2021-03-02

低難度vs高難度 東龍島兩條路線上山深度遊 (下)

低難度vs高難度 東龍島兩條路線上山深度遊

(1) (2)

延伸閱讀﹕低難度vs高難度 東龍島兩條路線上山深度遊 (上)

高難度路線﹕

從東龍洲公眾碼頭落船,沿右邊方向行,大概30至40分鐘可到達觀景台,隨時快過去元朗國,落樓梯可直達東龍石刻,折返觀景台時可作小休,位置景觀極開揚,可望對岸將軍澳風景,最啱拍攝全景。

返回分岔路段,想挑戰難度可繼續向前直行上山,再行30至45分鐘,沿途景觀開揚,海水清澈,可以繼續向去到一個超壯觀嘅懸崖,極有外國懸崖感!即使去唔到旅行,都可以望到同外國相似嘅懸崖群,不過要小心碎石路段易生意外。若仲有力氣,可前行分岔路,於右邊向下行,可前往鹿頸灣,路段比較陡斜,可到達最南端發射站同附近山崖,行完鹿頸灣亦需沿同一條路返回路段。

而分岔路嘅路牌並無向前行嘅指示牌,但都係水泥路段,其實向前行可以直上南堂頂,風景一望無際,有天涯海角之感,但路段就比較陡峭。離開南堂頂繼續向前行,盡頭會見到一座大型發射站,屬東龍島最高點,右邊會見到附近嘅直升機坪,方便救急或特殊情況使用,而直升機坪未有關閉嘅話可以稍作休息為打吓卡呢!

想返回山下路段,有兩個選擇,一係原路折返回程二係沿發射站旁邊繼續向前行,只需沿鐵絲網小心行走,會見到前面有一條小路,全條都係山路樓梯,崎嶇難行,山徑非常陡峭,而且枝葉櫃生,需要逐步緩慢蹲低而走,沿路可以返回營地同燒烤場方向。不過,此路段比原路折返碼頭需時更長,危險度亦高絕對需要裝備充足下先行,又或者由營地向上而走就比落山較安全。

而露營區可直接折返東龍洲北碼頭或東龍洲公眾碼頭後,東龍洲公眾碼頭左邊方向可到達洪聖古廟,位置靠近碼頭但人流較少,可以等候夠鐘上船。

想中途歎個下午茶,可以去比較少人去嘅新創意士多(魚仔),老闆自稱魚仔,非常健談。士多內最大特色係三層高西多士、洋紫荊雞中翼同全罐五香肉丁或回鍋肉麵!西多士絕對係極邪惡之選,同坊間西多士大有分別,不單有厚度,而且夾層有花生醬之餘,更有Nutella朱古力餡!而雞翼亦煎得好香口,灑有粗鹽,順道幫行山人士補充鹽份,至於全罐上枱嘅五香肉丁麵或回鍋肉麵,亦係市區少有見到嘅份量,補充體力之集亦好惹味。


E.A.Tips﹕

(1)走上山不時會見到懸崖峭壁,絕對要小心安全。
(2)東龍島山上屬無遮蔭之地,如要堅持上山,記得做足防曬準備同帶備充足水。
(3)上山後記得自己垃圾自己帶走,其實即使有垃圾桶都應該帶返出市區先扔。
(4)山上路段比較陡峭,記得要量力而為,唔好冒險,有需要就走回頭路返碼頭。
(5)出入東龍島需要乘搭街渡,而街渡可於鯉魚門三家村碼頭,每位價錢為$45 或靠近嘉亨灣嘅西灣河碼頭上船,每位價錢為$55,包來回船程,留意街渡只於星期六、日及公眾假期提供服務,同東龍島內嘅士多營業日子一樣。不過,大多數人都會選擇三家村碼頭,想容易進入或離開,小編建議可選擇西灣河碼頭上船,船程約30分鐘,上船後最好坐上層,風景好之餘亦唔會重機油味,不過有機會遇上大聲傾偈嘅八婆。
(6)謹記船程最後班次,要預留充足時間返回碼頭,最後一班船一般為17:30。
(7)東龍洲公眾碼頭比較接近石刻方向,而東龍洲北碼頭則比較接近東龍古堡同營地方向 (三家村出發之街渡不經北碼頭)。
(8)若想行晒兩條路線,建議朝早9點或10點出發,就有充足時間完成環島遊,否則12點出發就只能行一條路線。
(9)上山前經過士多,最好先查看有無充足水,可於士多先作補充,另外碼)頭附近、營地附近亦有洗手間。
(10)東龍島靠近市區,電話網絡接收得幾好,基本上唔會斷線,所以使用Google Map搵路都好方便,不過記得帶備充足後備電源。


東龍島

地址﹕清水灣以南

(1) (2)

延伸閱讀﹕低難度vs高難度 東龍島兩條路線上山深度遊 (上)

Please Like & Follow & Subscribe /
歡迎讚好、追蹤、訂閱