呢排小編成日喺app search良心店，兩個人行過尖沙嘴鬧市search到呢間素食店。上去試吓，素食嚟講，賣相同味道都好高質，部份整到似葷食嘅素食。有dinner set可以揀，由前菜到甜品逐個點，兩個人食好滿足！每人低消$200，不過成個套餐可以食到飽，拍拖去食都算幾抵食。
前菜﹕四喜烤夫、柚香紅菜頭蘋果拌合桃，酸酸甜甜幾開胃，左面烤夫似齋，右面蘋果好爽甜。
手卷﹕香芒牛油果苜蓿芽手卷
侍應特別提醒要盡快食，避免紫菜變淋，有別於平時啲手卷，用咗2塊紫菜包住，紫菜香脆無淋到。牛油果切條，味道清甜，芒果同樣切條，香甜味好突出，加上沙律菜好fresh。
餐湯﹕菠菜桃膠忌廉濃湯
小編覺得值得大讚係個餐湯，賣相綠色為主，湯嘅質感好creamy，有啲一粒粒固體狀嘅桃膠喺中央，桃膠可養顏，通常放甜品，今次放落餐湯幾新鮮，女士必飲！
主菜﹕白松露美國露筍南瓜紫薯鮮豆包焗千層闊麵，成層闊麵好大塊，有陣芝士香味，應該係素芝士，入面有露筍南瓜粒紫薯粒等，加上白松露香作點綴，絕對唔輸蝕於葷食。
可另加多款主菜菠菜野菌忌廉燴扁意粉，伴香烤茄子，都係綠色為主，以菠菜製醬汁，撈埋意粉後，掛晒汁醬，好有黏稠感。建議2個人食，1個人食可能會覺得膩。
甜品﹕椰香紫薯千層糕2件，糕點好清甜，完全唔甜膩，適合作飯後甜品。
飲品﹕紫貝天葵荔枝梳打，荔枝味比較重，唔算好甜，Mr E唔舒服，所以另加熱檸檬蜂蜜，仲有好多熱飲可揀，另加錢都唔算太貴。
紫貝天葵荔枝梳打 
熱檸檬蜂蜜
雅 ‧悠蔬食
地址﹕尖沙嘴金馬倫道48號中國保險大廈3樓B號舖
營業時間﹕11:30 – 16:30；18:00 – 22:30
電話﹕3706 5827
延伸閱讀﹕半百老牌冰室 必食超濃蕃茄湯+蠔油雞翼
延伸閱讀﹕尖東死場驚現文青咖啡店 藍莓味貝果勁煙韌
在〈尖沙嘴鬧市高質素食店 套餐抵食值得Encore〉中有 9 則留言
留言功能已關閉。