沙田道風山嘅巨型十字架係近一年嘅熱門打卡點之一，但道風山路並非只係通往道風山一處地方，背後有一道隱藏嘅沙田郊遊徑，既可以直通城門水塘、針山，亦可以步行到火炭獅子亭，沿途既可觀賞沙田全景，初春時份更可觀賞吊鐘花，路段如同無人山徑，鮮見遊人，相當清靜，而且多為瀝青路同石路，適合拍拖兩個人遊覽。
由沙田市中心起步，穿過依山而建嘅排頭村，沿前往道風山嘅路線直走，20分鐘後經過道風山基督教蕞林入口處，道風山有逾90年歷史，係香港二級歷史建築物，風格有如中西合璧，可選擇入內參觀。折返道風山路，前行豹3分鐘會途經信義宗神學院，再向上步行約5分鐘，就會到達沙田郊遊徑山路入口。
延伸閱讀﹕30分鐘上道風山 睇巨型純白十字架連中式教堂
踏上沙田郊遊徑，步行約6分鐘會到達第一個分岔路口，不過只係行樓梯同行泥路嘅分別，只需一直靠右行，沿梯級上走，6分鐘後會到達一個小平台。依循前方樓梯級下行，約3分鐘就會到達另一個分岔路口，左邊林道為通往麥理浩徑第七段，方便前往針山方向，而右邊就係一段無人郊遊徑，可通往黃竹洋、城門水塘、火炭方向。
前方沙田郊遊徑可俯瞰沙田景色，沿途景觀大多無遮擋，位置海拔高約255米。大約步行約20分鐘，會到達另一個分岔路口，而該上行路段可通往黃竹洋、城門水塘，方便前往城門郊野公園。至於下行路段，則可通往火炭獅子亭。
春暖花開，沙田郊遊徑中途更可觀賞生長於山頭之間嘅吊鐘花，數量唔多，但總算萬綠蕞中一點紅。吊鐘花本身係一種新年年花，因為花期一般係1月至3月，通常喺新年前後生長得最為茂盛，故此被稱為年花。
而每朵吊鐘花呈粉紅色，相當細小，大概只有指頭咁大，甚為的骰，由於吊鐘花係倒懸狀態，亦有人稱為倒掛金鐘、燈籠花。雖然有人認為吊鐘花諧音有「吊終」意思，但事實上吊鐘花係吉兆，因為吊鐘花曾一度寓意「金鐘一響，黃金萬兩」，所以其實都係包含好意頭嘅年花。
延伸閱讀﹕【2021賞花地圖】1.5小時從黃泥涌行到淺水灣 紫羅蘭山賞吊鐘花眺大潭水塘石橋
由分岔路口下行約7分鐘，會見到排頭坑食水配水庫，係1981年嘅水務設施，依配水庫前嘅小樓梯繼續下行，10分鐘內就可以到達沙田火炭穗禾路，路口可見華翠園。
轉右繼續直行到底，從迴旋處轉左，於小路直入可以到達火炭獅子亭，步程僅約5分鐘。火炭獅子亭係全港8座獅子亭嘅其中之一，位處昂堂山上，至今建有40年歷史，可從較高位置環瞰沙田新市鎮全景，景色離涼亭不遠，恍惚伸手可及。
從中式涼亭對出觀望，沙田市中心至彭福公園一帶景色皆一覽無遺，難怪被稱為「沙田十景」之一，有如一個沙田瞭望台，無論日景定夜景都夠晒壯觀。美中不足係獅子亭位置難以觀賞日落美景，因為日落喺近後邊方向，被樹木同樓宇遮擋。
而穗和路亦可觀賞沙田至火炭一帶市區景色，包括沙田城門河畔，腳下樓宇高度不一，景觀開揚，比位處昂堂山山峰上嘅獅子亭似乎更壯觀，不過步行至山腳火炭工業邨就需要約30至45分鐘步程。
延伸閱讀﹕沙田獅子亭近下禾輋瞰市區全景 火炭半山豪宅群背藏配水庫秘道折返市中心
E.A.Tips :
❷ 道風山為靜修地，唔係遊樂場，請保持安靜。
❸ 道風山部份地方如神學院為私人地方，唔好隨便進入。
❹ 登上道風山，可從沙田鄉事委員會旁梯級上行。
❺ 沙田市中心有小巴路線69K直達火炭獅子亭，上車點位處排頭坑對面橋底，於總站渣甸山花園落車，車程約10分鐘，步行到盡頭即可從小路步入獅子亭，僅需1分鐘步程。
❻ 注意穗禾路沿途並無街燈照明，如果步行上落，要避免入夜行走，或者帶備電筒或頭燈。
❼ 獅子亭隔離為居住地方，謹記保持安靜，勿騷擾居民。
❽ 道風山正門有汽水機作補給點，獅子亭附近就無補給點或洗手間。
❾ 吊鐘花位置喺沙田郊遊徑旁邊，不過就離人有一段距離，千祈唔好為影相做出危險動作，皆因下面為懸崖。
❿ 賞花時謹記愛護花草，勿胡亂採摘。
⓫ 雖然沙田郊遊徑大部份都係石路、瀝青路，但都要小心步行，勿掉以輕心。
⓬ 可選擇乘搭迴旋處小巴路線811或811A，不過留意兩架車係分別前往沙田排頭村、第一城、石門方向，要小心上錯車，最好上車時問清楚司機目的地。
⓭ 折返穗禾路，經過穗和苑，直行到底就係火炭工業邨方向。
道風山基督教叢林 / 道風山十字架 / 基督教香港信義會道風山堂
大圍道風山路33號
09:00–17:00，
星期六日休息，
十字架則
24hours
沙田郊遊徑
沙田
沙田獅子亭
火炭穗禾路獅子亭
24hours
6036 1675