兩個人影吓相,  新界,  神秘之地

皇冠郵筒起步!柴灣屋邨後山藏舊式鐵滑梯 引水道側百年英式石橋點解叫猛鬼橋?

瀏覽次數: 68
個人瀏覽過





本地剩餘嘅皇冠郵筒仍有不足100個,今次編輯帶大家探視躲藏於柴灣屋邨內嘅圓柱形英式皇冠郵筒,只要大家拍拖兩個人從郵筒起步,更可以前往屋邨後山,探索僅餘嘅舊式公園鐵滑梯,公園背後亦有一道秘道連接到英式石橋,而呢道石橋又叫做猛鬼橋,到底係咪真係咁猛鬼,背後又有咩原因呢?

由柴灣市中心向興華邨方向步行,比較合適係以興華茶餐廳作路標,由屋邨一期穿梭至二期,就會搵到躲藏於屋邨內嘅歷史遺跡皇冠郵筒。興華邨本身都係70年代嘅屋邨,曾經係徙置區,當中一期更加係1997年主權移交之前最後托出建屋合約嘅英屬香港屋邨,而二期亦係第七型徙置大廈,二期相對係依山而建,有架空走廊連接,舊式電梯有如葵盛西邨。

編號232嘅英式皇冠郵筒位於柴灣興華邨內,靠近二期安興樓,係港島東區唯一兼最後一個舊式皇冠郵箱。郵筒為典型圓柱型鑄鐵式設計,多年嚟保養良好,整個郵筒非常簇新,貌似做過翻新維修,油漆亦無剝落。

圓柱型郵筒背後製造商名稱清晰可見,刻有Carron Company, Stirlingshire,相對平時製造商名字愈趨模糊嘅皇冠郵筒,今次柴灣興華邨嘅郵筒絕對係極清楚。而郵筒上亦寫有ERII,相信有留意eatwo嘅讀者都會知道咩意思,ER即係代表伊利沙伯二世時代製造嘅郵箱,因為E同II係象徵Elizabeth II,而R係代表Regina,即係女皇,全個意思即為「事頭婆」英女皇伊利沙伯二世。

以上述皇冠郵筒為起點,再帶大家前往隔離屋邨,距離只有5分鐘步程,屋邨後山更隱藏神秘英式石橋。由興華邨二期到峰華邨,穿過翡翠道到峰霞道盡頭,就會見到峰華邨小巴站,右邊係曉峰樓,左邊係已經變成居屋出售嘅景翠苑,屋邨背靠大潭郊野公園,同興華邨一樣係依山而建。依循中間唔太顯眼嘅小樓梯步行上山,就會到達後山小花園,頂端可見唔少休憩設施,而每一種設施都如同舊式公園一樣。

你有幾耐未見過舊式鐵滑梯?編輯知道其實重有好幾個地方都有柴灣後山呢種夠晒懷舊嘅舊式鐵滑梯,鐵製滑梯係舊時非常受歡迎嘅遊樂場設施,瀡滑梯識揀一定係揀鐵造滑梯!夏天陽光猛烈時大玩鐵滑梯時絕對會焫肉,因為金屬物質遇上陽光係會有灼熱感,不過鐵造嘅滑梯又特別好瀡,向下瀡滑梯時寧舍暢快!只係現時大多數公園都變成清一色塑膠滑梯,而且全部只有短短一個身位嘅高度,地面更加上防撞軟墊,有關方面以為好安全,其實塑膠滑梯於冬天時反而有靜電。

柴灣後山嘅鐵滑梯唔算高,但已經比塑膠滑梯高,而且唔只一條,不過滑梯隔離寫有設施損壞,唔俾使用,但又似乎無人修理。咁即係同太監結婚一樣,得物無所用,其實只要修理一下,自然變成樂園啦!只需穿過幾條鐵滑梯,可以前往盡頭小樓梯,從樓梯上山,就可以到達柴灣猛鬼橋。沿樓梯上到頂之後會見到第一個分岔路口,只要向右邊直行,直到見到左邊有小山路,就可以繼續上行至引水道。

到達引水道後,沿左邊前往約15分鐘,就能夠到達聞名嘅柴灣猛鬼橋,位置係峰華邨背後山坡引水道,從Google地圖可見,正確名稱係大潭峽石橋。驟眼睇嚟,全長只有約百幾200米,唔算狹窄,足以兩個人同時穿過,而資料顯示,橋身高約5米,有百年歷史,係一座非常古老嘅英式石橋,橋樑古色古香,上有典型古建築坑紋,充滿歷史價值。橋底係栢柴石澗,橋底流水潺潺,石橋盡頭右邊可以通往石澗底,聽聞有資深行山客曾指橋底為拱門設計,上面有子彈痕跡,不過橋底風景需要走山坡、石澗路,比較危險,編輯並無冒險打算。

