天水圍公園垂落串錢柳勁搶眼 睇埋代表香港嘅洋紫荊

天水圍公園垂落串錢柳勁搶眼 睇埋代表香港嘅洋紫荊



天水圍公園附近有多個大型屋苑,如嘉湖山莊、置富嘉湖、天瑞邨及天耀邨等,係天水圍附近居民散步嘅地方,今次小編兩個人嚟睇花,有啲花幾特別,比如串錢柳等,仲有代表香港嘅洋紫荊。

洋紫荊學名係Bauhinia × blakeana,因貌似蘭花亦叫香港蘭,由於首次喺1880年喺香港被發現,所以被稱為香港市花,所以英文除咗叫Red-flowered,亦叫Hong Kong Orchid Tree,成為香港象徵圖案。不過小編就質疑,既然叫市花,林鄭係咪唔應該叫特首,應該叫市長?

    

洋紫荊? 羊蹄甲 ?

洋紫荊本身係紅花羊蹄甲(B. purpurea),同宮粉羊蹄甲(B. variegata)有分別。洋紫荊葉緣較尖,出現喺充滿日光同高溫嘅地方。洋紫荊株高5尺,樹身最高10米,屬於常綠喬木,葉面似心形,長8至15cm,呈綠色。洋紫荊呈花萼管狀,花瓣較寬,5片以紫紅色為主,花瓣上一片仲有深紫色脈紋,另外四片脈紋較淺色,而洋紫荊開花期為11月至3月。

而小編就特別推介緩緩垂下嘅串錢柳,串錢柳似足古代一個個銅錢串起般,形態似足清潔用嗰啲紅色圓筒刷,柳葉同花都係大紅色,有風時隨風搖擺,婀娜多姿,花期為2月至4月。春季開花時,都可以係拍拖一個打卡點呢。

串錢柳英文學名係Callistemon Viminalis,原產自澳洲,屬桃金孃科嘅紅千層屬,英交亦叫Tall Bottle-brush,同時係耐寒嘅常綠灌木或喬木。狹線或披針形單葉似揚柳,脈狀唔明顯,線點較粗糙。

最高生長至8米,加上串錢柳以大紅色為主好搶眼,而且有伸出長花絲嘅雄蕊,有5片花瓣,花序柔軟而向下,似足吊飾一樣。串錢柳果實為木質蒴果略圓,而且數量多而柔軟,緊貼枝條上面,一串串紅色串錢柳似足懸掛樹枝,影相時連中間個湖,串錢柳似向湖中緩緩垂下,嗰種姿態其實都好有美感。

賞花還賞花,記得要做個有質素嘅香港人﹕
1. 保持安靜,勿開喇叭聽歌或大聲講大聲笑
2. 自己垃圾要自己帶走

交通﹕
天水圍站轉輕鐵,可以銀座站、天湖站、天瑞站、翠湖站落車都得

天水圍公園

地址: 天水圍天瑞路6號
開放時間: 24hours
電話: 2445 5805

延伸閱讀﹕南昌公園黃花風鈴木盛開 滿天黃花鮮艷不俗氣

延伸閱讀﹕鰂魚涌公園綻放紅花風鈴木 3月紫紅風暴超壯觀

延伸閱讀﹕將軍澳櫻花樹下打卡 捕捉最後一朵櫻花

延伸閱讀﹕蔚藍天空映襯粉紅櫻花 大埔海濱公園野餐賞櫻

延伸閱讀﹕黃大仙驚現禾雀花 外形奇特被列瀕危保護植物

延伸閱讀﹕錦田石崗村睇火紅木棉花 燦爛盛開勁吸睛

延伸閱讀﹕馬鞍山蒲桃開花似光纖 果實香甜可食用

延伸閱讀﹕沙田公園睇宮粉羊蹄甲 狀似洋紫荊到底點分?

延伸閱讀﹕抗疫賞花!動植物公園激罕繡球樹開花 大紅色超有氣派

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!