雲霧中睇龍脊！登新手行山步道賞雲海西灣國殤石藏歷史紀念捍衛香港軍人

上次提過鶴咀，今次就寫埋龍脊，兩者同樣係超低難度嘅人氣郊遊路線，龍脊風景優美，適合拍拖兩個人行吓山，更於2004年曾被《時代雜誌》亞洲版選為「亞洲最佳市區遠足徑」，其後CNN《Lonely Planet》、CNN旅遊網站亦紛紛推薦，吸引唔少人慕名而至。的而且確，龍脊路線左右兩端風光如畫，今次就從另一個角度觀賞龍脊，即使海拔不足300米，但頂端仍有如置身雲海當中，放眼一片朦朧美。

由石澳道土地灣村方向起步，就可以接連登上龍脊行山徑，路口有公廁、巴士站。龍脊係一道山過山嘅山徑，包括會經過雲枕山、打爛埕頂山，然後連接港島徑第八段，海拔高約284米，既然係人氣景點，兩端風光亦無需多講，龍脊山路寬闊易行。事實上，由於兩座山峰尤如龍背騰飛，連綿起伏，山勢高低起伏得亦如同沉睡中嘅巨龍，所以該山路就叫做龍脊（Dragon’s Back）。

攀登林蔭小徑就可以穿過龍脊步道，基本上位置可俯視藍塘海峽，而經過一段竹林之後，繼續前行會到達打爛埕頂山。穿越蜿蜒山道，步行1小時後就可抵達山頂觀景台，位置上更可以觀望石澳、赤柱、大浪灣、東龍島，甚至細小島嶼，海景一覽無遺。而目前大霧籠罩，大海一片朦朧，反而更貼近現實，身處香港亦同樣前路茫茫，山上隱約可見位置無高樓大廈遮擋，至可享360度景觀，難怪被稱為人氣山徑。

至於經過龍脊觀景台再前行至最高點嘅打爛埕頂山觀景台，本身亦可以俯瞰赤柱、大潭灣、舂坎角、紅山半島、南丫島一帶，甚至蒲台島、東龍島，一直被讚賞為風光明媚嘅地方。目前，雲霧透視前端風景，感覺係從另一個角度睇龍脊，反而睇到一般人睇唔到嘅地方。

之後可以轉入港島徑第八段前往馬塘坳，位置可眺望柴灣、小西灣風景，沿路同時可以一直下行至小西灣方向；又或者係前往歌連臣角道，再步行返回柴灣方向；亦可以直接於石澳道乘搭巴士離開，折返筲箕灣。

雖然歌連臣角道靠迎柴灣華人永遠墳場，但亦會經過西灣國殤紀念墳場，對傳統嘅人嚟講係有啲「大吉利是」，但事實上「百無禁忌」，亦可當作一個歷史去睇，西灣國殤紀念墳場係用於紀念曾經為香港犧牲嘅海外軍人，墳場內一個個墓碑模樣，墳場內有一座純白十字架，畫面莊嚴肅穆，安葬因香港保衛戰而犧牲嘅軍人。

墳場門口有一座紀念亭，除咗頂端寫有「Sai Wan War Cemetery」，下面有個十字架形狀，兩側有「1939」、「1945」字樣，代表第二次世界大戰年份，背後紀念牆上亦刻有因香港保衛戰而陣亡或死於戰俘營嘅軍人名字。前行會見到鑲有白色方柱形嘅碑石，其實就係「國殤石」，碑文上則寫有「THEIR NAME LIVETH FOR EVERMORE」，有「永垂不朽」之意。墓碑中顯示英聯邦盟軍各個士兵嘅名字同組織，包括加拿大、澳洲等，每一個墓碑下都係英雄，真正捍衛香港嘅人應該要尊敬。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於筲箕灣巴士總站乘搭巴士路線9號，為往石澳方向巴士，都可以前往鶴咀、龍脊，不過最好預先查清楚巴士班次，因為平日同假日班次會唔同，尤其係去鶴咀。

❷ 鶴咀路線需時約2至3小時，而龍脊則需時3至4小時，如果想一日行晒兩條路線，就要預定充足時間啦。

❸ 如果去龍脊，可以自由選擇於土地灣站或石澳道歌連臣角站落車，視乎走邊個方向，一落車就已經係龍脊行山徑；另外都可以乘搭前往石澳嘅紅色小巴路線，同樣於土地灣落車。

❹ 基本上路線都適合新手步行，都係嗰句，就算唔難行，都唔好掉以輕心。

❺ 謹記要愛護環境，自己垃圾自己帶走。

❻ 基本上龍脊大多數路段都無乜遮蔭，除咗馬塘坳至大浪灣村，所以要做足防曬揩施。

❼ 從龍脊回程可以折返筲箕灣，亦可以繼續前行至港島徑8段，前往小西灣或大浪灣方向，但路段就可能較長。

❽ 影相還影相，千祈唔好企喺懸崖邊等危險位置。

❾ 龍脊山路有安全電話，而且有明確坐標。

❿ 龍脊兩邊入口都有臨時公廁，但用唔用自己揀啦。