2021-03-02

【2021賞花地圖】1.5小時從黃泥涌行到淺水灣 紫羅蘭山賞吊鐘花眺大潭水塘石橋

紫羅蘭山+賞吊鐘花+紫崗橋+淺水灣


春季來臨,又係時候準備吓賞花之旅啦!趁天氣未轉熱,唔少人都會去行吓山,但新一年唔少香港熱門山峰繼續比鬧市人煙稠密,今次就帶大家行吓相對比較少人選擇嘅紫羅蘭山,目前上山更加可以順道觀賞吊鐘花,賞花季節為期間限定,情侶拍拖兩個人記得要把握時機上山啦!

紫羅蘭山向來係吊鐘花熱點之一,其他地方如十二芴、大枕蓋都有,不過紫羅蘭山就係比較輕鬆嘅山徑。而紫羅蘭山高約433米,最高點有436米,路線稍短,但風景優美,從黃泥涌水塘作起點,沿衛奕信徑第一段走,穿過紫羅蘭山,連接淺水灣坳、孖崗山,可以直達南區淺水灣或赤柱範圍,沿途可眺望大潭水塘。

黃泥涌水塘公園一端為起點,會發現唔少人都會從黃泥涌水壩盡頭旁邊嘅紫羅蘭山徑或大潭郊遊徑進入,沿路的確可上紫羅蘭山,不過記者今次從前端另一道山徑為入口,路段由大潭水塘道轉入衛奕信徑第一段,可由大潭水塘道行到赤柱峽道,既近黃泥涌水塘,更靠近陽明山莊。

路段雖然有唔少上斜梯級,但只要捱過該段階梯,過咗標高柱後就多為下行梯級,步行20至30分鐘會到達紫羅蘭山山頂位置,沿路可隨時折返陽明山莊、黃泥涌水塘方向。上山路段樹木生長茂密,不時重有賞似竹林隧道嘅環境可以影吓相,而山徑景觀遼闊,沿山脊、泥黃山徑走,可邊望山望海,更可望壯麗大潭水塘景觀,完全零遮擋,天朗氣清時更可眺望柴灣、將軍澳、鯉魚門方向。

未經過山頂位置,都唔會見到吊鐘花蹤影,但只要穿過紫羅蘭山,走過驚險山路後,沿途會見到一組又一組吊鐘花,集中於紫羅蘭山,但分佈於山路唔同地方。吊鐘花出現於山頭之間,感覺係萬綠蕞中一點紅,每朵吊鐘花大概只有指頭大,花期集中於1月至3月,現時2月中旬仍生長得非常茂盛。

    

吊鐘花一般於農曆新年前開花,於新年盛放,故被稱為年花,曾經有「金鐘一響,黃金萬兩」嘅吉兆,英文名亦叫Chinese New Year Flower。吊鐘花又叫鈴兒花,花柄纖幼,而花朵呈粉色,相當嬌小,倒懸於花柄上,所以又被稱為倒掛金鐘、燈籠花。

不過,港英政府於百年前曾因吊鐘樹被嚴重砍伐,故立例禁止管有、販賣吊鐘,甚至納入《林務規例》,野生吊鐘受到保護,禁止非法採摘野生吊鐘,其後市民又認為吊鐘花嘅諧音「吊終」唔吉利,將年花改為桃花,更有「花開富貴」嘅吉兆。目前,新年想睇吊鐘花,只能到山野地方先有啦。事實上,沿路一直都有吊鐘花蹤影,唔需要只執著影其中一組,後段近分岔路口嘅吊鐘花配合夕陽光線會更艷麗。除咗吊鐘花,分佈山頭嘅重有大頭茶,花瓣呈白色,形成皺摺狀,先端凹,狀似雪耳,一朵朵獨立生長於山徑之中。

沿路再前行約30分鐘,會到達淺水灣坳紫崗橋分岔口,可望淺水灣方向,而紫羅蘭山徑同衛奕信徑第一段會於淺水灣坳、紫崗橋前匯合,山坳紫崗橋石牌位置大概只高約160米。紫崗橋可望深水灣、南朗山方向景色,甚至遠眺海洋公園、南丫島,左邊可前往大潭水塘,前行引水道則可通往赤柱,而上山路段則連接孖崗山,至於下行山路就係通往淺水灣嘅捷徑。


E.A.Tips :

(1) 乘搭巴士路線6,63,66,41A,76號,都可於黃泥涌水塘公園站落車。

(2) 可以自由選擇走紫羅蘭山徑或衛奕信徑第一段的大潭郊遊徑,兩條路線都係大概走30分鐘可到達紫羅蘭山分岔路口。

(3) 山徑沿途並無補給點,記得帶備充足糧水。

(4) 愛護環境,謹記自己垃圾自己帶走。

(5) 到達紫崗橋後,可以自由選擇左邊向大潭篤水塘方向走、前行往孖崗山方向走,又或沿孖崗山引水道行至赤柱峽道方向,甚至Short Cut嘅小山路直通往淺水灣方向。

(6) 愛惜花草,切勿採摘或破壞吊鐘花,影相還影相,眼看手勿動!

(7) 部份山路崎嶇不平,亦無圍欄,要小心安全。

(8) 吊鐘花生長於山路邊,位置大概係紫羅蘭山至紫崗橋之間路段,沿石梯向行下,會見到吊鐘花分佈於唔同地方。

(9) 落山往淺水灣方向嘅Short Cut路段以碎石路為主,需要小心,不過15分鐘內可直行到底。


紫羅蘭山

香港香港島南區大潭
24hours

紫崗橋

淺水灣孖崗山引水道
24hours

淺水灣

香港島南部,深水灣以南、中灣及南灣以北
24hours

Please Like & Follow & Subscribe /
歡迎讚好、追蹤、訂閱