【野餐隨行】隨手買午餐登灣仔半山！跑馬地箕璉坊藏配水庫大草地緩跑徑

灣仔為商業地區，店舖大多都係方便附近返工嘅打工仔，當中有一間平常係港式茶餐廳嘅食店，夜晚就以私房菜為主打，今次就帶大家拍拖兩個人隨手買份午餐，再步行上半山野餐，可以順道經過探索維多利亞城界碑嘅界石路線，小平台既有大草地，亦有緩跑徑，人流唔算多，以外國人為主，環境舒適。

由灣仔乘搭往山頂方向巴士直抵灣仔半山位置，前行就可以到達一個近跑馬地半山嘅配水庫休憩處，離東區濾水廠只係1分鐘步程，依循樓梯下行就會見到箕璉坊配水庫休憩處。配水庫休憩處內包括一面大草地，而草地外圍亦有一道緩號徑，長度大概255米，草地內有唔少人都擇地野餐，又或者帶小朋友放電、踢波，而人群多為外國人，本地人較少，確實係港島區內一個比較少本地人前往嘅配水庫遊樂場。

延伸閱讀﹕港島鮮為人知配水庫大草地 20分鐘直達120年黃泥涌水塘堤壩

箕璉坊配水庫休憩處雖然略有陽光，環境陰涼，有聶高信山為遮蔭，適合充當野餐地，不過景觀可能未必咁好，皆因大草地並非三面環山，而係三面環「樓」，只有一面勉強望到銅鑼灣至跑馬地一帶市景。

於半山大草地開餐，隨手選擇灣仔呢間茶餐廳與私房菜混合嘅小店，室內只係正常茶記模式，座位唔算太多。編輯本身預計到撈麵外賣同堂食有別，麵底容易變成一餅嘢，但無預計到沙嗲竟然係呢種味道。

一款係蔥油雞扒撈麵$53，相對質素正常少少，雞扒唔算太乾身，麵底都係偏軟，有啲似麵糊，而蔥油份量唔夠多，亦無嗰種蔥油香味。另一款係豬扒沙嗲汁撈麵$53，麵底軟身，而豬扒硬身，而且比較乾，至於沙嗲汁係躲藏於麵底之下，沙嗲汁亦較少，難以撈麵。更難以置信嘅係，沙嗲汁好古怪，質感似醬，比某種現成醬更難以入口，色調雖然係啡色，但毫無花生香，根本唔似係沙嗲汁，結果難食得一半都食唔到，話沙嗲味濃郁、話好食嘅人到底平時食開咩沙嗲？

每份都會附送蒜蓉包、熱飲，反而蒜蓉包係比較出色嘅地方，麵包稍厚，表皮略硬，而麵包內則軟綿綿。麵包表面塗上蒜蓉醬、牛油，相當香口。比較建議揀選私房菜或下午茶小食，又或者係五大訴求餐，甚至係黃藍是政見嘅懷舊多士、黑白是良知嘅黑白多士。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 由灣仔步行上姻緣石，約需20分鐘步程，再向前行至寶雲道與司徒拔道交界，行多10分鐘，過對面馬路就到配水庫入口。

❷ 更快嘅方法係乘搭巴士路線15號，往山頂方向，然後於香港港安醫院落車，向迴旋處方向走，對面馬路就係配水庫入口。

❸ 呢間小店比較適合食私房菜模式嘅菜式，茶記麵底比較一般，下午茶小食應該好啲。

❹ 每份唔要外賣盒可以免加$1。

EATWO

Miss A

【區區有小店2024】美孚6間尚存本土餐廳推介！限定栗子露／平民居酒屋／台式車輪餅｜美孚美食推薦2024

兩個人旅吓行

專題

E.A.Tips :

如意冰室私房菜

箕璉坊配水庫休憩處