食炸雞去邊好？曾經有連登網民提到呢間大雞排好食過豪大大雞排，曾經被淘汰過，目前仲有幾間分店，包括元朗、屯門、葵興，據網民指出，大雞大嘅炸雞以BB雞最惹味，即叫即炸，幼嫩又有肉汁，比X大大嘅炸雞排連鎖店更香口，但亦有網民提出相反意見，雞肉乾身之餘並非即叫即炸，到底實際味道如何呢？
All Day Combo以份量嚟講的確幾抵食，可以揀薈飯、泡飯、撈米線或湯米線，有四款醬汁同兩款湯底可擇，仲附上飲品同sweetie，今次送咗兩舊朱古力。招牌健美炸雞同80度低溫慢煮嫩雞都似乎係招牌，價錢只係40幾蚊，服務亦唔錯，而且戴晒手套整嘢食，同時係學生哥價錢，拍拖兩個人買兩個飯盒都幾方便同抵食。
其中一款係大滋味四喜套餐 $45，有BB雞或雞扒、魚柳、司華力腸、高麗菜、粟米粒，選擇微辣真係輕微辣度，容易入口，司華力腸味道偏鹹，似醃過或輕炸過，炸魚柳不過不失，炸雞比較乾身，雞肉尚算嫩，唔係嚡口，屬無骨雞，唔算太酒膩，唔算差，但並非網民提到咁高水準。比較欣賞係炸雞剪開一舊舊，細細舊方便食用，並非成舊上碟。
試埋另一款慢煮秘鹵清爽套餐 $44，有兩隻秘方鹵雞翼、鹵蛋、鹵司華力腸、高麗菜、粟米粒，相比炸雞，鹵雞反而比較有水準，雞翼以慢煮方式炮製，鹵得入味，唔會太鹹，色澤亦唔會太黑，而鹵蛋同腸都係鹹度適中，炸雞食多幾舊會滯，但鹵雞反而無滯嘅感覺，鹵雞比炸雞優勝。
一款選擇豬骨湯泡飯，另一款選擇蕃茄湯米線，泡飯不過不失，豬骨湯底為濃縮湯底，不過蕃茄湯底無論色澤定味道都好奇怪，可能唔揀有湯底會好啲。
E.A.Tips﹕
（1）分店位處商場內，座位唔多，外賣會比較方便。
（2）留意只收Cash，唔收八達通等電子支付方式。
延伸閱讀﹕平凡中顯不平凡 葵涌小店上海菜有水準
大雞大超級雞排
葵涌葵昌路72-76號活@KCC1樓111號舖
星期一至五 11:00 – 20:30；星期六至日 11:00 – 18:00
6816 9121
在〈一度被淘汰 網民熱推大雞大炸雞 鹵雞仲好食？〉中有 2 則留言
留言功能已關閉。