本地嘅鶴咀燈塔頂端牆身寫有編號158號，係香港最古老燈塔之餘，亦係香港法定古蹟。
折返鶴咀道，繼續前行到車路盡頭鶴咀電台，步入左邊草地就可以再前行至鶴咀道真正盡頭，大片草地同樣恍如步入墾丁鵝鑾鼻一樣。穿過草地，就會見到另一端嘅鶴咀道，路牌寫明可通往鶴咀海底變電站，其實就係鶴咀海岸保護區。
走到鶴咀海岸保護區盡頭之前，可以先探索吓雷音洞，有一道小樓梯連接小洞穴同鶴咀道，而雷音洞就係山界中著名嘅海蝕洞，由於長期受到海水侵蝕，所以形成一個特別形狀嘅洞穴，亦由於巨浪湧入形成巨響，故此被稱為雷音洞。步入雷音洞內，會發現海浪會一直衝擊洞壁，構成一幕幕浪花，甚為壯觀。
返回鶴咀道，前行至盡頭就會到達鶴咀海岸保護區，內有一舊鯨魚骨，其實只係一副鯨魚骸骨標本，據悉曾於維港擱淺。另外，鶴咀海岸保護區內最多人爭相打卡嘅地方就係鶴咀蟹洞，海旁山洞自然地構成一個蟹嘅形狀，純粹都係岩層受侵蝕嘅結果。不過，遠睇先會呈現蟹狀，甚至恍若上帝之眼，而唔少人爭相到蟹洞底或蟹洞頂打卡，其實兩者都未必可以拍攝蟹洞畫面，只係洞穴內可以近距離望吓海浪拍打岸邊兼濺起水花。
鶴咀盡頭可以遠眺赤柱、石澳方向，天朗氣清時更可眺望東龍島，位置靠近南端，所以都如同港版墾丁一樣，鶴咀海角亦正對汪洋大海，如同天涯海角。而左邊會發現鶴咀指示牌後方有一座神秘建築物，但原來係博加拉炮台（Bokhara Battery）。
只要折返原路，香港大學太古海洋科學研究所旁邊就有一道小樓梯可以登上博加拉炮台，可回望鶴咀海岸、鶴咀燈塔，不過前往炮台有幾分危險，皆因位置有如懸崖，需要特別小心安全。由於鶴咀曾經係軍事要塞，所以會見到一個又一個炮台，包括鶴咀炮台（D’Aguilar Battery）、博加拉炮台，甚至可見海岸機槍堡，始終都係戰時建築物。
折返鶴咀道，一直前往石澳道土地灣方向，就可以接連登上龍脊行山徑。
E.A.Tips :
❷ 鶴咀路線需時約2至3小時，而龍脊則需時3至4小時，如果想一日行晒兩條路線，就要預定充足時間啦。
❸ 如果先去鶴咀，就於鶴咀道落車，一直依循鶴咀道走就可以去到鶴咀自然保護區。
❹ 鶴咀路線必須原路折返，回程巴士可能會比較多人，如果想同時行龍脊、鶴咀，建議先走鶴咀，然後有充裕時間先再行埋龍脊。
❺ 鶴咀海岸保護區同龍脊基本上都無洗手間，但鶴咀道中途有流動廁所，不過就唔太建議使用，因為相信該廁所含菌量同病毒量都幾高。
❻ 鶴咀道中途有一個士多，只係營業時間難以確定，而龍脊則無補給點，需要筲箕灣先作補給。
❼ 注意鶴咀道愈行得入就愈收唔到訊號。
❽ 基本上路線都適合新手步行，都係嗰句，就算唔難行，都唔好掉以輕心。
❾ 鶴咀係法定海岸保護區，謹記要愛護環境，自己垃圾自己帶走。
❿ 鶴咀附近有村落，勿大聲喧鬧。
⓫ 鶴咀為海旁步道，大多為平路，只有少量上落斜。
⓬ 注意鶴咀有部份路段為發射站禁區範圍。
⓭ 雷音洞係一個小洞穴，可以拍攝浪花濺起靚相，但都要記得唔好行得太近盡頭海水方向，小心水漲時洞穴會被淹沒。
⓮ 鶴咀盡頭有部份位置可能需要攀爬，最好穿著長袖衫褲，而部份為懸崖邊，要特別小心步行。
⓯ 打爛埕山頂路段有唔少碎石，而馬塘坳、大浪灣之間路段更有千級樓梯。
⓰ 影相還影相，千祈唔好企喺懸崖邊等危險位置。
鶴咀
香港島南區赤柱半島 / 石澳鶴咀半島南端
在〈探索港版墾丁鶴咀半島 背靠龍脊賞赤柱石澳東龍島〉中有 1 則留言
留言功能已關閉。