香港西端舂坎角泳灘賞絕美夕陽餘暉海水清澈見底完勝赤柱沙灘西環兒時回憶傳統餅店月餅預告【野餐隨行】

踏入8月，代表已經係盛夏季節，同時象徵夏天逐步進入倒數階段，拍拖兩個人去玩水絕對係不可或缺嘅活動，但獨木舟、直立板、風帆等多數都要付費，沙灘就變成免費嘅消暑活動，而邊個沙灘值得去呢？eatwo曾經推介過好幾個康文署正式泳灘，剩下嘅重有一個毗鄰赤柱嘅舂坎角沙灘，海水清澈，而且位置正對西面，黃昏時份可以觀賞夕陽西下靚景。至於去沙灘食乜好？其實沙灘都可以係一個野餐嘅地方，今次編輯就喺西環一間傳統餅店買港式西餅，適逢中秋即將來臨，順就買兩件月餅做個預告，有關月餅巡禮2022詳情請參考eatwo Facebook或網站。

經一程電車到中環，再轉乘一程巴士，就能夠前往赤柱方向，落車後下行5分鐘，就能夠到達舂坎角泳灘。落車位置係舂磡角道迴旋處，左邊可以前往舂坎角公園、舂坎角炮台，背後小路為連接赤柱嘅赤柱馬坑公園，下行就能夠前往舂坎角泳灘。經過御濤灣豪宅後，盡頭就有舂坎角泳灘指示牌，只要穿過茂密林木，下行樓梯就會到達舂坎角海灘兒童遊樂場，前行就係舂坎角小區內唯一沙灘。

事實上，舂坎角泳灘係康文署正式泳灘，亦係南區其中一個沙灘，但由於望落交通不便，而且相對淺水灣等沙灘少停車位，故此沙灘人流無咁多，只係據編輯現場觀察，真正落水嘅人唔算多，黃昏時份嘅人流比較多，大多係為觀賞日落而嚟。

位於西環小街道內嘅「華爾登餅店」一直屹立香港近40年，乍看來平平無奇，2019年憑屬於香港人嘅獨特金句月餅爆紅，夠晒破格，幾年來突然受到歡迎，曲奇、散水餅都係當中受年輕人喜愛嘅產物。但事實上，呢間屬傳統餅店之一，有嘅係細個屋邨留下小型餅舖嘅風味，所賣嘅港式西餅都充滿懷舊感，多個款式係新式餅店難以找尋得到，滿載童年回憶。

快樂蛋糕$6 英文註明為Happy Cake，到底有幾快樂？蛋糕模樣等同傳統嘅紙包蛋糕，基本無乜分別，只係蛋糕表面印有獨特圖案，是次係連登豬同Pepe圖案，可愛非常。紙包蛋糕只係賣$6，都算係微利同對得住良心，蛋糕軟身，內裏較鬆散，較為乾身，唔係略有濕潤嘅蛋糕，都算有蛋香，但唔太重，蛋味重啲更好。

除咗紙包蛋糕，港式西餅款式唔算多，但款款都幾獨特，包含當日見到嘅傳統三角朱古力$12、傳統菠蘿果Jam Cake$10、有個凸起心形兼叫煙囪餅嘅荷蘭撻$13、叉燒批$15、雞批$15、牛油核桃蛋糕$10、核桃酥$6、香蕉蛋糕$10、朱古力粒粒蛋糕$10、牛油核桃提子蛋糕$8、吞拿魚批$15、皮蛋酥$7、鮑魚酥$6、椰撻$8等。三角朱古力蛋糕都算係細個必食嘅蛋糕，款式簡單，蛋糕結實，唔會太甜，係一款就算唔嗜甜都會食嘅蛋糕；而吞拿魚批拎上手香氣撲鼻，餡料爆滿，表面酥香十足，內裏軟腍餡料黏稠而唔油膩。

平時月餅多數要預訂，又或者成盒買，餅店內有部份迷你月餅可以逐件買，好似夾麵包咁自由夾起，但就只有兩款口味，包含原隻蛋兼白蓮蓉月餅$40、綠茶豆沙蛋黃月餅$40。更特別之處，係小店老闆娘係「姜糖」，故每年都會有Mirror、Error 16子嘅月餅，最初更受到16子fans歡迎，不過當日見到真係除咗「姜糖」月餅，其他15子嘅月餅就只供打卡用，並無售賣。月餅水準不過不失，比較適合小試月餅嘅人，雖然係迷你月餅，但蛋黃夠大粒，起碼有半舊鹹蛋黃，好有蛋黃香，外圍嘅蓮蓉唔算太甜膩，而綠茶味月餅雖然青綠色調搶眼，用豆沙取代蓮蓉係有啲驚喜，但綠茶味好似唔夠濃郁，兩者都係偏乾身。

步入沙灘，沙粒並非幼細，甚至叫做好粗糙，落水時仍然感覺踩上沙粒好嚡，沙灘海岸線唔算長，有指全長只有約169米。以環境保護署資料顯示，舂坎角泳灘一直都維持於「良好」水平，而當日則見到處於「一般」水平，只不過海水仍然甚為清澈，能夠清晰望到水底，淺水區甚至可以見到魚仔游泳。不過，舂坎角泳灘與貝澳泳灘相反，貝澳沙灘行好遠都好淺水，而舂坎角沙灘行幾步水已經好深。

舂坎角泳灘位處赤柱海角，正對香港西端，可以眺望銀洲、南丫島，甚至海洋公園機動遊戲設施，同時係觀賞夕陽餘暉嘅好地方，沙灘雖然有巴士直達，但唔算太便利，亦不利駕車人士，仍然稍為有住隱蔽同偏僻嘅特點，所以仍然尚算寧靜嘅沙灘。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 必須注意，來往中環嘅巴士路線只有6X先可以前往舂坎角泳灘，其他往赤柱嘅6、260都唔可以抵達舂坎角泳灘。

❷ 餅店只容許以現金支付。

❸ 餅店支持減塑，其實最好自備架生。

❹ 沙灘內有小食亭、燒烤爐。

❺ 沙灘係正式泳灘，但屬舊式沙灘，故淋浴設備設於更衣室、洗手間外，男女共用。

❻ 舂坎角泳灘正常救生員當值時間為09:00至18:00，星期六日為08:00至19:00。

❼ 沙灘水較深，一步可能已經深好多，所以要特別小心安全。

❽ 除咗6X，其他巴士路線65,66號、小巴路線16A、16M都可以到達舂坎角泳灘。

EATWO

Miss A

【區區有小店2024】坪洲2間尚存本土餐廳推介！鑊氣炒飯／貓咪Cafe／菠蘿包雪糕｜坪洲美食推薦2024

兩個人旅吓行

專題

E.A.Tips :

舂坎角泳灘

華爾登麵包餅店