何時.何地(河上鄉金鼎湖畔)+雞蛋花
Afternoon Tea,  Cafe 咖啡店,  兩個人醫吓肚,  和你Taste

上水河上鄉魚塘滿滿度假風 西多士配清新柚子醬 週末小花園露天茶座歎下午茶

瀏覽次數:3690
個人瀏覽過





近年,上水河上鄉成為唔少遊人玩超級單車徑走嘅單車路線,沿途既可以探視打卡熱點大水管、歷史悠久古蹟,最近更可以觀賞鳳眼藍,環境清幽寧靜,但美食點就唔多,最多都係去食豆腐花放題,今次編輯推介沿途一間靠近魚塘嘅小花園露天餐廳,為本地人嘅可支持商家,拍拖情侶遊覽上水近羅湖邊境地方時都有嘢好食啦!

位於上水河上鄉嘅「何時 • 河地」,開業不久,基本上無大招牌,外面只有細細張A4紙仔標示,從外面觀望,僅似一個休憩地方,走到盡頭會發現有一個小魚塘,旁邊有一間歐式小木屋,而木屋外有幾個開住太陽傘嘅露天茶座,配合午後陽光時感覺特別Chill。

餐廳地方唔大,室內、外只有少量座位,但環境舒適,小花園既種有開始盛開嘅雞蛋花,亦有大榕樹,樹下相當清涼。茶座各種陳設極配合魚塘環境,充滿度假風,魚塘既似日本鄉郊地方,露天位置亦似摩洛哥至泰國風格嘅茶座,總之就充滿異國風情,兩個人可以一邊歎下午茶,一邊於鳥語花香嘅小花園中打卡。

以小店嚟講,餐牌內菜式唔多,主要係公仔麵、三文治、港式小食同飲品,更有當日未能提供嘅滷水小食$35,款款價錢低廉,雖然近乎獨市,但價錢上無獅子開大口,老闆、員工亦好親切。豬扒麵$36 為普通貨色,麵底僅為飽肚之用,豬扒雖有香料醃製,略有香味,但肉質比較嚡,似乎過熟。

比較配合現場環境嘅係西多士$28,上枱時已分成9件,每件細細塊可方便進食,無需要再用刀切,幾細心。西多士表面有一小塊牛油,更特別之處係配上一小碟柚子醬,以柚子醬充當糖漿帶小清新感,比起糖漿配牛油無咁膩。



飲品方面,好多人都揀紅豆冰$25,大概係有平台介紹過,的確紅豆冰係比其他飲品快出餐。編輯挑選咗冰涼清爽嘅檸檬柚子蜜$22,不過不失;重有養生花茶$42,花茶有5款可擇,包括魔法森林、花園精靈、心靈物語、偷閒一刻、三花美顏茶、窈窕香茶,但就寫明全部孕婦都不宜飲用。

當中,花園精靈包含桂花、粉紅玫瑰花、蘋果花,有啖啖清香味,能調理經期、補升、潤膚,可減輕粉刺、青春痘,清香、香甜花草茶組合,適合任何時間飲用,每種花茶都有唔同效用,亦可以打卡,絕對係愛養生嘅女士必飲。

延伸閱讀﹕1.5小時北區邊境遊!上水賞壯觀鳳眼藍花海 穿越兩條河畔步道 走訪古洞河上鄉 人氣景點大水管/塱原濕地/博文學校打卡【2021賞花地圖】


E.A.Tips﹕

(1) 小店靠近上水河上鄉公廁,位置喺古洞河上鄉豆美味豆花團對面小路,搵到豆腐花店就會搵到對面嘅目的地。

(2) 乘搭小巴路線51K,可以於河上鄉鄉公所落車;小店離大水管只係約15分鐘步程,而離寶石湖邨則約25分鐘步程。

(3) 店內有得BBQ,可預約包場,詳情請參閱官方IG

(4) 小木屋內有少量食品、飲品,亦可以附近停車,但踩單車或步行會更方便。

(5) 留意小店逢星期一休息,而週末假期會比較多客人,需要等待比較長時間,早上會比較容易有室內座位,編輯實測下午2點半仍有少量花園戶外座位,其後瞬間滿座。

(6) 食物、飲品等候時間比等位時間更長,編輯實測由大概2點幾坐到5點幾,食物需等1小時先出餐,最先食咗一碗麵,再等半小時先飲到兩種飲品,最後半小時食咗一份西多士,足足需要2.5至3小時,連埋單需時3小時,似足食法國餐。所以建議趕時間唔好去,週末人多老闆反正做唔切,有時間先好去,否則盡可能揀平日去。

(7) 踩單車嘅話,可以將單車停泊於外面,但謹記唔好阻塞行人通道。


(8) 小花園戶外有好多蚊,但小店內有提供蚊怕水,可以進店詢問。


(9) 4小時燒烤套餐每位$188至$288,兩個人起,包炭、蜜糖、餐具、網、鉗,編輯唔講咁多啦,想知有咩食嘅話,Like Facebook PM再send餐牌你睇啦。

(10) 魚塘旁邊坡堤有唔少小花卉,記得要好好愛護,唔好隨意採摘。


(11) 店內雖然人手稍有不足,老闆似為興趣多於為做生意,唔需要不斷俾壓力佢哋。


何時 • 河地 Anytime • Anywhere

上水河上鄉公厠附近
星期一全日休息;星期二至日 12:00 – 19:00
6227 7168

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象