旺角砵蘭街茶記轉做石燒牛
兩個人醫吓肚,  和你Taste,  西式

旺角砵蘭街茶記轉做石燒牛? 新鮮蒜汁夠香濃



都會坊餐廳 (旺角砵蘭街) 茶記轉做石燒牛? 新鮮蒜汁夠香濃【按圖睇片】

靠近朗豪坊位置發現一間西餐廳,門口有幾分茶記感覺,室內不失格調,座位之間有一定距離,卡位有充足空間,整體價錢尚算合理。

翻查資料,餐廳疑由普通餐廳轉為扒房,餐牌亦同之前有分別,發現之前嘅餐牌普遍都為茶餐廳類別菜式,但而家餐牌就以石燒牛為主打,難道轉型為西餐廳?由港式茶記轉為西餐廳,喺餐飲業嚟講的確係有挑戰。

又再食石燒牛扒,旺角嘅石燒牛扒果然特別多,今次又試一試全新餐廳,石燒牛有六款任擇,仲有一款石燒羊架,每款可由100g至400g任揀,價錢由78蚊至338蚊不等。點選咗200g牛小扒,另加20蚊有套餐,餐湯、飯、意粉、沙律薯菜、餐飲可五選三。是日餐湯係忌廉白湯,餐湯偏杰身,幾滑溜同有幾分creamy,餡料加咗火腿絲同粟米,帶有幾分甜味同微鹹味,椰菜絲沙律比較清,而蒜蓉包幾香脆,好重蒜香味。

牛小扒上石燒好吸睛,配搭日式牛肉汁更香口,配菜薯角亦香脆,內餡軟綿綿。將牛小扒放上石燒上,塊石溫度充足,放上枱熱辣辣,燒咗一段時間仍然出煙,可以將牛肉肉汁鎖緊,保持juicy感覺,好有牛味,質感無牛柳咁軟嫩,比較有咬口。而牛肉同脂肪層層分明,入口有豐腴油香,呢種牛小扒比較少見,蘸牛肉汁更香口。

另外仲有200g嘅美國極黑毛豬,由黑椒汁轉咗蒜蓉汁,豬肉比牛肉更軟腍,相對濃味嘅牛小扒嚟講,味道較清,表面有些微香草味,清清哋嘅黑毛豬肉配搭新鮮蒜蓉汁就極適合,蒜蓉汁似係自己打出嚟,有粒粒生熟蒜,味道好香濃,既有熟蒜香味,又有生蒜辣味,攪勻形成蒜蓉汁,值得推介!黑毛豬一般餐飲配搭係日式茶飲或綠茶類,今次配紅茶都好適合,而可樂只係3蚊罐。

e.a.tips
(1)基本人均150蚊,石燒牛扒可以直接用紙點餐。
(2)石燒牛扒唔好燒得太熟,最多大概六至七成已經好足夠,否則就唔夠軟嫩。

延伸閱讀﹕油蔴地雙層咖啡店勁寫意 珍寶牛角包啖啖牛油香

延伸閱讀﹕台式風格早餐店 油蔴地小巷超厚蛋吐司

延伸閱讀﹕旺角唐樓隱藏樓上Cafe 姊妹Gathering好地方

延伸閱讀﹕Harry Potter迷你主題Cafe 9 3/4月台活靈活現

延伸閱讀﹕登打士廣場樓上Cafe Gathering之選

都會坊餐廳

地址﹕ 旺角砵蘭街128號地下
營業時間﹕ 07:00 – 02:00
電話﹕ 2771 2000
地址﹕ 旺角砵蘭街128號地下
營業時間﹕ 07:00 – 02:00
電話﹕ 2771 2000

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!