兩個人影吓相,  新界,  神秘之地

新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘

瀏覽次數: 59
個人瀏覽過





《God Save The Queen》係所有英屬香港居民一定記得嘅歌曲,因為香港曾經係英國殖民地,而隨住「去殖」問題,淨餘嘅殖民時代產物到底又淨返幾多呢?單單皇冠郵筒已經愈趨少見,而英國赤紅色電話亭更加係幾近絕跡,原來現時只有兩個地方仍舊保留呢種真英國赤紅色皇冠電話亭,其中一個就係新田加州花園,位置如同一個英式小花園,有時間不妨拍拖兩個人去懷緬一下啦!

從元朗或上水方向起步,一樣可以直達新田加州花園,位置靠近米埔,表面只係一個有錢人居住嘅地方,皆因整個空間都係花園洋房,據知有約980幢洋房,每座樓高3層,放眼恍如美國加州獨立屋,加州花園名副其實。不過,身為貧窮戶嘅編輯當然唔係帶大家睇獨立屋,而係加州花園內嘅英式小庭園。

落車後,轉入加州豪園大道,先經過加州花園會所「Club Oasis」,然後穿過保安大閘,就可以再轉向加州花園廣場(Palm Springs Plaza),你就會發現一個被發展商予以保留嘅英式小庭園。商場內商舖甚少,只有寥寥幾間,多為連鎖店,包含7-Eleven、fusion by PARKnSHOP,有幾分似屯門黃金海岸商場,只係人流較少,除咗住客就只有單車客路經此地買嘢飲。加州花園雖然目前為住宅地帶,但原來前身只係魚塘,不過位置靠近米埔濕地,所以魚塘空間可以想像。

加州花園廣場外就係值得一去嘅英式小庭園,當中包括象徵英國殖民時代嘅皇冠郵筒,亦特別保留咗現時極為罕見嘅英國赤紅色皇冠電話亭,加上旁邊明顯比香港街燈矮小嘅英式街燈,重有靠近便利店嘅英式浪漫貴族風時鐘,雖然只係靠近路邊,而且加州花園嘅發展商為新鴻基地產,估計只係發展商為吸引人流先保留,但設計的確甚為吸引。

今次探索嘅皇冠郵筒同平常比較常見嘅「ER」郵筒大有分別,因為並非伊利沙伯二世時代嘅皇冠郵筒,而係本地已經更罕有嘅「GR」郵筒。眾所週知,「ER」嘅「E」係代表「Elizabeth」,象徵「英女皇」伊利沙伯二世,而「R」就代表「Regina」,即女皇;至於「GR」嘅「R」就代表「Rex」,即皇帝,而「G」就代表「George」,係英皇佐治六世標記,比「英女皇」時代更早。而加州花園商場外嘅皇冠郵筒並非郵政署所擁有,只係一個發展商從英國購入嘅郵筒,屬私人擁有,唔係公眾能夠投寄嘅郵筒。

至於西港城內嘅兩個赤紅色電話亭,表面似足新田加州花園嘅殖民時代電話亭,但並無任何皇冠標記,所以唔係編輯所提到嘅嗰兩個殖民時代皇冠電話亭嘅地方之一。而本來置於商場內嘅皇冠郵筒,據編輯了解,郵筒亦早於幾年前被移走,不過兩者都只係私人擁有,所以歷史方面就唔太清楚。

而加州花園嘅英國赤紅色電話亭有兩個,位於廣場對出一角,靠近幼稚園,電話亭頂端皇冠徽號清晰可見,入面電話可見PCCW字樣,現時係相當獨特嘅傳統英式電話亭,皆因香港歷史博物館嘅電話亭展品已經被髹上孔雀綠色,而上環西港城嘅英式電話亭則無皇冠標記。編輯記得荔園都曾經有個赤紅色電話亭,即使係電影《阿飛正傳》內嘅英式電話亭亦已經被髹上錄色,同廣場另一角嘅皇冠郵筒被髹上綠松石綠色一樣,未有獲得保育,疑似逐步淡化殖民色彩。事實上,呢啲只不過係香港過往歷史見證,真係有必要刪除抹殺自己嘅歷史嗎?




E.A.Tips :

❶ 巴士路線76K可以到達加州花園出面。

❷ 皇冠郵筒係殖民歷史痕跡,謹記切勿破壞。

❸ 所有陳設只係商場對出位置,並非真係一個公園模式。

❹ 謹記保持安靜,切勿騷擾居民。






加州花園

  • 元朗和生圍

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象