2020-08-09
Pizza Monster

土瓜灣平價夏威夷薄餅 限定心形Pizza最啱戀人紀念日



土瓜灣餐廳種類唔多,主要人流係區內街坊,馬頭圍道有間新開張約半年嘅Pizza店,比起連鎖店價錢較平,最特別係限定6吋心形Pizza,絕對係拍拖必食,夠晒浪漫!

Pizza店位處馬頭圍道,原店位置原來喺青州街,係一間街坊小店,半年前搬到馬頭圍道,綠色為主調夠晒搶眼,搭巴士沿路輕易見到。室內裝潢簡單,不時播放新潮音樂,設計新穎之餘,牆身木板裝飾亦帶有幾分工業風,招牌設計係描繪怪獸食Pizza,以Pizza、炸雞、烤雞、意粉、焗飯、小食、沙律為主,普遍價錢迎合街坊,意粉或焗飯可配餐湯或餐飲,職員亦比較親切,可以兩個人去歎迷你批,亦可以多人聚會食大批,有6吋、9吋同12吋任擇,好過次次食連鎖店嘅。

據網絡評價,炸雞同烤雞係招牌之一,惹味烤雞 $17/件,價錢同KFC一樣,份量大細差唔多,有檸檬味或麻辣味,表皮檸檬味唔算重,檸檬片僅為裝飾點綴,反而底部有檸檬醬汁墊底,令烤雞略帶酸甜味。雞皮幾香,雞肉幾厚,同KFC相比明顯滑嫩得多,唔會太油膩,加上檸檬味好fresh,略有juicy感。

要飽肚就一定係叫焗飯或焗意粉,招牌肉醬焗意粉 $57應該係最穩陣之選,肉醬同芝士份量充足,入口有微量肉碎感,味道濃郁,意粉乾爽煙韌,軟硬適中,微微芝士味唔會膩。

挑選咗一款千島海鮮夏威夷薄餅可任揀6吋$62、9吋$127或12吋$157,基本醬底有千島醬、蕃茄醬、特色醬,而戀人拍拖去嘅話,一定要試一試限定供應嘅心形Pizza,迷你批為6吋,兩個人食剛剛好。Pizza放於心形模具內,比普通Pizza多咗幾分浪漫感,好有少女心,的確幾靚!Pizza內顏色、材料都豐富,有辣肉腸、魷魚、蟹柳、菠蘿、青椒、洋蔥、肉碎等,加埋可製出芝士拉絲嘅香濃芝士,手製餅底煙韌感較重,幾厚身,唔係脆感,反而係鬆軟感,好處係唔會太乾。而千島醬幾清新,略帶微甜,味道唔算好高質,但同連鎖店比無咁鹹。Pizza底有啲麵包感,同一般嘅Pizza唔同,只能講係飽肚。

e.a.tips
(1)可以用手機落單,比叫店員落單更方便。
(2)外賣自取有優惠。
(3)只得6吋Pizza先有心形Pizza,其他呎吋一般為圓形或方形。

交通﹕乘搭巴士於馬頭圍道落車,馬坑涌附近落車,步行2mins即達。

Pizza Monster 薄餅怪獸

地址﹕ 土瓜灣馬頭圍道418號樂意居地下2號舖
營業時間﹕ 11:30 – 21:30
電話﹕ 2330 3810
地址﹕ 土瓜灣馬頭圍道418號樂意居地下2號舖
營業時間﹕ 11:30 – 21:30
電話﹕ 2330 3810

Please Like & Follow & Subscribe /
歡迎讚好、追蹤、訂閱