【野餐隨行】大圍公眾滾軸溜冰場歎泰國船麵新鮮牛骨湯自行加添4種配料提味

泰國船麵廉價味美，向來受到香港人歡迎，傳統船麵基本上只以小碗盛載，份量少而價錢平，如果拍拖兩個人去過泰國，就一定嘗試過。而香港食店嘅泰式船麵，雖然盡可能保持正宗味道，但大多為咗親就客人需求及舖位租金，而變成份量多啲而價錢較昂貴，以曼谷地名Asok為名嘅泰國菜食店，分店分佈於元朗及大圍，當中大圍店甚有名氣，據了解近月於尖沙嘴有新分店。

船麵一般船粿條，而店內嘅泰式麵底就包含金邊粉、河粉、米粉、粉絲、蛋麵，但同樣配搭牛肉或豬肉。船麵湯底亦係精髓，通常會加上牛血或豬血，混合鹽、黑醬油等香料，再配搭肉丸或豬肝，尤其會佐以豬皮、羅勒嚟癖除血腥味。

大圍阿叔船麵主打固然係牛肉船麵$60，採用新鮮牛骨湯配牛腩、牛丸，附有芽菜、通菜、花生碎、炸豬皮，選上較爽滑有韌度而適合配泰國菜、又吸附湯汁嘅金邊粉，內有兩大舊厚切牛腩，肉質都算軟腍，配上兩三粒爽口彈牙嘅牛丸同埋浸入湯之後增加韌度嘅炸豬皮。湯底雖有牛骨湯味，但較平常泰式船麵嘅清淡，藥材味較輕，牛味唔太重，還好湯頭有肉香而唔油膩。

更特別之處係外賣都配上4款配料，跟足傳統等客人自行添加，包括魚露、白糖、白醋、辣椒粉，當加上魚露、辣椒粉之後，味道霎時變得較重，4款調味料嘅甜酸咸辣味道原來真係缺一不可，可以為湯底提味，入口後恍然大悟，原來重點係魚露，為湯頭昇華。

由小店折返大圍市中心，穿過港鐵大圍站，前往另一端方向，可以步行至車公廟路遊樂場，公園地方都算偌大，盡頭更有一個滾軸溜冰場，靠迎雲疊花園、顯田游泳池，亦可作野餐之地。

豬手飯亦係泰國著名菜式，但要還原泰式豬手飯比較困難，香港食店當中的確好少見，大圍呢間就有馳名楊叔叔豬手飯$62，調味上並非正宗泰國當地嘅豬手飯，感覺係比較刻意貼合本地人嘅口味。豬手驟眼睇乾淨無毛，豬肉亦有兩大舊，肉質炆得軟爛入味，醬汁香濃，伴有滷蛋、酸菜，滷蛋亦入味，雖然醬汁貌似遷就港人口味，但的確適合撈飯品嚐。

店員推介芒果糯米飯$58，最後只簡單多點一杯香茅班蘭特飲$24，內裏只係一杯加上班蘭味嘅梳打水，香茅味唔重，亦無蹤影，可能被班蘭味完全複蓋味道啩。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 留意外賣要加$2。

❷ 阿叔泰麵ASOK Thai Noodles有兩間分店，一間地址為元朗西菁街20號益輝大廈地下3號舖，另一間就係編輯所去嘅大圍積信街31-51號安信樓地下Q號舖。

❸ 尖沙嘴新店位於尖沙咀亞士厘道37號地舖。

❹ 滾軸溜冰場外有座位，切勿於滾軸溜冰場內用餐，場內真係有人踩冰。

❺ 滾軸溜冰場對出有洗手間、汽水機。

❻ 車公廟路遊樂場靠近雲疊花園。

❼ 由小店步行至滾軸溜冰場，約需20分鐘步程，穿過港鐵大圍站就會更近，穿過咋，唔係叫大家搭。

EATWO

Miss A

【區區有小店2024】荔枝角23間尚存本土餐廳推介！肉蛋吐司／脹卜卜餃子／工廈Cafe｜荔枝角美食推薦2024