陳舊藍屋搵唔到入口？筲箕灣隱藏版炸雞Pizza即叫即製正過連鎖店高水準脆意雞10間分店竟淨1間！

好多人拍拖兩個人出街搵食，通常都會睇裝潢或睇人氣，而店舖方面亦會保持簇新裝修，筲箕灣就有一間藍色小店，開業多年，目前外形極為陳舊，連射燈都無，令店面更顯灰暗，若然唔係刻意尋找，的確唔會發現呢間隱藏版炸雞店，方才知道原來係漆黑中嘅螢火蟲。店內套餐由主食到小食，以至西湯都巧花心思，主打嘅炸雞、Pizza明明甚有水準，甚至比連鎖店高得多，偏偏好多人寧願去連鎖店都唔選擇其他小店，難怪10間分店淨返1間啦！

所謂藍色小店，因為係一間外形以寶藍色小屋設計嘅小店，位於大街小巷轉角處，打斜望落狀似一間藍色牆身嘅小屋，其實係藍皮黃心。從筲箕灣道搵入口，望咗幾分鐘都搵唔到入口，亦唔覺有開門，以為已經打烊，但原來小店門口並非位處大街，而係小巷內。

脆意雞亦叫Pizzapie，一直以嚟都係本地品牌，開業多年，有指之前係芝脆雞姊妹店，Pizzapie本來前後有10間分店，但目前2022年就只淨低一間分店，位於筲箕灣道。從外面觀察，店面係一間藍色小屋，但極為殘舊，幾乎封塵，而且射燈欠奉，更顯暗淡無光。但事實上，食物水準同裝潢係唔係成正比，一試就知龍與鳳。

店內餐牌有4款大胃王餐，亦有2款輕便套餐，當中有輕便套餐B $135，包含迷你批一個，亦可於意粉、焗飯、小食、3件炸雞中揀選兩款，更可於2罐飲品、2客餐湯、1客蒜蓉包中揀選一款，合共5樣嘢，睇落好似唔多，但原來份量都唔少。另外，加$20可轉配一款小食百里香燒豬排骨，又或者加$12轉吉列海鮮籃、香辣雞翼、和風拼盤、韓風柚子雞翼。

Pizza可以選擇千島海鮮醬底、特色醬底、蕃茄醬底，迷你批係一款6吋Pizza，兩個人食都算足夠，千島海鮮底令人胃口大開，內有洋蔥、青椒、菠蘿、蟹柳、蝦、魷魚、蜆仔，餡料豐富，入口有陣陣烘烤香味。Pizza餅底原來有別於平常嘅薄批，而係恍如麵包嘅餅底，相對一般薄批，表面雖然微脆，但餅底較鬆軟，真係似足麵包。

以千島醬配搭菠蘿等材料，感覺恍如熱情如火嘅夏威夷風情Pizza，酸酸甜甜嘅千島醬配搭帶有鹹味嘅蝦、魷魚、蜆仔，加上Juicy感重嘅菠蘿，青椒、洋蔥點綴，色調豐富之集，的確有幾分清新。Pizza雖然只有6吋，但材料都算充足，平舖整塊Pizza面。

炸雞係店內另一款招牌作，套餐中包含3隻炸雞，內有1隻上髀、2隻下髀，炸成金黃色嘅上下髀賣相美觀，比連鎖店嘅縮水雞髀明顯大隻又厚肉得多。即叫即炸嘅炸雞有別於預先炸定，上手熱焫焫，沿途香噴噴，真正香氣撲鼻，拎到返屋企仍然暖笠笠。

雞皮都保持酥脆，炸粉唔太厚，表面有少少牛油香，雞肉亦算嫩滑，啖啖肉之集，內裏亦有肉汁，並非乾柴雞髀，亦非連鎖店嘅軟皮炸雞髀。連鎖店嘅炸雞比較重味，而呢間嘅炸雞會較淡味，但就唔會咁鹹，亦唔係好油膩。所以，炸雞都可以有替代品㗎！

套餐附送兩款自由選擇嘅西湯，分別係羅宋湯、粟米忌廉湯，即紅湯、白湯，當以為餐湯只係類似罐頭湯質素，原來內有乾坤。羅宋湯牛味濃郁，牛肉都有幾舊，加上蔬菜都好足料，而忌廉湯黏滑稠身，內有粒粒粟米，唔算濃味，有少少香甜。

意猶未盡可以加$12點選一款芝士蛋糕，有原味、抺茶味、朱古力味可擇，Size嚟講係偏少，不過就算只係原味芝士蛋糕，都有濃厚芝士味，蛋糕實淨，入口軟腍。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ Pizza Pie 脆意雞原本有10間分店，但9間分店已經結業，原本地址分別係
紅磡青州街3號紅磡花園地下D舖、
粉嶺新運路33號粉嶺中心C座地下1C-1D舖、
西環石塘咀加侖臺8-16號嘉利大廈地下B舖、
屯門青凌徑華興大廈地下A舖、
屯門新安街16號百勝工業中心9樓A室、
將軍澳寶林道康盛花園商場地下G4-5號舖、
馬鞍山恆信街2號富安花園商場1樓S2號舖、
新蒲崗景福街83-97號昌泰大廈地下1號舖、
牛頭角定安街75號定興大廈3號地舖，
而目前只係淨返筲箕灣筲箕灣道273號地舖嘅筲箕灣分店。

❷ 除咗可以打電話2904 8644 叫外賣，而家可以WhatsApp 預先落單，選擇外賣自取，Whatsapp 號碼為 5488 6380，落單後需要等待回覆確認，堂食或自取有9折優惠。

❸ 加$20可轉配一款小食百里香燒豬排骨，又或者加$12轉吉列海鮮籃、香辣雞翼、和風拼盤、韓風柚子雞翼。

❹ 本身一個12吋大批$115，9吋普通批$99，6吋迷你批$58。

❺ 有大脆雞套餐、小氣雞套餐，裏面都係炸雞配一款小食同汽水。

❻ 想平啲都有平價飯麵餐$43，意粉、焗飯為主，配上餐湯或飲品。

❼ 下午茶餐價錢約為$35至$51。

❽ 由筲箕灣巴士總站步行而至，只係約5分鐘步程。

❾ 小店係橫巷側門進入，筲箕灣道係無得進入。

❿ 所有食物都係即叫即做，尤其係炸雞、Pizza，所以等候時間會較長，一般要等待約30分鐘。

❿ 小店有到會服務，可以打電話去問，詳細編輯都唔知，唔好問我。

EATWO

Miss A

【端午節粽2024】13間精選良心端午糉推介！鮑魚糉／鹹肉糉／素糭／裹蒸糭／鹼水糉／寵物糭！即睇早鳥優惠！