元朗↔天水圍 尖鼻咀 沙橋村 日落秘地 邊境路線 (驚現小彩虹!)
兩個人影吓相,  新界,  神秘之地

【邊境一日遊】尖鼻咀濕地5分鐘登龜山眺后海灣 沙橋村蠔殼田絕美夕陽餘暉

瀏覽次數: 55
個人瀏覽過





天水圍米埔濕地係眾所週知嘅地方,只不過唔係一般人能夠隨便進入嘅地方,其實米埔旁邊亦有一個值得拍拖兩個人前往參觀嘅好地方。從地圖上可見,尖鼻咀毗鄰米埔濕地,整道海邊步道能眺望北方,海面水平如鏡,內有一個只需5分鐘步程就能登頂嘅超矮小山峰,不遠處更有一個非常適合觀賞夕陽西下靚景嘅蠍殼田,景色比流浮山更壯觀,兩端可以來往天水圍至元朗。

延伸閱讀﹕流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物

延伸閱讀﹕嫌鴨仔坑泥灘多人?隱藏版皇冠郵筒起步!帶你徒步白泥日本鎌倉風海堤眺夕陽

從元朗起步,只需要一程小巴路線,就可以直達尖鼻咀邊境,落車位置靠近迴旋處,始後小巴會掉頭,故尖鼻咀及龜山路段必須步行進入,更方便好玩嘅方法係從元朗或天水圍踩單車進入,皆因路面直長,而且夠寬闊,的確會比步行而至更輕鬆。

只需要沿深灣路繼續前行1至2分鐘,就會抵達尖鼻咀后海灣觀察點,該位置開始已經係海旁步道嘅賞景地,本來係旅遊巴站,亦有唔少停車格,可以俯視尖鼻咀濕地,亦可眺望后海灣,甚至深圳高樓大廈,對岸嘅繁華熱鬧與本地嘅荒蕪、清幽環境構成強烈對比,兩岸相距一個深圳灣,對岸深圳公園紅樹林亦清晰可見。

轉頭一看,會發現停車格背後有一道直長小樓梯,一隅豎立咗一個石碑,寫有「唐夏寮」,更有介紹字句。樓梯直長,粗略計算為256級,頂端只有一座涼亭同一支超矮標高柱,涼亭上寫有唐夏寮字樣,原來「唐夏寮」地標指嘅就係呢座涼亭,至於呢支標高柱又係咩意思呢?

事實上,你大概估唔到5分鐘步程嘅路線,原來係一座位處新界大西北嘅尖鼻咀小山峰,名為「龜山」,而尖鼻咀原名亦統稱為「龜山」,據悉係因為山形似「龜」。不過,龜山山頂標高柱僅有約70米,四面八方被綠樹環抱,雜草叢生,草叢既高且密,只係隱約透視少許后海灣風景,基本上係全無景色可言。唔少人曾控訴唐夏寮涼亭只係走樓梯,頂端全被樹蔭遮蔽,根本無景可睇,又多蚊蟲,但其實該涼亭位置並非一個觀景亭,只係一個觀鳥亭,換言之係觀鳥地方,反而景色並非重點。

尖鼻咀龜山本身前臨后海灣,位於流浮山以東,米埔自然護理區以西,香港濕地公園以北,位置既有紅樹林、濕地,亦係觀賞鷺鳥好地方,曾經被評為具特殊科學價值地點,亦係米埔內后海灣「拉姆薩爾濕地」一部份。翻查資料,尖鼻咀濕地連同米埔及內后海灣濕地有約千五公頃,係世界重要濕地之一,同時係本地自然保育區,皆因早於1995年已經獲《拉姆薩爾公約》封為「拉姆薩爾濕地」,而1997年至2005年,香港曾經漁農自然護理署資助而有「拉姆薩爾濕地保育計劃」,以促進長遠護理工作、善用濕地資源、推廣濕地保育訊息。

后海灣濕地本身就吸引300多種候鳥,優良生態系統令該地有「雀鳥天堂」之稱,不過既然夏天候鳥群飛可賞,位置亦無景可觀,倒不如於山腳逗留,景觀更遼闊。一直繼續依循海邊步道走,向尖鼻咀警崗方向前進,縱然只係短短3分鐘步程,你會發現路段風景優美,海面平靜,水面輕易形成鏡面倒映,一幅幅天然風景畫盡現眼前。

呢段海邊步道既可遠眺米埔自然護理區濕地、深圳灣公園紅樹林自然保護區,亦能直視深圳市南山區,甚至連深圳最高嘅摩天大樓平安金融中心亦清晰可見。據了解,大廈高度有約593米,亦係世界最高摩天大樓五甲,幾乎超越天際線,到底呢個係咪一個值得驕傲嘅紀錄呢?講返本地風景,從海旁下瞰,會發現不遠處有一道小橋,天穚嘅盡頭有一間白色小屋,本來以為可以下行,原來該位置被尖鼻咀警崗封鎖,唔容許前進,該警崗有指用作監視或反偷渡用途,海旁路段雖然無耐之前開放,但鐵絲網圍欄背後仍然係禁區,千祈唔好以身試法。

轉入小路後,大直路初段可見「雀鳥圖解」,予本地人了解「拉姆薩爾濕地」,但如果要繼續前行至天水圍濕地公園方向,需要經過輞井圍村落地方,可能會有麻煩,故此編輯唔太建議。若然想走呢段路,我哋比較建議前往另一端元朗豐樂圍方向,然後於盛屋村離開,以腳程計需要至少約20分鐘。