呢道英式石橋近柴灣以西,柏架山以東,位處引水道側,整體並唔算破舊,仍然好穩固,沿途不時有人跑步經過,所以其實都唔算幽靜。石橋兩側石製圍欄有半個人身高,夠晒安全,橋上一端望山邊,另一端則可回望柴灣、大潭峽。同時,地圖上亦清晰可見石橋兩端引水道可分別連接大潭道興民邨至西灣濾水廠,靠近水務處宿舍設施,附近位置亦係戰時英軍指揮部,石橋盡頭左邊就能夠離開返回大潭道,引水道全長約400米。只不過峰華邨直上引水道會比較快捷方便,都算係一道四通八達而安全嘅山路,引水道沿路遍佈林蔭,完全係平坦易行,可以係一道輕輕鬆鬆嘅夏天路線。

至於大潭峽石橋點解會似走入結界,又點解會被叫做柴灣猛鬼橋呢?講到歷史,柴灣英式石橋係經歷過二戰、日治時期,以訛傳訛之說係有人於晚間時份走過石橋,卻目睹下面有日本軍人,而日本軍人一直向橋上嘅人揮手,鬼魂不時出沒,似乎言之鑿鑿,另一說法係由於日治時日軍大開殺戒,亡魂眾多,到處長嘯哀鳴,而附近嘅西灣濾水廠機器聲都似日軍軍車駛過,場面都係陰森恐怖,令人毛骨悚然,加上位置隱蔽,林蔭眾多,樹影婆娑,光線不足,自始成為一個香港靈異地方,連Google地圖上都有人於地點寫上Ghost bridge。




E.A.Tips :

❶ 巴士路線8H,8X,19,49X,81A, 82,82S,780,N8,N8X、小巴路線,16A,16M,16X, 20,20M,61,66 都可以到達興華邨。

❷ 從青年廣場步行至興華邨二期,步程約15分鐘。

❸ 由興華邨郵筒前行至峰華邨盡頭,腳程只係約5分鐘。

❹ 峰華邨舊公園內嘅設施已經損壞,謹記小心安全,唔好隨便使用。

❺ 峰華邨舊公園右邊盡頭就係柴灣猛鬼橋入口處。

❻ 猛鬼橋另一端可以通往大潭道,巴士可以來往石澳、赤柱。

❼ 大潭道至迴旋處有一小段路係無行人路,要小心安全,比較安全係連同石澳或赤柱行程,直接乘搭巴士離開。

❽ 峰華邨後山至猛鬼橋有一小段路為山坡路線,最好都係避免入夜行走。

❾ 巴士路線81,81A,780P 可以到達興華邨二期,81號亦可以到達峰華邨,而小巴路線43M都可以直達峰華邨。

❿ 就算真係想到橋底探險,都記得要做足準備功夫,裝備充足,要有有經驗之人陪同,落雨或落雨前後都避免走入。

柴灣猛鬼橋

  • 大潭峽石橋

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


旺角$48越南版海南雞飯 同價海量湯粉似足二人份量
【野餐隨行】慈雲山8月新店外賣自取平過堂食 肉醬意粉多料到滿瀉套餐$40有找 公園自製High Table歎高汁炸雞/Pizza
一餐麻甩與斯文兼備!元朗隱藏版料理店躲藏小巷賣日本魚生飯 與潮州滷味店僅相隔15秒步程
西貢林蔭秘道登小堤壩眺榕樹澳漁排 水浪窩闖企嶺下賞紅樹林尋港英時代郵箱
香港西端舂坎角泳灘賞絕美夕陽餘暉 海水清澈見底完勝赤柱沙灘 西環兒時回憶傳統餅店月餅預告【野餐隨行】
香港仔偽築地帆船野餐有遮蔭 鯨魚主題小店賣魚市場直送龍躉漢堡 揭人氣日本餐廳5大問題疑不尊重客人【野餐隨行】
【野餐隨行】長洲掃街掃盡6間小店!小島必揀經典魚湯/魚燒/大魚蛋 北端沙灘海旁自製迷你Party
【野餐隨行】元朗國公園大草地歎超靚韓式吐司 款款內餡含400次滑蛋
30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸
新手路線扯旗山VS高階路線奇力山!最高登山點360°環抱港島靚景 同遊山頂空中花園連百年古蹟歷史建築物
陳舊藍屋搵唔到入口?筲箕灣隱藏版炸雞Pizza即叫即製正過連鎖店 高水準脆意雞10間分店竟淨1間!
全港3間分店!油麻地樓上泰國菜用App買外賣享9折優惠 芒果糯米飯宛如當地水準
【野餐隨行】北角潮州飯店高水準鹵水鵝片 尋海旁小型狗公園野餐
蕃茄濃湯海量茄蓉! 長洲火車頭酸辣小窩餸菜自由配搭
【南丫島一日遊】碼頭皇冠郵筒起步!20分鐘步程經神風洞闖索罟灣蘆鬚城村神秘沙灘 長期擁一級水質假日全灘僅廿人?
石壁快閃遊!全港最大水塘三甲探索監獄前皇冠郵筒/古老石刻 貝澳超長淺灘遍佈水牛