八妹車仔麵+海怡半島海濱長廊+小玉桂山
兩個人影吓相,  兩個人醫吓肚,  和你Taste,  港島,  港式,  神秘之地,  野餐隨行

【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山

瀏覽次數: 65
個人瀏覽過





南區向來係本地一個避世之地,有機會係比較安全嘅地方,今次帶大家拍拖兩個人到鴨脷洲野餐,不過就唔係近香港仔海旁嘅鴨脷洲海濱長廊,而係南區最西面嘅海怡半島海濱長廊,試一試一碗重料車仔麵,醫肚後再登上區內一座小山丘。

鴨脷洲美食唔多,當中鴨脷洲大街亦只能找尋幾間良心店,而鴨脷洲西端則更少見,港怡西商場就有一間港式小店,離海旁只係1分鐘步程,正對海怡半島,下午茶兩餸一麵低至$39有交易。2020年開業、主打港式車仔麵嘅「八妹車仔麵」,不單有車仔麵,亦有其他菜式,例如另一招牌文昌雞、港式碟頭飯、粥品、炒粉麵、港式懷舊小食、撈麵撈粗等,亦有無味精原盅足料燉湯,包括猴頭菇淮山無花果燉雞、五指毛桃海底椰燉瘦肉等。事實上,車仔麵以往被稱為「嗱喳麵」,大多數只出現於橫街窄巷,將一埋平價餸菜溝埋一齊,而香港車仔麵水準逐漸改善,不過最大吸引力都係在於價錢平,為人工未見上升嘅香港人提供一餐溫飽。

海怡半島海濱長廊唔等同於鴨脷洲海濱長廊,後者近鴨脷洲大街、香港仔碼頭,而前者則為鴨脷洲西面,聚集34座海怡半島住宅嘅地方。不過,海怡半島前物其實係鴨脷洲發電廠、油庫,只保留有港燈鴨脷洲綜合大樓,海濱長堤有逾800米,盡頭就有一個港燈鴨脷洲碼頭。

呢間小店小店裝潢上以香港懷舊風格設計,加上霓虹燈牌點綴,用色搶眼,而車仔餸款式眾多,丸類、肉類、菜類基本都有,有一款八餸大碗麵$64,適合選擇困難者,包含豬紅、豬皮、蘿蔔、醬爆魷魚、時菜、魚蛋、紅腸、雞翼尖,由裝潢都食物,質素皆如同銅鑼灣「麵尊」。油麵亦算順滑,無被湯浸軟,可以吸附湯汁,腩汁夠香,車仔餸以蘿蔔、豬皮、生菜最入味,當中蘿蔔最清甜,魷魚有獨特醬汁,比較突出,香濃惹味,雞翼尖滷味唔錯,豬紅亦唔會一夾就散,其他則不過不失。湯麵都食得到,重有咩食物唔可以野餐?

而文昌雞都係受南區居民歡迎嘅菜式之一,其中文昌白切雞湯河$52,選用正宗海南文昌雞,有指係特別選用海南文昌走地雞,特點在於無激素、無催熟、無公害,有別於平常坊間嘅雞肉。米粉爽口,略嫌有少少硬,雞肉份量適中,表皮較薄身,骨較細軟,雞肉色澤偏雪白,質地煙韌,唔係平常嗰種嫩滑貿感,肥而不膩,有種獨特雞肉香。

蜂蜜菊花露龍眼冬瓜茶$18至$20,半價$9至$10,健康滋潤,聲稱無香精、人造糖、色素,龍眼冬瓜茶底部可見4粒龍眼肉,冬瓜茶甜度尚算適中,龍眼撞冬瓜茶兩者皆甜,整體少甜更好。

處於海怡半島海旁野餐,發覺此處係南區一個上好賞景地帶,海濱長廊位於西面,而且視野毫無遮擋,相信會係一個日落靚景地,畢竟你西邊黃昏。即使唔係日落時份,亦可飽覽全海景緻,既前臨香港仔灣、東博寮海峽,亦正對龍山排、火藥洲,同時可眺望南丫島全景,三支煙囪盡入眼簾,甚至能夠眺望喜靈洲、周公島,石屎森林中的確仍有賞景好地方。

依循海濱長廊向香港仔方向步行,會發現對岸不單為香港仔避風塘,亦有小長堤向海怡半島海濱長廊伸延出海,長堤末端更可見香港100號燈塔,純白燈塔清晰可見,得閒看海面、聽海浪,間中洋船經過時畫面會更迷人。

由海濱長廊折返地面海怡路,轉出鴨脷洲橋道,前行轉右往利南道,就可以攀登鴨脷洲區內一座小山丘小玉桂山。編輯曾經報道過小玉桂山,有記憶嘅讀者應該會記得小玉桂山唔等同玉桂山,皆因難度、距離都有如天淵之別。

延伸閱讀﹕小玉桂山連接利東海怡 15分鐘輕鬆登頂環瞰180度海灣

今次以海怡半島、鴨脷洲邨為起點,於利南道轉上斜路,就可以步行上玉桂山配水庫休憩處,繼續上行就可以抵達小玉桂山山頂,山上有3支標高柱,正路全程為瀝青路,樓梯級清晰,而側路就被開闢出好幾道支線,不過全部都只係圍繞小山而走。其中一道路線就可以前往一個超迷你直昇機停機坪,位置可以打卡,亦可觀景。

小玉桂山又叫假玉桂山,只係玉桂山嘅副峰,海拔只有143米高,而真玉桂山就有海拔196.2米高。途經小玉桂山,30分鐘就可以往來海怡半島至利東邨,路段簡單易行,山頂可眺望玉桂山、鴨脷排,可見玉桂山至鴨脷排中央係一個連島沙洲。而小玉桂山頂端同時可享180度東博寮海峽、鴨脷洲大橋海灣風景,一角更能夠遠眺海洋公園機動遊戲。

於另一端落山,樓梯級比較狹窄,盡頭可見紅色涼亭,可以沿登山小徑返回籃球場、利東邨,近利東邨東業樓遊樂場,經過利東社區會堂,循天橋方向步行,就可返回利東街市、利東商場。




E.A.Tips﹕

❶ 巴士路線

❷ 港怡西商場正對海怡半島海濱長廊,只係半分鐘腳程。

❸ 海濱長廊離小玉桂山不足10分鐘步程。

❹ 整段小玉桂山可以繞圈而走,由海怡半島步行至利東邨,不足30分鐘步程。

❺ 八妹車仔麵香港仔分店於上年9月開業,地址為香港仔香港仔舊大街120號兆群大廈地下7號舖。

❻ 晚市五大飯餐一律有8折優惠。

❼ 部份送熱飲,凍飲加$3,部份飲品半價,價錢約$8至$10。

❽ 店餔舖會自動將麵同湯分開,所以可以放心出去安心野餐。




八妹車仔麵

  • 鴨脷洲海怡半島海怡半島西商場1樓115A及116號舖
  • 08:00 – 21:00
  • 2581 2988

海怡半島海濱長廊

  • 海怡半島

小玉桂山

  • 鴨脷洲利東邨道利東邨東昌樓

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高
油麻地香噴噴鐵板魷魚鬚惹人垂涎 廟街招牌流心芝士玉子燒香甜不膩