2021-08-03

沙田奇幻萬佛天梯金佛坐鎮 佛經句句深入淺出 走完萬佛寺再闖道風山

萬佛寺+道風山

個人瀏覽過





平常行山行到悶,可以試試市區小山,沙田有一道擁有逾萬尊金佛像嘅小山路,沿途更有500座金羅漢像坐鎮,相當震撼!佛像旁邊更有一句句反映現實嘅佛經,極有深度,行山被佛祖注視嘅感覺你又試過未?

拾級而上,需要穿越400幾500級長長階梯,穿過一尊又一尊造工精細嘅羅漢像,以玻璃纖維製造,再敷上金箔,部份則稍有褪色。大大小小嘅羅漢像形態各異,有啲滿臉慈祥,有啲充滿氣勢,亦有啲打坐念經,更有啲表情鬼馬、千奇百怪,但每一座皆似乎經過千錘百鍊,路段感覺受佛祖庇蔭。

除咗2000年開闢樹林道所加入嘅500座金羅漢像,上山沿途更可以細味一句句佛經,一字一句都意義深遠,感覺諷刺現實,令人唏噓。全段佛教禪林路程簡單易行,時間只係約20至25分鐘。

沿途遊人稀少,大多為外藉遊客,低點可見寺外連綿金羅漢像、寫有「南無阿彌陀佛」嘅東面外牆、寺內萬佛塔,現為香港三級歷史建築嘅萬佛殿,高點可見觀音像、太歲長廊、玉皇殿、準提殿等,最高點僅高百零米,環境清幽。山頂位置可以觀望城門河、沙田城市景色,一端可望吐露港,另一端可望獅子山。

      

萬佛寺建於50年代,由月溪法師興建,座落沙田市中心排頭村附近,依山而建,既屬神廟,亦為修道院,而目前由吳星達居士為主持。事實上,萬佛寺英文為Ten Thousand Buddhas Monastery,意指擁有約一萬尊佛像嘅寺廟,而內裏有5座廟宇、1座寶塔、4個亭台,可從萬佛寺東西兩邊大門進入。寶塔為一座9層高嘅萬佛塔,內有螺旋形樓梯,可從小窗向外觀景,而萬佛塔曾為香港匯豐銀行$100紗票圖案,現已停止發行;至於亭台分別為韋馱亭、觀音亭、普賢菩薩亭、文殊菩薩亭,內裏更有千手觀音、十八羅漢廊,每個角落都夠莊嚴宏偉。

行完萬佛寺,落山位置剛好折返逾百年歷史嘅沙田排頭村,不妨再轉上小山路,再走約30分鐘,通往一個可以避世嘅靈修地。目的地為道風山,由沙田排頭村行上道風山,穿過小徑可以到達山路,全程為石屎路,寬闊易行,更重要係同萬佛寺一樣人流極少。位處道風山山頂,一方面可以俯視山下沙田景色,另一方面可以到純白色巨型十字架、中式教堂打卡,拍拖情侶兩個人前往道風山神聖而浪漫,夏天亦可以舒舒服服地上山走走。

延伸閱讀﹕30分鐘上道風山 睇巨型純白十字架連中式教堂


E.A.Tips :

(1) 乘搭巴士路線27B, 280X, 48P, 89X可以到達沙田市中心,步行到沙田排頭村為5分鐘內步程。

(2) 穿過新城市廣場,經過小巴總站,沿斜路落斜,經過新城市中央廣場入口,沿排頭街轉入上禾輋路,經沙田政府合署,再經過唔知執咗未嘅ICAC,直行到尾就會見到小路,然後轉左,有鐵絲網圍住,位置比較隱秘,離遠已可見到羅漢像,走約5分鐘已經可以去到萬佛寺山腳入口。

(3) 上山路段比較隱秘,拍拖兩個人結伴而行會比一個人行安全。

(4) 萬佛寺上山路段有兩邊,分別大概400幾至500幾級連綿樓梯,但斜度唔算陡峭,坡度適中,直上到頂大概只係15至30分鐘。

(5) 建議先從第一條路上山,沿路可先觀賞羅漢像同佛經,上山時羅漢像氣勢比落山時畫面強,然後於萬佛寺另一邊落山,直落排頭村,然後可順道直上道風山。

(6) 尊重信仰,亦唔好塗鴉或破壞羅漢像。

(7) 保持安靜,佛門清靜地勿喧嘩。

(8) 留意萬佛寺入面係嚴禁攝影,所以寺廟入面係唔適宜拍攝,所以編輯於門口已停止拍攝,到另一邊入口先繼續拍攝。


萬佛寺(Ten Thousand Buddhas Monastery)

新界沙田排頭村221號
09:00-17:00
2691 1067

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

深水埗大南街咖啡店共享空間 設計藝廊真係值得睇?
【英國偽旅行】本地4個必去英式庭園 英國文學作品場景/海拔最高公園/法定古蹟遍佈港九新界
【美國偽旅行】穿越邁亞密探索海量棕櫚樹 港版千島群島景觀開揚 爽歎美式口味漢堡Comfort Food
【歐洲偽旅行】本地挪威式小花園/城堡打卡 歐式別墅前臨靜謐沙灘 無敵海景盡曬日光浴
青馬橋底睇日落!青衣西草灣賞景打卡秘地 細山步行徑近三支香談心好地方
【意大利偽旅行】穿越「東方威尼斯」 感受香港水鄉小島風情 兩大賞景地眺黃昏夕陽
錦田高埔村天空之城離市中心僅1公里 No Boundary姊妹店HOLA Chill住歎加料厚多士
【澳門偽旅行】迷你葡萄牙羅卡角海岬/倒模路環彩虹屋打卡 歎地道澳門豬扒包兼暢遊黑沙海灘
【泰國偽旅行】港島迷你泰式小屋打卡 海邊恍若峇里島度假 歎過江龍正宗船麵
驚現男團Mirror/Error主題月餅!中秋黃金月餅巡禮2021最完整名單!即睇港九新界連網店月餅預訂攻略!
【台灣偽旅行】遊走新界3大壁畫村 歎地道肉焿湯/台式牛肉麵
【日本偽旅行】全港5個本地「日式庭園」 秒到鳥居/神社/繪馬/動漫場景打卡
超隱秘!素肉骨茶湯底!荃灣巷弄素食車仔麵$50有找 24款純素/蛋奶素車仔餸任揀
消失的「萬壽無疆」? 旺角懷舊東方色彩工業風咖啡店五金味重
入場有限制!大埔慈山寺偽旅行驚現仿日本神社御手洗 必睇全球第2高巨型純白觀音像
瞰鋼線灣景色!穿梭山頂至薄扶林水塘尋港版《千與千尋》場景 新哥德式風格大學堂/伯大尼教堂打卡 薄扶林村都有秘地?