【野餐隨行】麻雀為名？美孚車仔麵毗連車輪餅專門店荔枝角公園偌大空間隨處野餐

美孚區內良心小店唔多，大多數都係以Cafe為主題嘅餐廳，容易外賣嘅菜式唔多，當中一個小商場內就有兩間店彼此相連，一間係售賣車輪餅，另一間則售賣車仔麵，只要拍拖兩個人步行3分鐘，就能夠到達人氣影相地點荔枝角公園作野餐點。

位處吉利徑嘅十三么車仔麵，隔離就係車輪餅小姐，兩間都係同路人，車輪餅小姐喺較早年時候已經開業，而十三么車仔麵開業年期就比較近。至於十三么係咪同開四方城嘅麻雀有關，就真係不得而知啦。現場並未見到任何同麻雀有關嘅蹤跡，據悉本來有張麻雀枱懸掛牆邊，但現時就唔見有該裝飾品，牆身上就勉強只有如同紅中嘅白底紅字餐牌，寫有車仔麵每一款餸菜。

如果將餸菜點餐方式設計成麻雀，以一隻隻麻雀嚟點餐，又或者係以8番32、8番64、8番128，而8番256就太貴啦，若採用3款麻雀計算方法作為4個車仔麵餐單，每種8款餸，32蚊嘅係最cheap嘅餸菜，128蚊就會有特別矜貴嘅餸菜如鮑魚，相信會更有意思、更有Gimmick，而家十三么名稱同車仔麵似乎完全風馬牛不相及。

從車仔麵檔步行至荔枝角公園，穿過街市，只需過一條馬路，步程約3分鐘，係美孚區內最大型嘅公園，而又最適宜野餐嘅地方。每逢假日，荔枝角公園內都有唔少姐姐席地野餐，跟上野餐亦無不可。

荔枝角公園係眾所週知嘅攝影打卡地，皆因公園分為三期，內有以皇家園林為主題嘅中式花園，亦有著名嘅嶺南之風，更有近年編輯最早期全新發現嘅《愛麗絲夢遊仙境》影相位，極限運動場、門球場等球場應有盡有，前後左右皆靠近巴士站，交通方便，其中一邊平台花園更靠近瑪嘉烈醫院。

延伸閱讀﹕隱藏版荔枝角公園驚現《愛麗絲夢遊仙境》小秘景

三餸一麵$40、四餸一麵$48、五餸一麵$57，再加餸每款加$10，價錢不過不失，見仁見智。每一份車仔麵都會附上一塊生菜墊底，麵底中油麵順滑、米粉爽彈，油麵吸湯力較強，比較能吸附湯汁。湯底則可挑選腩汁、滷水汁、沙嗲汁、麻辣汁、香辣汁或麻辣沙嗲汁，甚至可以揀乜汁都要，腩汁正常發揮，滷水汁與大多數餸菜款式都好配合，。

餸菜款式當中，滷水蛋、日本溏心蛋都係唔少客人必揀款式，只不過好快賣晒。其他餸菜款式都算不俗，數量適中，大小合理，香煎蟹柳餅、香煎墨條夠香口惹味，冬菇最吸附湯汁，牛腩厚肉，質地軟腍唔韌而易入口，豬紅入味而無散開，至於蘿蔔就最有驚喜，呢款白蘿蔔無渣之餘，有種獨特陳皮香味，並唔似平常坊間車仔麵經常有嘅溏心蘿蔔。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 辣度可揀小中大或大大辣。

❷ 位置於小商場內，茶飲店附近。

❸ 野餐時，自己垃圾謹記自己帶走！

❹ 野餐要盡量使用可循環再用之餐具器皿。

❺ 可以挑選有長櫈嘅地方，會較方便。

❻ 有需要可自備小餐枱、小型露營櫈用餐，可以隨時去到邊食到邊。

❼ 野餐時正對海景用餐會比較Chill。

❽ 最好挑選較少人嘅地方，避免接觸人群。

❾ 野餐地同食肆最好距離不足15分鐘步程，以免食物及熱飲冷卻，有需要就自備保溫袋。

❿ 野餐時最好唔好完全除晒口罩，拉低口罩用餐時一定要拎住食物或飲品。

EATWO

Miss A

【區區有小店2024】馬鞍山7間尚存本土餐廳推介！牛肉丼飯／豆腐火腩飯／街坊茶記｜馬鞍山美食推薦2024