元朗燒味人龍店賣燒鵝燒鴨叉燒塞爆飯盒一盒雙拼飯低至$30平過酒樓！

瀏覽次數： 23

個人瀏覽過

元朗有一間不時大排長龍嘅燒味店，就算無長龍都長期有小人龍，各款燒味應有盡有，到底咩葫蘆賣咩藥，點解會一直咁受歡迎？當中，燒味飯係街坊價錢，單拼飯最平$28，雙拼飯低至$30，每盒飯塞爆飯盒，隨時平過兩餸飯，而質素亦算不俗，本土情侶拍拖兩個人都應該係值得一試。

店名本來叫做「忠輝燒味專門店」，但門面招牌卻寫有「新忠輝燒味專門店」，編輯為咗確認店舖，到達門口時仍一再翻查，結果就令自己變成不幸之人，睇埋落去你就會知道點解。位置確實為舊店地址，而頂端招牌的確寫有「忠輝燒味專門店」，只係下方門口招牌多咗個「新」字，如果資料有錯，煩請讀者指正。

店內有多款燒味，一如坊間燒味店，包含有乳豬、燒鵝、燒鴨、香妃雞、豉油雞、燒腩骨、燒肉、燒腩仔、叉燒、燒骨、豉油皇乳鴿、滷味，從玻璃窗透視一隻隻油光十足嘅燒味，色澤紅潤油亮，更有燒焦香味，排隊時確實令人垂涎，燒味果然係香港地道美食之一。當中亦有外賣飯盒，每一盒飯都塞得飽滿，無論飯量，抑或燒味量，都填滿飯盒空間，足以飽肚，果然係良心店，絲毫不吝嗇。

夜晚時份，燒鵝固然已經售馨，就只能夠從剩低嘅燒味中選擇，先選了一盒燒鴨髀飯$42，編輯留意到幾乎每一個客人都會加隻鹹蛋$4，即管跟上隊形，添上原隻鹹蛋。燒鴨表皮令身，鴨皮上嘅油光顯得似反光，皮薄微脆，肥瘦均勻，髀肉亦係比較滑嫩，美中不足嘅地方係無提供酸梅醬，因為酸梅醬可以減低油膩感。

每一盒白飯都已經澆上店內嘅豉油，豉油並非帶鹹，反而係略有甘甜味，適宜撈飯，拌上燒味之後，每舊燒味本身都帶有油脂感，白飯自然可以中和當中嘅鹹度同膩感。

編輯於排隊其間，一直注視玻璃窗另一端嘅燒味情況，發現燒腩仔仍然有一舊，當時前面只剩低兩個人，以為坐定粒六可以叫燒腩仔雙拼飯。驀地，前方女士忽然一句「四盒燒腩仔飯」，編輯馬上狀似被雷電瞬間擊中一樣，心裏盤算起嚟，該舊燒腩仔可以分成五盒飯嗎？

結果，喺剩低仍然能夠選擇嘅燒味當中，就只有燒鴨、香妃雞、滷味、四寶飯，故只能選香妃雞拼燒鴨飯$30，價錢比酒樓賣嘅更平。相對燒鴨髀飯，雙拼飯嘅當然唔係鴨髀肉，多為胸或背肉，肉質較實，但都算唔錯，而雞肉亦算嫩滑，配搭蔥油不過不失，始終係揀淨嘅幾款，心裏面始終覺得無招牌貨燒鵝、叉燒、燒腩仔咁出色，食唔到嘅隔離飯始終係香啲。

E.A.Tips﹕

❶ 忠輝燒鵝專門店位處建威大廈地下6號舖，只係門口招牌多咗個新字。

❷ 燒腩飯單拼$60、雙拼$65、拼鵝$70，燒鵝飯單拼$44、雙拼$49、拼腩$70，腩仔飯單拼$35、雙拼$40、拼鵝$55，雞髀飯$42，鴨髀飯$42，四寶飯$42，單拼飯$28，雙拼飯$30。

❸ 加雞全翼$6/隻，加鹹蛋$4/隻，加底加$2。

❹ 想有選擇嘅話，一定要早啲去。