延伸閱讀﹕【2021賞花地圖】近期大熱!5月鳳眼藍季節 元朗超大魚塘藍紫色花海限時賞花

既然盛屋村豐樂圍魚塘已經介紹過,編輯決定原路折返,帶大家前往另一端更神秘嘅黃昏絕佳賞景之地。只要折返原路,經過小巴總站起步點,中段不單會經過農地、養豬場,亦會聽到大量狗吠聲,一端你會發現有一個狗場。事實上,狗場係一個2008年成立自今嘅動物收容所,名為「Kelly Animals Shelter」,為本地保護動物組織。據悉,小店係專門照顧及收養流浪或被遺棄嘅動物,翻查資料內有百幾200隻流浪狗需要打理,有如動物庇護中心,店方曾與著名嘅「連寵拯救隊」合作義賣活動。縱然編輯係怕狗之人,對狗隻基本毫無愛心可言,但呢個的確係值得支持嘅團隊,真正愛護動物應該係身體力行,而唔係只係大叫「好可愛呀」又或者給予狗隻人類食物。有種人對動物只有表面嘅愛,有種人對動物卻有無私嘅愛,分別在於前者唔會真實捐錢或領養,甚至只係得把口支持兼鬧人唔愛動物,一旦牽涉到自己利益就放棄一切堅持,後者卻默默做支援,保持初心。

10分鐘後會到達沙橋上灣公廁,中段會經過沙橋村南園,其後會有三個路口,第一個係沙橋村上灣入口,第二個係沙橋村下灣入口,而第三個就係我哋建議進嘅分岔路口,距離公廁僅5分鐘步程。前行2分鐘,就可以直達沙橋村海旁,路口可見賣蠔豉嘅「陳祥記」,故海邊同流浮山一樣,地下滿佈蠔殼山,直入自然會走過一塊塊蠔殼田。

尖鼻咀主要眺望北端風景,沙橋村海旁位置偏西面,可環瞰后海灣一帶風景,亦可眺深圳灣大橋,更能觀賞絕美夕陽西下景緻,無敵海景嘅日落景觀與流浮山無異。沙橋村海旁一帶環境清幽寧靜,吸引部份攝影發燒友專程前往拍攝黃昏日落風景。

沙橋村海邊正對西端,同流浮山、白泥一樣,都係一年四季可以觀賞黃昏夕陽餘暉嘅好地方,后海灣與深圳灣大橋亦清晰可見,分別在於相對僻靜。天朗氣清時,海面上夕陽景觀壯麗得非筆墨能形容。

沙橋村渡頭石橋一端係紅樹林風景,另一端則為養蠔之地,雖然只係剩低少數蠔戶,但海旁仍舊滿佈蠔殼,走過蠔殼田,會發現蠔殼田上嘅夕陽美景配搭紅樹林,其實畫面更有趣味。編輯當日較早前落咗一小場雨,發現位置亦可以望到彩虹,雖然折射出嚟嘅彩虹唔算好長,但畢竟係兩隻嘢初次見到彩虹啊!




E.A.Tips :

❶ 新界區專線小巴路線35號可以直達尖鼻咀,留意小巴會先入輞井圍,之後會轉返出深灣路,小巴會喺尖鼻咀迴旋處掉頭,所以走嘅時候盡可能前啲等車。

❷ 小巴會同時經天水圍、元朗市中心。

❸ 前行至流浮山深灣路沙橋村沙橋下灣公廁後再經上村、下村,第三個路口就可以直入沙橋村海傍。

❹ 尖鼻咀有兩部汽水機可作補給。

❺ 尖鼻咀深灣路不時會有大型卡車或貨車經過,盡量要靠邊走。










尖鼻咀

  • 流浮山深灣路
  • 24hours

唐夏寮/龜山

  • 流浮山深灣路
  • 24hours

沙橋村

  • 流浮山深灣路
  • 24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


中環鬧市3條街有6個T形街牌 1幢建築物有4個街牌通通近蘭桂坊?
驚現外賣版Omakase?上水超抵食日式定食店款款外賣限定 專用碗放有蝦茶碗蒸便攜又「靚仔」
老闆娘係姜糖?大角嘴全新兩餸飯店有驚喜 近30款餸任揀三餸飯僅$37!
深水埗黃竹街2間小食店僅幾步之遙 即試黑椒牛漢堡Crossover和牛牛丸
重陽去拜山!上水出發經沙嶺公墓直闖麥景陶碉堡 圓嶺仔一河之隔眺羅湖口岸
旺角鬧市3塊超古老T形街牌探究 快富街/黑布街/奶路臣街成區內碩果僅存舊街道
【野餐隨行】筲箕灣道2間餐廳毗連炸雞店電車站 直闖大浪灣泳灘沖浪勝地野餐
樓上咖啡店自選高水準五品料理!旺角西洋菜南街神秘角落點只賣咖啡綠茶
【野餐隨行】大埔商場便攜素食便當/一口雲吞蝦籽麵 元洲仔全海景公園Chill住歎咖啡
上水Homy Cafe 9月尾結業 咖哩雞扒香口惹味 上水千萬公廁旁小公園野餐
【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?
太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?