深水埗微舖高水準咖啡角落 Bagel三文治多重餡料配搭新鮮

現時，深水埗咖啡店數之不盡，對選擇困難症嘅人嚟講係比較困難。深水埗早幾個月曾被英國雜誌《Time Out》選做全球最型社區第3位，去行吓深水埗發現大埔道有一間大隱隱於市嘅日式咖啡店，空間極細小，咖啡質素有水準，都可算係隱藏鬧市中嘅一個咖啡角落。

目前咖啡店市場飽和，大多數Cafe都係重視食物多於咖啡，但呢間就主打咖啡，食物為副。室內雖狹隘，但裝潢簡潔，以灰牆、木質為主，配有插畫、乾花、本土裝飾佈置，視覺效果一流！蚊型舖位內只容納到兩個高枱櫈同兩個梳化位，大半作廚房用途，只有少量堂食座位，環境尚算寫意舒適，最啱兩個人忙裏偷閒拍拖飲杯咖啡放空吓。

店內似乎好重視咖啡質素，咖啡口味亦係10幾款，更有賣咖啡豆。實試一杯Cafe Latte、一杯Mocha，目前堂食以紙杯盛載咖啡，熱咖啡更有拉花。Mocha朱古力甜味適中，感覺幼滑，咖啡味濃，輕微苦澀味有回甘感覺，一早飲都夠醒神；Latte上層奶泡打得好，夠厚又夠軟綿，幾持久，唔會好快溶於咖啡內，入口滑溜，咖啡豆酸味較淡，咖啡烘焙味香濃。咖啡整體唔太重甘苦味，苦澀味較輕，入口順滑，酸苦味適中，幾醇、幾香。

輕食有Bagel貝果、All Day Breakfast、Croissant牛角包、意粉等，牛角包有2款口味，包括原味、朱古力榛子，而Bagel就有4款口味，包含原味、罌粟籽芝麻、紅菜頭、竹炭黑芝麻，其中一款幾特別，係韓式辣醬泡菜五花腩配紅菜頭Bagel，連咖啡一Set$78。Bagel被天然色素染得成粉紅色，皆因由紅菜頭汁同紅菜頭製成，輕微煙韌有咬口，偏向鬆軟，帶微甜味，烘過後表皮有輕微乾身。餡料有五花腩肉之餘亦配有泡菜，半肥瘦腩肉有油脂甘香感，但唔肥膩，有肉香，辣醬份量適中，令泡菜味道唔太辛辣，而且泡菜本身清爽，易入口又可中和辣味。

延伸閱讀﹕【2021賞花地圖】南昌公園黃花風鈴木綻放黃到金 2月搶閘開花迎接片片黃海

E.A.Tips﹕

(1) 餐廳雖採用即棄餐具，但據稱係可降解餐具。

(2) 小店空間有限，最好避開週末假期或食飯時間去，或者叫外賣。

(3) 位置靠近美荷樓、嘉頓麵包廠房、嘉頓山；由長沙灣道步行，腳程只係3至4分鐘。

(4) 據悉，House Blend咖啡豆有Nutty、Fruity任揀。

(5) 咖啡跟餐免費，加大就加$2。