Vivienne Westwood Café 食到飽又可以打卡

Vivienne Westwood Café歎下午茶 食到飽又可以打卡



平時小編食tea set好少會食得飽肚,通常都係得個睇字,類似齋打個卡。但今次Vivien Westwood Cafe個Tea Set睇得之餘都可以食飽肚。得閒無事咁啱放假,就嚟名牌cafe扮下貴婦啦!Tea Set配茶/咖啡,兩個人都比較偏好花茶。

閨蜜揀咗Serengeti舒壓花草茶,有士多啤梨茶、菠蘿片、香橙片、向日葵花、藍葵花、天然草本香料,可以減淡黑斑同皺紋,減輕胃部不適,舒緩壓力,有助寧神安眠好瞓啲,呢款花茶味就由頭到尾都比較清,適合清淡人士。

小編自己就揀咗Sunrise Trip薔薇華爾玆,有士多啤梨、蘋果片、木槿、野薔薇子、香橙片、檸檬草、天然香料,含豐富維他命A+C+P,有助去除體內多餘油脂,防止皮膚色素沉殿+雀斑,有效增強抵抗力,而呢款花茶就比較濃,沖泡第一轉味好濃好清香好飲,但一沖泡第二次就即時變淡,適合好嚐鮮嘅人。

今次Tea Set鹹點有5款﹕
煙三文魚配手工麵包 – 三文魚大大塊麵包墊底,減低三文魚帶嘅魚脂味。
牛油果醬三文治 – 白麵包夾住沙律餡略嫌牛油果醬太少,只食到沙律味而食唔到牛油果味,比較呃秤。
英式鬆餅配奶油忌廉+士多啤梨果醬 – 鬆餅不過不失,個人偏好蘸士多啤梨果醬,酸甜味比奶油忌廉好,可減去鬆餅油膩感。
迷你手工蟹餅漢堡 – mini版漢堡包,入面係蟹餅嚟,蟹餅打得幾結實,有飽肚感。
黑松露醬炙燒帶子 – 下面係香煎麵包,上面係帶子粒,上面係黑松露,估唔到會咁大粒帶子,呢個算驚喜,黑松露鹹味+麵包淡味+帶子鮮味唔錯。

甜品仲有6款﹕
檸檬味馬卡龍 – 馬卡龍本身勁甜,檸檬味幾清香,中和咗馬卡龍超甜嘅味。
朱古力/士多啤梨慕絲 – 太甜膩,不了,上面舊白朱古力都還可以。
3件插咗旗仔嘅精緻蛋糕 – 中間以為係朱古力味,估唔到原來係咖啡味,幾驚喜,咖啡味好香。
雲呢嗱/朱古力雪糕 – 天氣咁凍,食雪糕真係別有一番風味…好鬼凍。

價錢偏貴,但名牌cafe算係咁上下價錢,拍拖或同閨蜜歎吓都適合嘅。

Vivienne Westwood Café
地址﹕銅鑼灣百德新街27-47號Fashion Walk 1樓F-8號舖
營業時間﹕12:00 – 21:00
供應日期﹕即日延長至2019年12月15日
電話﹕2799 5011
價錢﹕$588/2人

延伸閱讀﹕銅鑼灣潮流服裝店聖誕限定 Her x Hello Kitty Cafe

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈Vivienne Westwood Café歎下午茶 食到飽又可以打卡〉中有 2 則留言

留言功能已關閉。