兩個人影吓相,  兩個人醫吓肚,  和你Taste,  新界,  日本菜,  野餐隨行

【野餐隨行】將軍澳足料日式手卷毗連街市 單車館公園偌大草地席地開餐

瀏覽次數: 11
個人瀏覽過





講到將軍澳野餐地點,以下呢個地方係受到香港人歡迎嘅拍拖野餐地,皆因地方俗大,內有寬廣草地,初春時份更有櫻花觀看,今次編輯就趁初春時到大草地野餐,兩個人可以帶同手卷去作野餐食物,相當方便,當中離公園不遠就有一間小店,手卷足料,價錢貼地,受到街坊歡迎。

靠近將軍澳夜市嘅係一個商場,而商場街市旁邊就有一間以售賣日式手卷、丼飯為主嘅外賣店,手卷低至$15,當中最貴嘅海膽手卷$30/小、$60/大,即使係海膽雙拼手卷只係$45,相對丼飯,手卷會比較適合作野餐選擇。

香港單車館公園離商場只係5至10分鐘步程,本來叫將軍澳市鎮公園,亦一度被誤為單車公園,事實上公園係嚴禁踩單車,佢只係叫單車館公園,而唔係專俾人踩單車嘅單車公園。

公園內有大草地、人工湖,草地旁邊都有幾塊小草地,野餐點自由選擇,只係中央草坪通常都會比較多人紮營,人流會比較多,所以不妨選擇旁邊嘅小草地,避開人群聚集。

而每一件手卷都將紫菜同飯糰分開,所以帶走之後紫菜都唔會好快淋晒,直到自己包裹飯糰先將紫菜取出,情況同超市現成手卷相似。而每件Wasabi、豉油數量充足,足夠一件手卷所需。飯糰略有暖意,壽司醋比例都算適中,紫菜即包即食先會微脆。

延伸閱讀﹕厚切魚生鮮甜兼抵食!將軍澳商場轉角手卷丼飯外賣店毗連街市

三文魚腩手卷$20 內有2至3塊三文魚,魚腩新鮮軟嫩,每塊魚生唔算太大,但就厚切,入口有魚味,有魚油香。而油甘魚手卷$21亦有3塊油甘魚,Size亦未必算好大,但就屬於厚切,魚味需淡,但魚質軟腍,味道甘甜。

比較有驚喜嘅係蔥免治吞拿魚手卷$25,內餡為吞拿魚蓉,頂端加上蔥花、芝麻,淡淡黏滑魚蓉夾雜蔥香、芝麻香,配上飯糰更滋味。每一件手卷都有咁上下重量,刺身份量十足,當中雙拼手卷亦食到一半都有餸,例如係帆立貝甘蝦手卷$30,魚生份量適中,甘蝦清甜,帆立貝厚切之餘亦帶鮮味,無論帆立貝定甘蝦,都一樣鮮甜可口。

除咗刺身手卷,亦有熟食手卷,比如吉列蝦手卷$20、珍寶洋風赤蝦手卷$26,蝦肉都算大隻,啖啖有咬口,表皮香脆,醬料都唔會太膩,配合清淡飯糰特別香口。

另外,近年香港單車館公園栽種咗幾棵櫻花,大概有5至6棵唔同品種嘅櫻花樹,係春更賞花好去處之一,初春時份尤其燦爛。櫻花盛開時,於櫻花樹下野餐,觀感更好。




E.A.Tips﹕

❶ 小店位處尚德廣場背後,毗連尚德街市,靠近尚德邨。

❷ 手卷由$15至$45都有,而丼飯則由$65至$130亦有。

❸ 全部即叫即做,所以可能需要啲等候時間。

❹ 部份丼飯只限17:30後供應。

❺ 手卷現時全部為獨立包裝,食嘅時候先將紫菜拆出,自己包裹手卷。

❻ 公園內有洗手間。

❼ 園內只有一間牧羊少年咖啡店可擇。






日和屋

  • 將軍澳唐明街2號尚德廣場地下尚德街市5A號舖
  • 11:00 – 01:00
  • 6360 0964

香港單車館公園

  • 將軍澳寶康路105-107號
  • 2878 8621

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


旺角$48越南版海南雞飯 同價海量湯粉似足二人份量
【野餐隨行】慈雲山8月新店外賣自取平過堂食 肉醬意粉多料到滿瀉套餐$40有找 公園自製High Table歎高汁炸雞/Pizza
一餐麻甩與斯文兼備!元朗隱藏版料理店躲藏小巷賣日本魚生飯 與潮州滷味店僅相隔15秒步程
西貢林蔭秘道登小堤壩眺榕樹澳漁排 水浪窩闖企嶺下賞紅樹林尋港英時代郵箱
香港西端舂坎角泳灘賞絕美夕陽餘暉 海水清澈見底完勝赤柱沙灘 西環兒時回憶傳統餅店月餅預告【野餐隨行】
香港仔偽築地帆船野餐有遮蔭 鯨魚主題小店賣魚市場直送龍躉漢堡 揭人氣日本餐廳5大問題疑不尊重客人【野餐隨行】
【野餐隨行】長洲掃街掃盡6間小店!小島必揀經典魚湯/魚燒/大魚蛋 北端沙灘海旁自製迷你Party
【野餐隨行】元朗國公園大草地歎超靚韓式吐司 款款內餡含400次滑蛋
30分鐘內輕鬆登邊陲白虎山 探索英屬香港麥景陶碉堡 蓮麻坑一路之隔眺香園圍口岸
新手路線扯旗山VS高階路線奇力山!最高登山點360°環抱港島靚景 同遊山頂空中花園連百年古蹟歷史建築物
陳舊藍屋搵唔到入口?筲箕灣隱藏版炸雞Pizza即叫即製正過連鎖店 高水準脆意雞10間分店竟淨1間!
全港3間分店!油麻地樓上泰國菜用App買外賣享9折優惠 芒果糯米飯宛如當地水準
【野餐隨行】北角潮州飯店高水準鹵水鵝片 尋海旁小型狗公園野餐
蕃茄濃湯海量茄蓉! 長洲火車頭酸辣小窩餸菜自由配搭
【南丫島一日遊】碼頭皇冠郵筒起步!20分鐘步程經神風洞闖索罟灣蘆鬚城村神秘沙灘 長期擁一級水質假日全灘僅廿人?
石壁快閃遊!全港最大水塘三甲探索監獄前皇冠郵筒/古老石刻 貝澳超長淺灘遍佈水牛