2020-08-04
香港JW萬豪酒店

香港JW萬豪酒店貴婦級High Tea 爽歎鮑魚龍蝦沙律鴨肝醬



JW萬豪酒店 貴婦級 High Tea【按圖睇片】
{"popup_fix":"false"}

絲打們同閨蜜聚會通常會去邊呢?最常見嘅當然係去酒店High Tea啦,一間環境優雅嘅酒店,加上一個令人垂涎嘅英式下午茶,最啱同閨蜜齊齊打卡呀!

幾個月嚟被疫情籠罩,五星級酒店防疫措施固然未有鬆懈,大堂樓底極高,盡頭有全列落地大玻璃,景觀開揚,採光度高,坐窗邊梳化位更舒適,影相一流!

位處金鐘嘅香港JW萬豪酒店,座落太古廣場,三層架下午茶極吸睛,以鏡面設計,更顯高貴大方,矜貴鹹點配精緻甜品,係 6:6 黃金比例,絕對係貴婦級Afternoon Tea,可以舒舒服服享受一個下晝。

Welcome Drink有杯桂花香芬冰茶,桂花帶有清香味,飲落微甜,似蜜糖或冰糖,加上一粒冰粒,冰凍感加香甜味,幾爽甜。英式鬆餅Scones係Afternoon Tea必備之一,今次有原味同提子味,配有兩款果醬同德文郡奶油,鬆餅影完15mins相仍略有微溫,牛油味濃,入口偏結實,咬入去都鬆軟,表面似麵包輕烘嘅感覺,內裏輕輕濕潤。

鹹點食材超矜貴,總共有6款,唔單止有必食嘅鮑魚撻,仲有芒果龍蝦沙律配魚子醬虎蝦春卷配甜酸汁鴨肝醬多配蜜瓜及無花果醬提子多士西班牙黑毛豬火腿配鮮無花果芝士麥法包日本桃太郎蕃茄配話梅汁

Afternoon Tea有鮑魚係幾驚喜,鮑魚撻軟腍香脆並存,撻皮似油皮,鮑魚入口煙韌,鹹度適中,有鮮甜味;鴨肝醬好香、好creamy,滑溜、綿密口感配搭蜜瓜粒幾清爽,多士同鴨肝醬之間仲有提子片同無花果醬,幾新鮮;最頂層仲有虎蝦藏於春卷內,蝦肉偏淋,不過算大隻,春卷皮被酸甜醬汁浸到軟,失去香脆感。而中間一層就有龍蝦沙律以小杯盛載,龍蝦肉份量唔少,爽口彈牙又鮮甜,再以香甜芒果墊底,仲有微量魚子醬,但魚子醬味道唔明顯;西班牙黑毛豬火腿好有鹹香味,法包同火腿之間以無花果芝士分隔,唔太膩,但無咩特別;反而最唔起眼嘅蕃茄更特別,話梅汁令蕃茄更能帶出酸甜味,入口好清新,幾開胃醒神,亦可以用作解膩之用。

甜品亦同樣有6款,款款精緻,包括黑加侖子松露朱古力士多啤梨慕絲、菠蘿芒果撻、柚子朱古力杏仁蛋糕、榛子慕絲、紅桑子黑朱古力慕絲,唔同水果帶出唔同甜味,但似乎過於甜膩。

紅桑子黑朱古力慕絲頂頭有一塊紅色小牌,印有代表酒店嘅JW字樣,小牌為紅桑子口味,底層以雲石朱古力片包裹黑朱古力慕絲,內層朱古力偏苦,而且好甜膩;榛子慕絲夾層入口似足金莎朱古力,欣賞榛子味道濃郁,比黑朱古力容易入口;柚子朱古力杏仁蛋糕上面以楓葉狀白朱古力作裝飾,外層為薄朱古力,內層則為普通蛋糕,蛋糕質感紮實,無咩柚子味;反而黑加侖子松露朱古力有幾分驚喜,外層為薄脆朱古力,內層就係提子、松露,入口綿軟,中間提子味幾香甜。至於以士多啤梨為形狀嘅士多啤梨慕絲,質感輕軟,微微士多啤梨味,甜膩感相對較輕,入口會溶化;而菠蘿芒果撻上層狀似啫喱,但偏甜,下層custard隱藏芒果粒粒,反而無咁甜膩。

飲品只得4款Tea WG茗茶,包括English Breakfast Tea、Earl Grey、Jasmine Tea等,亦可以揀Graffeo Coffee 即磨咖啡,咖啡上枱味道超濃香,咖啡味撲鼻,苦澀味比平時嘅咖啡重,鍾意齋啡嘅咖啡迷一定要試試。

e.a.tips
(1)如果飲得酒,拍拖去可以另加Moet & Chandon香檳一杯會更浪漫,平日每位$368、兩個人$668,周末假期每位$388、兩個人$688。
(2)第一層為鹹點,由頂食到落底,最尾係甜品。
(3)留意Dress code一般為Smart Casual,唔使太Formal,但唔好失禮。
(4)可以上官網訂位,而匯豐卡或恒生卡亦有9折,不過最好先打電話問問職員仲有無優惠價錢。。

交通﹕太古廣場留下有電車站、大量巴士線,而乘搭渡輪可經中環天橋輕達金鐘,腳程約20mins,經太古廣場可直上酒店。

小編講吓嘢﹕

Miss A覺得今次Afternoon Tea鹹點比甜品明顯出色,甜品好甜膩,得個睇字,只適合齋打卡而唔食嘅朋友,而鹹點唔止睇落矜貴,的確真係入得口,好多款都好惹味。

The Lounge (香港JW萬豪酒店)

地址﹕ 金鐘金鐘道88號太古廣場香港JW萬豪酒店大堂
營業時間﹕ 星期一至四 08:00 – 00:00;星期五至六 08:00 – 01:00;星期日 08:00 – 00:00
電話﹕ 2810 8366
地址﹕ 金鐘金鐘道88號太古廣場香港JW萬豪酒店大堂
營業時間﹕ 星期一至四 08:00 – 00:00;星期五至六 08:00 – 01:00;星期日 08:00 – 00:00
電話﹕ 2810 8366

JW Marriott The Lounge Afternoon Tea For Two

供應日期﹕(1)星期一至五;(2)星期六、日及公眾假期
供應時間﹕15:30 – 18:00
價錢﹕(1)每位$268、兩個人$468;(2)每位$288、兩個人$488

Please Like & Follow & Subscribe /
歡迎讚好、追蹤、訂閱