港島行山路線你知道幾多條呢？西高山、龍虎山、山頂盧吉道就係比較多人認知嘅路線，編輯今次就帶大家一次過走兩條路線，一邊係新手路線，另一邊就係高階路線，係相對鮮為人知，適合拍拖兩個人輕鬆郊遊，而且兩個登山點都係港島最高點三甲，能夠環抱360度港島靚景，絕對值得一去！
首先乘搭登上山頂嘅巴士路線，到達山頂廣場總站之前落車，折返後面方向，會見到三條分岔路，實情係一樣，比較安全係先橫過紅綠燈馬路，前往最左邊嘅賓吉道，依明德國際醫院路牌走，直到盡頭轉右過天橋，返回加列山道。依循加列山道走，前行會經過下方嘅貝璐道休憩花園，繼續步行會先後見到一堆山頂豪宅，比如裕熙園、顯峰居、龍庭、加列山道14號、Twelve Peaks。
前行至盡頭會到達堪仕達道、加列山道分岔路口，只需要一直沿加列山道走，會經過另一堆豪宅，例如加列山道78號、Kelletteria、嘉利別墅。當見到54、56、58號Mt Kellett Rd、52號Mt Kellett Rd、60號Mt Kellett Rd，即係加列山道52、54、56、58、60號嘅指示牌，就可以沿斜路上行，由巴士站前行至斜路大概需時15分鐘步程。沿途豪宅甚有氣派，連傭人都有好幾個，傭人都為自行揸車出入。
再上行5分鐘，就會到達奇力山入口，盡頭有一個白色小屋，狀似錶房，本來有得穿過，路線能夠直接到達奇力山山坡路段，但目前已經被封鎖。不過，其實只需要折返斜路，於加列山道54、56、58號指示牌旁邊小山坡上行，就可以返回奇力山路段。此段山坡需時約3分鐘，右邊能夠返回本來嘅白色小屋入口，大概為龍虎山界石路線Level，略有崎嶇不平，要有裝備先能夠上行。
山徑窄小而隱蔽，轉向左邊，可以通往賞景位置，更可以登上奇力山山頂，起步點已經逾400米，故只需要上行不足100米就能夠攀登奇力山。奇力山海拔有約501米高，係港島三大最高山峰之一，山腳既位於加列山道，奇力山亦被稱為加列山，奇力山英文為Mount Kellett，聽聞Kellett嘅名稱係來自一位英國皇家海軍測量工程師奇力爵士，名為Henry Kellett，同被稱為Kellett Bay嘅雞籠灣一樣，以奇力爵士命名，而奇力山離明德國際醫院、山頂消防局不遠。
圍繞山邊而走，可見一個個賞景位，能輕鬆下瞰香港仔上水塘、香港仔下水塘，可以眺望海洋公園設施，甚至南區赤柱、南朗山、布廠灣一帶景色，盡頭會見到一個類似山頂發射站嘅設施。如果經驗充足，可以攀上山坡登奇力山山頂，享盡近360度港島靚景，只不過上山路段係攀石路線，危險度高，山坡有45度角，而且崎嶇不平，落腳點亦難搵，如果講難度唔高嘅話絕對係不負責任嘅行為，只有米5嘅編輯表示未能攀登最高點，相片僅由較有經驗嘅Photog代勞。
奇力山山頂地方偌大，擁綠油油草地，山頂標高柱位處斜坡上，能夠俯視四面八方，景色開揚，包括東面田灣山、南面香港仔、西面薄扶林、北面爐峰峽一帶，景觀極為遼闊，頂端不僅可望山頂廣場方向，環瞰盡是豪宅地帶，比如歌賦山。
原路折返至山頂廣場，步程需約20分鐘，而廣場對出除咗有舊式綠色纜車陳列品之外，更有一個圓柱型皇冠郵筒，靠近山頂太平山餐廳。對殖民歷史有認知嘅你，一定會知道刻有「ER」字樣嘅皇冠係咩意思。事實上，eatwo網站亦多次提過英國皇冠郵筒，有留意嘅讀者一定記得，「ERII」係代表「事頭婆」英女皇伊利沙伯二世，而郵筒背面亦刻有「Carron Company, Stirlingshire」字樣，同時標記製造商名稱，係1878年從英國引入。
經過殖民時代嘅經典皇冠郵筒，可以於盧吉道或夏力道繞圈而走，不過編輯認為盧吉道、夏力道比較適合拍攝夜景，故先向山頂花園方向上行，晏啲先返回盧吉道、夏力道。依循盧吉道與夏力道之間嘅柯士甸山道上行，5分鐘即達柯士甸山遊樂場，再上行經過耕雲草廬、山頂花園後，10分鐘就能夠到達重點分岔路口，左邊可以通往山頂公園、舊總督山頂別墅守衛室，而右邊則能夠登上港島最高點扯旗山！
