沙田 神秘寶地
3低本地遊,  兩個人旅吓行,  和你Taste

【3低本地遊】沙田神秘大宅咩背景?山有巨型十字架/萬佛天梯 文青咖啡店藏IG-able日式包廂

個人瀏覽過





沙田係一個熱門地區,人流擁擠,而沙田圍就係比較少人會行逛嘅地方,其實沙田圍位置只係沙田市中心對面,經過瀝源橋,跨過城門河,就可以拍拖從沙田走到沙田圍方向,今次帶大家兩個人由沙田行到沙田圍,行吓意想不到嘅好地方。

第一站﹕萬佛寺

去到沙田市中心,不妨先行吓可以避開人群嘅萬佛寺,上山路段有如逾萬尊金佛像陪伴,事實上四至五百級樓梯擁500座金羅漢像坐鎮,畫面極震撼!而佛像旁邊則有佛經節錄,句句深入淺出有意思,部份更反映現實。大小羅漢像形態各異,千奇百怪,受佛祖庇蔭,全程僅20至25分鐘,遊人稀少,多為外藉遊客,山頂處則有萬佛塔、萬佛殿,環境清幽,山頂更可俯視城門河、沙田城市景色,遙望吐露港、獅子山。從另一段路離開,可以直表折返沙田排頭村,轉上山路可以去到另一個宗教地方。

延伸閱讀﹕沙田奇幻萬佛天梯金佛坐鎮 佛經句句深入淺出 走完萬佛寺再闖道風山

第二站﹕道風山

離萬佛寺不遠可見道風山,折返沙田市中心後出發,路段只係30mins,輕鬆直上山頂,俯瞰沙田一帶風景。道風山為靈修地方,被列作香港二級歷史建築,山上中式園林古色古香,最特別係中式教堂、2至3層樓高嘅巨型純白十字架,環境神聖又浪漫。萬佛寺為佛教地方,而道風山則為基督教地方,道風山既可避世,又可賞景,亦可以靜修,涼風吹拂,愜意非常。

延伸閱讀﹕30分鐘上道風山 睇巨型純白十字架連中式教堂

第三站﹕Cafe Koinonia

由沙田行到原本係沙田圍村嘅沙田圍,80年代以高密度屋苑為主,大多為私人住宅,包括河畔花園、勵城花園等,大多樓下都有商舖,公屋就有沙角邨博康邨水泉澳邨,居屋有愉城苑,大多以巴士出入,屯馬線落成後,多咗由沙角街站易名至沙田圍站嘅港鐵馬鞍山線,不過建議如果直接去沙田圍,都係搭巴士啦!

沙田圍有一間隱密文青咖啡店Cafe Koinonia,藏於圓洲角,食物有質素,即叫即整,咖啡以明治鮮奶為主,牛油果松露蛋沙律醬牛角包係小編推介,飲品價錢一般平過連鎖咖啡店,Caramel Macchiato焦糖味好濃、好香,英式甜品Apple Crumble以蘋果為基底,入口暖笠笠。店內仲有一個好啱打卡嘅日本包廂,榻榻米座位為和式風格,適合私人聚會圍爐吹水或拍拖談心。

延伸閱讀﹕沙田圍文青Cafe藏日式包廂 焦糖瑪琪朵香甜不膩

第四站﹕圓洲角公園

食飽再去散散步,沙田圍有唔少特色地方,包括咖啡店附近嘅圓洲角公園,可以Hea吓。圓洲角公園位處沙田圓洲角路,環繞小山丘興建,山下公園有一般公園設施,內有一條登山小徑,直通最高點,會見到一個三角測量站,即平時上山見到嘅標高處。事實上,逐圓柱畫有三角點,係傳統用作三角測量,不過現時大多採用衛星定位,失去原有作用,平常上山大多數都係被用作打卡點。整個公園面積唔細,但路段四通八達,相當方便。

第五站﹕神秘古老大宅

另一邊廂,沙田圍有啲建築係歷史建築物,曾大屋同吳園就好有古老大宅嘅感覺。曾大屋又叫曾氏大屋,有150年歷史,為香港一級歷史建築物,屬於客家圍村,當年有一位靠石廠致富嘅商人曾貫萬興建大屋俾市民居住,二戰時曾收留逃難嘅人,所以尊稱做曾大屋。曾大屋採用花崗石、青磚、精選木材砌成圍牆,四角築有鑊耳型三層高碉堡,上面既有槍孔,又有瞭望台,都可防盜賊。曾大屋曾經有護城河、吊橋、風水池,目前已遭拆去。圍村有三個大門口,包括安富門、尊榮門、一貫世居門,以中門最大,頂碘呈圓拱形,旁邊為麻石舖成,門上門閂以酸枝木同鐵枝製成,仲有鐵門。村內大廳分上、中、下三個廳,以天井分隔,再以左、右兩邊橫屋相連,似棋盤狀。而目前唔少村民都已移居海外,原有曾姓子孫稀少,外姓人反而多。曾大屋基本呈長形,似足一個堡壘,幾有觀賞價值。

由曾大屋步行幾分鐘就會到達另一個神秘大宅吳園,靠近城門河,同樣係香港古老建築物,但吳園同曾大屋唔同,目前無人居住,屬廢置大宅,有幾分陰森感。吳園由宋朝起代代經商嘅商人吳子美於清末興建,樓高兩層,特別採用鋼筋混凝土、花崗石等建造,屋頂正門有古典圓柱裝飾,以當時嚟講中西合璧係突破傳統同先進,屋頂三角形簷牆刻有吳園二字,保留得唔錯。吳園同樣歷史悠久,日治時曾被日軍佔用,戰後先歸還,其後只供租住。70年代後因無人居住而日久失修,最後荒廢。吳園於10年前被評為三級歷史建築,大宅可以保存落去。兩間古老大宅都值得影吓相呢!

延伸閱讀﹕到訪沙田圍神秘古老大宅 有一座係一級歷史建築?

第六站﹕小甜將

臨近行程尾聲,不妨食返碗糖水滋潤吓,當作下午茶,可同另一半相處耐啲。沙田圍有一間隱藏喺圓洲角附近嘅糖水舖小甜將,糖水、甜品都幾大眾化,價錢相宜,好快上枱。招牌之一係原個椰皇燉北海道3.6牛乳楊枝甘美露,份量唔算多,但足夠,層次豐富,有芒果粒粒、楊枝甘露、煙韌嘅小丸子,仲有香甜又有奶香味嘅燉奶。整體滑溜又有咬口,香甜不膩,食完燉奶可挖埋椰皇肉食。而榴槤綿綿冰可配椰果、白玉、粒粒爆珠等,質感柔軟,有冰感,淋上適量糖漿,融合時好療癒。

延伸閱讀﹕沙田河畔街坊糖水舖 平價飯後甜品


E.A.Tips :

(1)

(2)


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!