赤柱歷史文化一日遊！探索本地僅存紅色皇冠郵筒/舊式郵票機市集大街到底有幾多幢古老歷史建築物？

步入赤柱，一般拍拖兩個人一日遊，都係不外乎遊覽赤柱海旁、赤柱大街、赤柱市集、赤柱廣場、赤柱碼頭、赤柱沙灘，甚至美利樓，其實赤柱一日遊都可以玩得有深度少少嘅，喺上述嘅地方內，其實每個地方都躲藏一個個寶地，值得認真探索，你又知唔知赤柱市中心到底有幾多幢古老歷史建築物呢？

講到最為人熟悉嘅歷史建築物，一定係位於赤柱廣場海傍附近、靠近卜公碼頭嘅赤柱地標美利樓（Murray House）。的而且確，美利樓建於1846年，正正係維多利亞女皇時期，故此整幢建築物設計都充滿維多利亞時代色彩，有古典風格，屬殖民地時代建築物。而建築物建成之時，就以當時嘅軍械局長的美利爵士命名。雖然係一幢有逾160年歷史嘅地標，但美利樓已經由一級歷史建築物下降至不予評級。

美利樓現址雖然係赤柱，但其實原址係靠近中環至金鐘，最初為軍事用途，例如係兵房、軍營，甚至設有囚室、刑場，後期亦曾為政府機關辦公室，見證香港曾經歷英治、日治時期，只係後來於1982年拆卸，再於1998年喺赤柱重建。目前美利樓仍以花崗岩建造，天花則為改建並重新設計，至於部份舊物獲得保留，比如係同昌大押嘅石柱、殖民時代西式圓柱、中式瓦頂嘅中西合璧建築設計，滿滿復古風格。現時室內皆為商場用途，不過玻璃窗長期透視嘅H&M Logo，真係有妹仔大過主人婆嘅感覺。

另一幢位於赤柱大街嘅歷史建築物，係比較搶眼而又較多人打卡嘅地方，加上上年人氣電視劇集《大叔的愛》曾取景拍攝，更加係比較多人認識嘅地方。呢座建築物為赤柱黃屋，一直以來有唔少餐廳進駐，本來2000年就有The Boathouse，顧名思義係船屋餐廳，2020年就變成Beesy Bay，兩間海邊西餐廳都貫徹赤柱大街嘅酒吧街風格。

雖然叫做赤柱黃屋，但整幢建築物本來並非髹上黃色，而係一幢由藍變黃嘅建築物，只係2015年先至由藍屋變成黃屋，鮮黃色調更柔和，搶眼又Sharp醒！赤柱黃屋始於1951年，70年代曾經係住宅地，然後先改建成餐廳，一直都屬於赤柱地標之一，只係後來2000年先至有比較出名嘅The Boathouse進駐。赤柱黃屋一方面吸引唔少人影相，另一方面亦有唔少電視劇、電影取景拍攝。赤柱黃屋位於赤柱大街86至88號，而88號早已被列為香港三級歷史建築物。

赤柱海傍石壆可享一望無際赤柱海景，和暖陽光照射，溫柔海風輕撫，海浪碧波蕩漾，得閒散吓步亦倍感愜意。除咗上述兩個比較廣為人知嘅歷史建築物，以下三個地方都係比較少人提到嘅歷史建築物，其中一個更加同殖民歷史息息相關。

一直沿海傍前行至赤柱後灘，會發現赤柱東岸嘅沙灘背後有一排紅磚小屋，由左至右數一數，合共有8間屋，而呢8間屋就合稱為赤柱八間屋。八間屋顧名思議就係8間相連嘅排屋，雖然躲藏後灘，其實都係位於赤柱大街，只係靠近黃麻角道、聖士堤反灣方向。八間屋建於30年代，屹今有逾90年歷史，每間有1個村民家庭居住，合共有8個村民家庭，所有黃麻角村村民因政府於抗日時期要興建赤柱軍營、黃麻角炮台，故最終被安置於八間屋內。

而八間屋每間幾乎一式一樣，只有地下一層，牆身為紅磚堆疊建造，配上綠色木門、窗框，加上灰色尖頂瓦面，古樸味濃，屬於傳統客家建築風格，都算係碩果僅存嘅客家小屋。只不過，八間屋嘅古物評級就被分拆，有7間已經被列為香港二級歷史建築物，有1間則被列為香港三級歷史建築物。

由赤柱市集轉出赤柱村道，可以同時搵到另外兩幢歷史建築物。其中一幢為舊赤柱警署，於1859年已經建成，絕對係歷史悠久，既係香港歷史上最早建成嘅6座警署之一，另外5座已經拆卸，而舊赤柱警署亦係赤柱區內數一數二最耐歷史嘅建築物，日治時期曾被日軍徵用，於1983年更被列為法定古蹟。舊赤柱警署於1993年重新裝修後曾租予餐廳之用，到2000年代時再租予商戶作超級市場用途，其中惠康超級市場就租用咗16年，而百佳超級市場就於2018年先承租，現時則繼續丟空。

而事實上，舊赤柱警署樓高兩層，以灰白色為主調，屬平房模式，狀甚簡潔，但建築設計獨特，走廊設有陽台，屋頂更以瓦片舖砌，木門框、窗框，甚至木地板、木階梯、天花橫樑，屬英式建築，滿滿古雅風格。

位於舊赤柱警署隔壁嘅係同樣屬於英國殖民時代建築物嘅赤柱郵政局，於1937年建成，早於2009年被列為香港二級歷史建築物，屬於有特別價值而須予以保留嘅建築物，係本地現存最古老而又仍然能夠運作嘅郵政局。郵政局只係單層設計，地方唔大，大概只係二、三百呎，但外形滲出古樸味道，而郵政局內亦保留咗極罕見嘅英國皇冠郵筒、舊式郵票售賣機，原裝窗花更有「GR」圖案，復古味濃。

據香港郵政資料顯示，赤柱郵政局曾經於2007年進行大型工程，不單翻新舊有郵箱，亦於櫃位加上格柵，地面回復水磨石地板，並去除假天花，令郵政局木結構更為明顯，同時重設英式郵箱及郵票售賣機。而上年5月，赤柱郵政局曾經因交通意外而被巴士撞毀門口欄杆、郵筒、矮石牆，連屋頂橫樑都有裂痕，及後於同年年底已經完成修復工作，目前已回復原貌。