相對於全無正式郊遊徑嘅冷門路線奇力山，被稱為扯旗山嘅太平山比較輕鬆易行，而且非常方便，全程皆為瀝青路，絕對係新手輕鬆路線。先依右邊小路登上扯旗山山頂，只需要依山頂食水配水庫方向上行約5分鐘步程，就可以前往頂端配水庫旁邊偌大草地，山頂可見維多利亞山頂超高頻無線電臺，就一個太平山頂發射站，下方為建於2011年、比較新嘅山頂二號食水配水庫。
太平山/扯旗山山頂海拔高約552米，可以居高臨下眺望維多利亞港海景，亦可回望山頂廣場、奇力山方向，可以直視海拔約494米高嘅西高山，同時能夠鳥瞰薄扶林水塘，豪宅群亦一覽無遺。位置為山頂食水配水庫，但編輯就未能搵到配水庫遺跡，據稱山頂食水配水庫建於19世紀末，由1897年至今有125年歷史，上年深水埗主教山配水庫風波期間，山頂食水配水庫更與半山雅賓利食水配水庫、歌賦山食水配水庫被一併列為香港一級歷史建築物，同主教山配水庫嘅共通點係都屬於戰前配水庫，至於油麻地食水配水庫雖然係僅存5大戰前配水庫之一，但就未有如上述配水庫一樣被列為一級歷史建築物。5個戰前配水庫都係充滿歷史價值嘅水務設施，據水務署文件可見，山頂食水配水庫內同主教山配水庫一樣為紅磚建成，並以拱門設計，滿滿英式風格。
扯旗山路線可以兼遊山頂一帶景點，包括有充滿歐陸氣息嘅山頂花園、於1995年被列為香港法定古蹟嘅舊總督山頂別墅守衛室（The Mountain Lodge Guard House），甚至下行至薄扶林水塘、西高山。當日亦見有新人專程前往拍攝婚照，亦有龍友與Model進行私影。舊總督山頂別墅守衛室係一座以藍白色為主調嘅小屋，連同1902年建成嘅舊香港總督山頂別墅（Mountain Lodge）遺址，有逾120年歷史，而守衛室則以文藝復興風格設計而成，復古味濃厚，仍有維多利亞時代色彩，守衛室只係單層建築物，繞圈計算室內大概僅有100至500呎空間，別墅曾有多名來自英國嘅香港總督入住，原有位置於50年代被改建成山頂公園，至於守衛室現時仍然未有開放公眾。
山頂公園復古味同樣濃厚，每個草地都有英式涼亭，甚至有哥德式石柱支撐嘅涼亭，公園以19世紀英國維多利亞時代建築風格重新打造，充滿殖民地色彩，中央花圃更以花草砌成幾何圖案，都係影相好地方，有如空中花園。花圃對上則為山頂涼亭，位置係唔少電影、電視劇拍攝勝地，涼亭可享同配水庫頂端相近景色，俯瞰薄扶林、數碼港，以至藍巴勒海峽一帶。
臨近傍晚，可以前往涼亭盡頭西面方向觀賞黃昏日落，夕陽斜照相當醉人。位置正對摩星嶺、堅尼地城方向，可眺望青洲、交椅洲、坪洲、喜靈洲、長洲，甚至青衣、昂船洲大橋一帶，更可放眼南丫島全景，三支煙囪清晰可見。
夜晚臨走之時更可以折返盧吉道、夏力道觀賞香港夜景，獅子亭就係上佳賞景地點，晚間時份，寧靜城市萬家燈火景色與日間繁華景象形成對比。獅子山係象徵香港人嘅奮鬥、拼搏，而太平山就係代表住香港嘅繁榮成就，故好應該紀錄低最後嘅「東方之珠」，香港太平山夜景正好為山頂一日遊作結。
E.A.Tips :
❷ 奇力山路段並非輕鬆路線，故必須量力而為，同時裝備充足，至少要防滑行山鞋同手套，甚至繩索輔助。
❸ 奇力山沿途無補給點，但可以喺山頂廣場補給。
❹ 攀登奇力山山頂比較危險，皆因係攀石路線，必須裝備充足兼有攀石經驗。
❺ 兩個山頂附近都係豪宅區，而且遍佈CCTV，所以謹記注意自己嘅行為同聲量。
❻ 奇力山附近有唔少蚊蟲，要先做妥防蚊措施。
❼ 歷史建築物係珍寶，請勿塗污或破壞。
❽ 山頂位置為懸崖，勿走得太邊，小心安全。
奇力山
山頂加列山道60號 24hours
山頂食水配水庫
山頂
24hours
舊總督山頂別墅守衛室
山頂
24hours
山頂公園
山頂柯士甸山道
24hours
2853 2605