Toolss 石硤尾公園
Cafe 咖啡店,  兩個人影吓相,  兩個人醫吓肚,  和你Taste,  野餐隨行

【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵

瀏覽次數: 34
個人瀏覽過





要搵一間好餐廳唔容易,如果要求嘅係池畔、叢林、無人打擾,加上日式美食,應該三至四位數字走唔甩,行到邊食到邊係我哋宗旨,今次編輯就帶大家去一個同時符合呢個項要求嘅地方用餐,不單可對住叢林用餐,而且靠近池邊,兼且少見人群,加上預先於同區購得嘅靚靚日式便當,原來呢個地方只係一個普通市區公園?

九龍塘食肆唔多,唯有行過少少去隔離石硤尾搵,石硤尾區內以白田購物中心週圍選擇較多,當中有一間小店以文具店為題,位處近JCCAC嘅街角,由門面風格到室內,都恍如台灣文青咖啡店。編輯向來好討厭扮文青嘅咖啡店,咖啡水準參差不齊,好多只係靠某啲相似裝修矇混過關,甚至係文青到過晒龍,比較似偽文青咖啡店,深水埗區內多數咖啡店就係佼佼者。

而石硤尾呢間咖啡店以「Toolss」命名,以文具為主要設計風格,擺明以文青咖啡店作招徠,以大窗戶設計,外望街道風景,但又設計得恰到好處,感覺唔會過火,店內一面牆身有多款來自各地嘅精美文具、充滿意思嘅書本,文具可懷緬過去仍然用文具嘅時光,有時間亦可以翻閱吓書本,店內嘅書本都算值得一睇。

石硤尾公園係區內最大而又最廣為人知嘅公園,基本上分成南面同北面,南面前身更加係舊時戰後嘅木屋區部份。如果要到北面嘅水池部份野餐,就要穿過石硤尾公園體育館隔離條斜路,經過公園網球場,就自然見到粉色系水池同粉色系牆身嘅韓風IG打卡位,位置其實靠近九龍塘香港城市大學。

早前,石硤尾公園內呢個粉色系水池係恍如一個廢棄部份,但現時注入水源,恍惚回復生氣,水池既有人工瀑布,亦有池塘。如果細心啲留意吓,會發現水池內係有噴泉裝置,只不過並無開啟,咁噴泉裝置其實又有咩意思呢?

平常咖啡店賣嘅嘢食同咖啡都係比較貴,但店內都有外賣抗疫意粉,每份$48,雖然款式只係普通卡邦尼意粉、忌廉雜菌意粉、青醬蜆肉意粉,飯盒設計一式一樣,都係靚靚日式外賣盒設計,相當四正,加$20至$25有冷熱Latte

咁貴少少呢?今次編輯就挑選兩款,包括羅勒忌廉蟹肉意粉$88、醉雞卷手撕雞麻醬伴蕎麥冷麵$98,兩份都以同一款小木盒盛載,望落四正又得體,如果齋講個盒,可媲美大角嘴嘅御守壽司。

羅勒忌廉蟹肉意粉,旁邊伴有沙律菜,而蕎麥冷麵嘅芝麻醬另上,故亦可以用作拌勻沙律菜,令味道提升。意粉份量適中,頂論灑有大量羅勒碎,忌廉醬唔算多,故唔會好膩口。意粉旁邊伴有蟹肉碎,略有單調,比較適合將兩者混合再放入口,美中不足係意粉上層較乾,下層較油。

醉雞卷手撕雞麻醬伴蕎麥冷麵就係醉雞卷加手撕雞做餸,加上伴有芝麻醬蕎麥冷麵,食物唔算矜貴,就簡單材料,反而係設計心思上係會加分,美觀之餘亦好user-friendly,擺盤真係一流,除咗木盒食餐盒,編輯見到店內都有用木餐具同紙飲管。麵底份量亦唔少,冷麵微涼,行咗10分鐘之後變得有啲黏,所以必須伴隨芝麻醬,蕎麥麵本身係略帶煙韌感,麻醬冷麵入口開胃,適合悶熱天氣時食用。

另外,手撕雞伴有爽脆青瓜絲,旁邊則有醉雞卷,就係一份雞肉冷麵便當。手撕雞、醉雞卷嘅雞肉都好軟腍,前者僅微鹹,略帶清爽,而後者酒味係香,上面有粒杞子,不過酒味就略嫌唔夠醇,有少少酒嘅澀味。

水池注入水源,不單令廢棄水池復甦,亦令環境美觀,水池中更有一個小叢林,其實好多事物本來就有好設計,只係大家唔識得珍惜。坐喺水池邊用餐,恍惚身處一個池畔叢林餐廳,更有瓦遮頭,毋須曝曬,不時有涼風吹過,而且唔需要預約或額外收費,邊個話野餐環境差過堂食?

延伸閱讀﹕九龍塘公路邊舊筆架山火車通道 百年歷史煙墩山隧道有幾神秘?




E.A.Tips﹕

❶ 食店近白田購物中心,步行至石硤尾公園約10至15分鐘步程。

❷ 石硤尾公園下面部份會行少啲,但如果要行到上面部份,人流會較少,環境會較好。

❸ 池畔叢林位置為石硤尾公園上面部份,近歌和老街入口。

❹ 巴士路線2B,2F,86C都可以到達石硤尾公園歌和老街入口,而2B, 2E, 2F, 86, 86A, 86C, 87B, 886, 214 則可到達南昌街。

❺ 謹記公園內要保持安靜,勿喧嘩騷擾他人。

❻ 記得用餐後垃圾要放入垃圾桶內。

❼ 店內現時仍有外賣抗疫意粉$48,款式係普通卡邦尼意粉、忌廉雜菌意粉、青醬蜆肉意粉,加$20有熱Latte,加$25有凍Latte。

❽ 店內聽聞係寵物友善餐廳。

❾ 食物即叫即做,等候時間可能比較長。


TOOLSS

  • 石硤尾偉智街38號福田大廈地舖
  • 星期一全日休息;星期二至日11:00 – 21:00
  • 3954 5135

石硤尾公園

  • 深水埗南昌街270號
  • 24hours
  • 2777 1540

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


中環鬧市3條街有6個T形街牌 1幢建築物有4個街牌通通近蘭桂坊?
驚現外賣版Omakase?上水超抵食日式定食店款款外賣限定 專用碗放有蝦茶碗蒸便攜又「靚仔」
老闆娘係姜糖?大角嘴全新兩餸飯店有驚喜 近30款餸任揀三餸飯僅$37!
深水埗黃竹街2間小食店僅幾步之遙 即試黑椒牛漢堡Crossover和牛牛丸
重陽去拜山!上水出發經沙嶺公墓直闖麥景陶碉堡 圓嶺仔一河之隔眺羅湖口岸
旺角鬧市3塊超古老T形街牌探究 快富街/黑布街/奶路臣街成區內碩果僅存舊街道
【野餐隨行】筲箕灣道2間餐廳毗連炸雞店電車站 直闖大浪灣泳灘沖浪勝地野餐
樓上咖啡店自選高水準五品料理!旺角西洋菜南街神秘角落點只賣咖啡綠茶
【野餐隨行】大埔商場便攜素食便當/一口雲吞蝦籽麵 元洲仔全海景公園Chill住歎咖啡
上水Homy Cafe 9月尾結業 咖哩雞扒香口惹味 上水千萬公廁旁小公園野餐
【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?
太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