夏天氣溫上升，行山並唔係舒服嘅事，一係選擇下海，一係選擇較輕鬆嘅散步路線，如果要搵散步路線，今次帶大家拍拖兩個人行吓西貢大網仔，唔行山都可以遊走海濱步道，於釣魚碼頭吹吹海風，查看路途中嘅歷史建築物，都可以帶嚟幾分意思。
由大網仔迴旋處旁邊嘅大網仔燒烤區三號場起步，循大網仔路前行海邊步道，沿途遍佈多個燒烤場，可享海景。而大網仔本身位處西貢中部，係西貢市中心與北潭涌之間，巴士路線或小巴路線均可抵達，多行山路線。
大網仔路會經過黃竹灣、早禾坑、斬竹灣，遍佈燒烤場，而燒烤場亦大多擁有碧綠大草地，更可以搵到西貢區內步程最遠嘅港英時代皇冠郵箱。而離迴旋處最近嘅地方係躲藏於5號燒烤場內嘅清代天后古廟，海邊佈滿獨木舟，係唔少獨木舟發燒友出發地方。
位處西貢大網仔路早禾坑嘅天后古廟，地理上係黃竹灣，門口碑文寫下曾於2008年重修，門口對聯分別寫有「莆田世澤，沐恩流芳」，現時天后古廟建築似北方影視城或本地電視台古裝街內嘅仿製廟宇，重修後似乎少咗古樸感，雖然牆身仍舊以青磚舖砌，瓦頂為琉璃建造。該廟建於清代光緒年間，即1905年，有逾百年歷史，當時多數附近幾條村嘅村民都以務農、打魚、煅灰為主，故為祈求風調雨順、國泰民安，故到訪參拜天后娘娘，香火鼎盛。
天后古廟對出位置不單係燒烤場，亦係賞景好地方，皆因海邊為紅樹林及泥灘，眺望多個不知名小島與西貢沙下灘方向，環境清幽寧靜，泥灘內亦可見小螃蟹，亦可見遠處有鷺鳥飛翔。
繼續前行就可以到達剛才能夠眺望嘅早禾坑碼頭，位置僻靜，故此係聚集釣魚客，早禾坑碼頭向來係釣魚勝地。碼頭離早禾坑村不遠，比漁排好嘅地方係較少人工化，而且較少遊艇、漁船走過，水質會較好。
碼頭既能夠放眼海景，海風微微輕撫，能趕走暑氣，亦可以眺望多個不知名小島，遠睇一個個細小島嶼分佈於海中心，其實同元朗千島湖不相伯仲，比較近嘅係一個叫垃圾洲嘅小島，另一端可遠眺羊洲、枕頭洲、白沙洲，甚至係滘西洲，夕陽西下時亦可以觀賞黃昏日落景，只係編輯當日撞正陰天。
沿海邊最後步行至The Capri、大網仔停車場，就可以找尋英國皇冠郵箱，而大網仔內嘅皇冠郵箱係離西貢市中最遠嘅一個，該郵箱為370號，靠近停車場，望落有幾分殘舊，係入牆模式嘅郵箱，鑲嵌於平頂柱內，比較矮身，郵箱上寫有ER字樣，意味係伊利沙伯二世時期製造，底部亦寫有製造商名稱W T Allen Co Ltd, London，即係倫敦製造嘅郵箱。
E.A.Tips :
❷ 黃竹灣大眾天后古廟位於新界西貢大網仔路大網仔燒烤區五號場內。
天后古廟
大網仔路21A號
早禾坑碼頭
大網仔路
大網仔燒烤場
大網仔燒烤區15號場