2021-02-25

中環人氣法式薄餅 鹹甜任揀口味正宗

Café Crêpe


選址中環威靈頓街嘅加拿大過江龍Café Crêpe,為唔少絲打嘅人氣Tea之選,有鹹有甜,款式多多,款款即叫即整,不妨約埋閨蜜去Tea一Tea啦!

Crêpe係法式薄餅,蛋香味十足,入口煙煙韌韌,鬆軟餅底配合自選餡料,適合鍾意嚐鮮嘅朋友。據悉,Café Crêpe為加拿大過江龍餐廳,主打法式薄餅,創辦人曾於法國讀書,並研究正宗法式薄餅,喺美國、加拿大都有分店,中環店為亞洲首間專門店。

目前餐廳門口為開放式廚房,Crêpe製作過程清晰可見,向內走就係座位,燈光偏昏暗,幾有氣氛,疫症期間以膠片分隔座位,可以放心同知己好友聚會,拍拖或同閨蜜兩個人Tea吓都唔錯。

挑選一杯咖啡配搭Crêpe係一個恰當嘅選擇,Cappuccino $32 奶泡厚而綿密,咖啡味濃郁,入口略帶苦澀味,大口飲啖奶泡加咖啡,再配搭甜味法式薄餅,幸福感滿滿之餘,亦可解膩。

Frappuccino’s冰冰樂亦係幾特別嘅飲品,試試Golden 黃金冰冰樂 $58,有Maple或Turmeric口味,Turmeric係薑黃味,可能未必係個個啱飲,但就好啱嚐鮮,薑味唔算濃,尚算易入口。據悉,薑黃富含澱粉質、纖維、植物性營養素,薑黃素有助抗氧化,可改善血糖、血脂,達減肥目的,薑黃仲可以減低病原體入侵呼吸道。

Crêpe鹹甜都有好多款,任君選擇,鹹味法式薄餅挑選咗辣肉腸、蝦配白車打芝士 $119,由於餅皮即叫即整,特別鬆軟,餅皮煙韌,入口軟綿綿,餡料有辣肉腸同蝦粒,配合白車打芝士,蝦粒爽口,辣肉腸同芝士鹹香味好突出,層次幾豐富,幾足料,一般女仔食一舊基本可以飽肚。

而甜味法式薄餅就挑選芝士蛋糕味 $89,有5種口味任揀,包括可配草莓、黑莓、藍莓、香蕉、伯爵茶,小編係Strawberry迷,當然揀Strawberry啦!Crêpe上枱睇到內餡好飽滿,塞滿一片又一片草莓,似足法式水果薄餅,香軟餅皮配搭新鮮水果,草莓帶有鮮甜味,好fresh。

e.a.tips
(1)先食鹹味再食甜味是常識吧。

交通﹕乘搭電車或渡輪到中環,向蘭桂坊方向行,腳程約5至10分鐘,搭巴士去中環會更方便。

延伸閱讀﹕香港JW萬豪酒店貴婦級High Tea 爽歎鮑魚龍蝦沙律鴨肝醬

Café Crêpe

地址﹕ 中環威靈頓街15B號地舖
營業時間﹕ 星期一至五 10:00 – 21:00;星期六 10:00 – 18:00;星期日及公眾假期 10:00 – 21:00
電話﹕ 2907 1888

Please Like & Follow & Subscribe /
歡迎讚好、追蹤、訂閱