先睹為快！元朗公園5月鳳凰木紅花盛放

[sp_html5video category=”2221″]

春季過去，並唔代表賞花之旅結束，5月都有好多花值得觀賞，包括5月開花嘅鳳凰木，於元朗公園先聲奪人。踏入元朗公園，好多5月花朵開花，包括兩個品種嘅雞蛋花，仲可以清晰睇到鳳凰木盛開，密密麻麻又紅彤彤嘅大紅花朵開滿樹頂，公園瞬間被染紅，鳳凰木燦爛開花時勁搶眼！

雞蛋花花語係孕育希望，有復活、新生之意，雞蛋花出現，代表對未來充滿美好期望。至於鳳凰木花語就係離別、思念，鳳凰木同時有成功同開始之意。鳳凰木同雞蛋花同時出現，到底係咪意味此時此地抗疫抗爭將會成功？

延伸閱讀﹕大尾督單車路賞花 5月雞蛋花優雅現身

英文名為Flame of the Forest嘅鳳凰木，據悉來源係由於曾經有一位航海家途經一個海島，眼見森林內鳳凰木開花，霎時整個山頭都被染得通紅，就稱為森林大火。而鳳凰木又叫做紅影樹、金鳳、火鳳凰、紅火楹、火焰木等，樹葉同有藍影樹之稱嘅藍花楹相似，花期為5至6月，每年開花時都會火紅一片，而呢段時間通常係學生考試季，令人將兩者串連，所以亦有騰雞花之名。

鳳凰木花朵有五瓣，五花分離，中間有一塊蜜標、五花萼、十雄蕊、一雌蕊，而十雄蕊代表鳳凰木為蘇木科。鳳凰木為賞花喬木，原產地喺馬達加斯加，而世界各地熱帶同亞熱帶地區都有栽種鳳凰木。鳳凰木嘅樹齡只要長達五年就會開花，一般種植於市區，因樹枝容易折斷，復原能力較弱，不適宜郊區空曠地方種植，大家可以試圖留意鳳凰木開花時，唔同地方會有唔同程度嘅紅色。