疫市留港！大角嘴歎邪惡Burger 宛如置身外國

[sp_html5video category=”2019″]

武漢肺炎導致大家無辦法四圍飛去旅行，留喺香港其實一樣可以感受到異國風。呢間位處大角嘴嘅200呎微舖主打漢堡包，最啱想食快餐嘅朋友。曾經被評選為香港最佳漢堡店之一，喺深水埗同大角嘴都有分店，今次終於有機會試一試。

室內裝潢滿滿心思，設計相當有外國style，甫踏入店舖即感受到另一番景象，同門口外嘅香港街道截然不同，適合兩個人或三五知己坐低食快餐，疫市拍拖搵食都可以試吓呢啲異國風小店呢。不過，餐牌上嘅burger都係香港人口味，而且全部即叫即製，點餐後需要等候一陣。抗疫期間更提供消毒用品，仲有膠手套提供，方便之餘亦可以喺好衛生嘅情況下進食漢堡包。

特級黑松露和牛漢堡 $103 據介紹所寫，以秘製黑松露醬配120日香煎草飼和牛漢堡，包含煎蛋、日式焙燒芝麻醬同意大利provolone cheese。驟眼看，黑松露配和牛已經極吸睛，令人垂涎，上枱時更香和牛味。漢堡包表皮有微微焦香感，入口輕脆，內裏質感柔軟，鬆軟麵包加上黑白芝麻點綴，唔單止成舊脹卜卜，而且食落啖啖芝麻香。

和牛質感軟嫩，幾厚吓，而且先香煎過，所以滿滿油脂香，咬落去勁爆餡，肉汁四溢好juicy，絕對極邪惡！極香和牛味之餘，散發啖啖油脂香，意大利provolone芝士味好香，而黑松露醬同日式焙燒芝麻醬都係點睛之筆，令和牛漢堡包香味昇華。另外，餡料仲有半生熟煎蛋、洋蔥絲同翡翠豆苗，好特別。

特式燒大菇漢堡 $58 疫市Home Office得太耐，有啲人可能會肥咗，如果唔想食咁邪惡嘅Burger，都有其他選擇，食Burger都可以揀啲無咁肥膩嘅，以香蒜燒大菇配車打芝士，加上秘製洋蔥絲和蘑菇絲，一大舊啡菇同大大塊蕃茄作餡，加上夾層有炒香咗嘅洋蔥絲同磨菇粒，厚度同其他漢堡一樣，感覺好健康，素食者都好啱。