2020-12-02

重建發展十室九空 土瓜灣「土家」同你講故事

重建發展十室九空 土瓜灣「土家」同你講故事


2016年,市建局曾宣佈3個土瓜灣重建項目,以非全區重建方式將土瓜灣翻新,將愛華大廈附近幾條街道嘅舊樓拆卸重建,當中牽涉鴻福街、銀漢街、啟明街、榮光街,將變為小區規劃模式發展。2020年,記者現時再到土瓜灣視察,土瓜灣幾條街道已經十室九空,居民各散東西,人跡罕至,只賴低愛華大廈居民,仲有一間屬社區標誌之一嘅良心圈小店 – 一直保留區內痕跡嘅「土家」故事館。

記者今年初遊走土瓜灣時,發現區內有一間充滿歷史痕跡嘅「土家」故事館,原來屬區內居民嘅聚腳點。「土家」成員之一嘅阿彬兼任社交文化關注組職員,雖然並非土瓜灣居民,但對土瓜灣充滿熱情,2014年起同「土家」成員創立「土家」故事館。

阿彬表示,佢哋並非反對重建,只係反對市建局重建方針,認為市建局喺重建上有唔公義情況,並指出重建必須要好好規劃。故「土家」同其他舖頭、團體成立一個關注組,不單同市建局抗衡,亦關注土瓜灣重建問題,發現好多街坊同舖頭亦有同一狀況,已經接到律師信並必須離開,關注組亦一直同市建局傾緊關於重建嘅賠償方式、安置方式,甚至要求提供清拆時間表等。

「土家」前身其實只係一間叫「昌興雞鴨」嘅小舖,正對大門可清晰睇到有一個古舊白底紅字嘅招牌。從現場所見,牆身、地磚、坑渠都好有街市嘅感覺,室內好多裝飾都係清拆後搬到「土家」,令「土家」逐漸變成中心據點。而「土家」由6年前到現時格局,已經集合咗唔少充滿故事嘅雜物,例如茶餐廳嘅卡位於2019年搬到「土家」,又如門口嘅L形玻璃櫃來自「土家」斜對面嘅財記百貨,亦有40幾年歷史,通通因重建而被「光榮結業」。

阿彬稱,「土家」希望以舊舖頭嘅物件嚟講吓故事,為街坊、遊客講吓土瓜灣嘅故事同歷史,同時關注保育,類似灣仔藍屋,皆因藍屋曾有「留屋留人計劃」重置居住藍屋嘅人,亦會不時做有質素嘅展覽,唔少藝術家都可進駐藍屋展覽。相比土瓜灣重建發展,阿彬指當時藍屋情況好得多,政府介入之餘,除咗社區文化關注組,亦有好多團體幫助,非常難得,保育後亦曾得聯合國一個保育大獎、香港建築師學會一個建築大獎。

室內突然衝出一隻超萌小貓咪,原來係一隻泰國貓,小貓全名叫「Sawadeekrap」,「土家」眾人同街坊都會稱牠為「阿Krap」。可愛嘅小貓咪係附近街坊不時擺入「土家」,眼仔碌碌嘅「阿Krap」僅3個月大,有啲怕人,亦有啲嬌嗲,不時依偎阿彬同街坊懷中,似足一隻「吉祥物」,祝福前途未卜嘅土瓜灣。

「土家」故事館由3個團體合組而成,包括社區文化關注組、維修香港、聖雅各福群會,「土家」源自土瓜灣故事館,為居民提供一個社區公共空間,留低土瓜灣區內故事,小小空間不時有展覽、工作坊、講座,聚集一眾街坊。至於「土家」未來狀況,阿彬表示會留守到最後,但最終一定會搬遷,希望揀返土瓜灣,實際會再同「土家」、其他團體成員同街坊再傾,因為「土家」呢幾年因活動而聚集咗唔少街坊鄰里,已並非只係機構之間營運,而係屬於街坊嘅空間,令街坊都可以話事。

延伸閱讀﹕土瓜灣書店連文青Cafe 穿越舊區第二度都市空間

延伸閱讀﹕土瓜灣藝術村 齋Hea好去處

延伸閱讀﹕土瓜灣小公園涼亭延伸出海 神秘浪漫粉紅橋打卡

「土家」故事館

土瓜灣鴻福街16號地下
13:00–18:00
2762 1500 官方Facebook按此

愛華大廈

土瓜灣榮光街29-33號

Please Like & Follow & Subscribe /
歡迎讚好、追蹤、訂閱