錦田百年樹屋被颱風吹冧 平湖雙池塘天空之鏡日落勝地

元朗錦田樹屋以樹形突出、樹中有屋聞名，係一棵逾100年樹齡嘅大樹，位處錦田水尾村，唔少人都會兩個人去樹屋打卡，但除咗樹屋，附近重有打孖上嘅雙池塘值得影吓相，堪稱港版天空之鏡，環境空曠，係黃昏時間拍拖睇日落嘅好地方。

• 

• 

• 

錦田樹屋以巨大老榕樹包圍石屋，靠近吉慶圍，有傳曾經係書齋，據悉建於明朝末，屬錦田鄧族所建，而屋主由清初下達遷海令起離開，樹齡逾百年，樹幹直徑為香港之最，2004年被列入《古樹名木冊》。樹屋本身包圍石屋，曾延伸到行人道同民居，早前石屋更被颱風山竹吹冧，淨返一株樹，令樹屋已成歷史。目前樹屋被圍欄封起，受到保育，樹幹、樹根縱橫交錯，有幾分老態，但不失壯健，人群只能從外面觀賞。目前現場所見，僅遺留少少磚牆、麻石門框等，已經二合為一，恍惚被吞噬般，僅睇到些微輪廓。

• 

• 

普遍人只留意到樹屋，平湖往往被樹屋風頭蓋過，係被忽略嘅靚景地，同樣位處水尾村、逢吉鄉之間，離錦田樹屋只係1分鐘腳程，一個田野般嘅地方靠近村公所、屬三級歷史建築嘅天后宮等。平湖由幾個池塘組成，從外面可同時拍攝雙池塘景象，平湖字面解水平如鏡，湖面的確平坦，可以輕鬆拍攝天空之鏡。

• 

• 

• 

• 

平湖位置空曠，靠近寧靜小村，既反映雲彩，亦微微映照大帽山倒影，亦可觀賞附近雞公嶺，令人心曠神怡。日落時份，更加係觀賞日落嘅好地方，色彩變化全部於湖中反映出嚟。從池塘可一邊望山景，另一邊望豪宅景，事物改變不免令人感覺有幾分唏噓。

• 

• 

• 

延伸閱讀﹕錦田隱世正宗泰國菜 平價濕炒河粉極惹味

延伸閱讀﹕錦田紅磚屋前身係蠟燭廠 室內市集52間小店驚喜尋寶

E.A.Tips﹕

（1）從錦田市中心大概步行約20至30分鐘可達錦田樹屋；亦可以乘搭601綠色小巴或巴士77K, 64K到錦田樹屋，上車點分別於元朗鳳翔路、港鐵錦上路站或錦田公立蒙養學校，可於北圍村落車；甚至直接自駕到附近錦田鄉村俱樂部或露天停車位泊車。

（2）沿路行入水頭村、水尾村，即可到達平湖同樹屋，平湖同樹屋之間隔咗一個水尾村遊樂場。

（3）樹屋位置比較多蚊，需要留意。

（4）入平湖小路同中間都無圍欄，要小心跣腳跌落水。
（5）謹記保持安靜，唔好騷擾村民。

---