2020-08-04
城門谷黄槿花

城門谷點只睇荷花 7月優雅黃花限時打卡



夏天唔知去邊好?熱辣辣唔想行太多路,又想去戶外行吓,不妨去公園賞吓花啦!荃灣城門谷公園係香港著名公園之一,位處大窩口以北,靠近象山邨同石圍角邨,主要分南園同北園,一般會用作消閒之用,除咗可以兩個人去做運動或散吓步,其實仲可以拍拖賞花兼打卡㗎!

荷花盡開時,靚到不得了,每逢6月至7月,都係城門谷公園嘅荷花賞花期,園內特設一個荷花池,不時吸引攝影發燒友影相。荷花又叫做蓮花,為蓮科蓮屬,原產自亞洲太平洋熱帶,目前大多遍佈熱帶地區,一般為生宿根水生草本植物,伸出水面有大概米五高,花朵主色為粉紅、白、紅,底部荷葉甚大,而蓮蓬則為荷花嘅花托。

事實上,荷花嘅花期只有大概一個月,而城門谷公園嘅荷花會喺6月至7月於荷塘上盛開,位置喺可遮陰嘅涼亭旁邊,近距離由塘邊拍攝荷花,應該可以輕鬆自製長輩圖同蓮蓬圖。

嫌荷花池太多人?其實城門谷公園最近仲有另一種同樣花期好短嘅優雅黃花,外觀呈橙黃色嘅小花,花蕊則為深紫色,數量唔多,偏細小,花期為7月至8月,同樣大概只有一個月花期,打卡都要睇準時間呀!

呢種優雅嘅黃花稱為黃槿,懸掛於高高樹上,企於樹下不時會中頭獎,細小黃花不斷緩緩落下,唔用長鏡頭一樣可以捕捉細小黃花嘅優雅姿態。

黄槿花瓣、花冠呈黃色,中心為深紫色,質感平滑,接觸時會感覺到無毛,為倒卵形、鐘狀,學名為Hibiscus tiliaceus,又稱為黄木槿、港麻、桐花、朴仔等,為木槿屬,花朵為聚傘花序,大多花形細小,但部份有半個拳頭咁大,一般花柱清晰,為雄蕊柱,高約4至7米。

小小花朵其實對台灣海邊好有用,係一種可防風同防潮嘅樹種,而黃槿原產自東半球熱帶地,一般亦生長喺平地、濱海區,而黃槿葉同樹皮亦有作用,可治支氣管炎同咳嗽,葉可治腫毒,亦可作洗滌劑,根更可解熱,甚至作催吐劑。雖然據稱有以上作用,但有事記得要向註冊醫生查詢呀!

e.a.tips
(1)位置超級多蚊,一定要帶備蚊怕水。
(2)黄槿花位置大概喺運動場至兒童遊樂場同長者健體園地中間,旁邊有停車位。
(3)除咗上述靚花,其實小小休憩地方都可以係打卡位,其中一處小涼亭佈滿花草,小花延伸,十足十平時咖啡店嘅花海打卡位。

交通﹕巴士32/36/32M/43X、小巴82M/81M/94 均可到達,可由南園或北園進入。

城門谷公園

地址﹕ 荃灣城門道21號
開放時間﹕ 南園 06:30–23:00;北園 全日開放
電話﹕ 2413 9665
地址﹕ 荃灣城門道21號
營業時間﹕ 南園 06:30–23:00;北園 全日開放
電話﹕ 2413 9665

Please Like & Follow & Subscribe /
歡迎讚好、追蹤、訂閱