煲劇抗疫!追劇網站相繼被封 8個合法追劇網+人氣劇推介

煲劇抗疫!追劇網站相繼被封 8個合法追劇網+人氣劇推介



據台媒報道,日前(8日)運作多年嘅台灣大型煲劇網「楓林網(8maple.ru)」因盜版問題突遭台灣刑事局查封,兩名涉案男子已經被捕,其後「小鴨影音」、「momovod」、「gimy.tv」、「pttplay」等盜版平台相繼緊急關閉,唔少追劇網民都大呼「世界末日」、「慘無人道」!

對於因武漢肺炎而經常留喺屋企嘅朋友,煲劇絕對係其中一個重要嘅消閒活動。「楓林網」雖然一向提供唔少日韓台美港劇,甚至動畫同電影,全部免費俾網民睇,不過始終係盜版。而我哋Fact Check咗兩個合法嘅台灣影視平台KKTV同friDay影音,可以登記,但睇唔到,撳入播放會顯示「未支援目前所在地區播放」,如果唔想睇大陸影視平台愛奇藝或myTV SUPER,小編Miss A同Mr E今次就推介8個值得睇嘅正版煲劇網站俾大家,等大家煲劇之餘亦可尊重版權,事實上免費又合法嘅較少,通常俾錢收睇先係合法嘅。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】


(1)Netflix

Netflix絕對係煲劇網首選,電影、電視劇應有盡有,日韓台美港劇、電影同動畫都有,月費最平只係63蚊!小編建議最好搵幾個朋友夾錢買Family Plan高級訂閱計劃,4個人夾錢買Plan最抵睇,可以4個Accounts分開Login,每人每月基本上只係23蚊!

好多劇集都可以一次過煲晒全季劇,而且勁多原創劇,唔少仲有優先上映權,保證睇到全新電視劇同電影。當中大熱韓劇《愛的迫降》無睇就Out啦,故事橫跨南北韓夠晒吸引!而另一韓劇《Kingdom》喺病毒環境下收睇會更有體會,最適合疫症期間留喺家中觀賞。不過,小編特別推介嘅煲劇精選係2月剛喺Netflix上映嘅日劇《Followers》,畫面充滿時尚感,而且對白句句到肉,對於新開網媒嘅我哋嚟講更加Touching!

日劇推介﹕ 《The Forest of Love》、《Followers》
韓劇精選﹕ 《愛的迫降》、《Kingdom》
動畫精選﹕ 《暗殺教室》、《我的英雄學院》

收費﹕基本$63/月、標準$78/月、高級$93/月、4人高級訂閱計劃每人$23/月

Netflix﹕https://www.netflix.com/hk/

Netflix絕對係煲劇網首選 |圖片來源︰NETFLIX網站截圖

(2)ViuTV

ViuTV係近年香港嘅本地免費電視台,99台大受香港人歡迎,以人同人性為核心,主打實況娛樂,以粵語為主,平台節目創意十足,以原創節目贏盡口碑。

小編特別推介近期嘅本地科幻愛情劇集《二月廿九》,由吳海昕、徐天佑、劉俊謙主演,而綠葉張松枝飾演辰叔嘅精湛演出絕對係劇中一道光茫。故事講述女主角有穿越能力,因意外穿越時空,預知自己喺未來嘅命運,更邂逅兩位未來人,拍攝手法令人留下印象,結局就可圈可點。

港劇精選﹕ 《二月廿九》、《教束》

收費﹕免費

ViuTV﹕https://viu.tv/

特別推介《二月廿九》 |圖片來源︰ ViuTV 網站截圖

(3)Now E

武漢肺炎令大家要留喺屋企抗疫,NowTV除咗Now新聞台同Now財經台報道免費外,亦限定開放免費頻道,前日(9日)宣佈即日起至6月8日開放超過9000小時嘅節目俾大家免費收睇,內容包括有新聞、劇集、電影、綜藝娛樂、財經、體育等, 只需使用Now E App,輸入代碼「NowFree」即可免費睇相關節目內容。

Now E每月78蚊,最多可容納5個裝置同時登入,今次免費開放嘅頻道同點播節目中,包括Now爆谷台,方便大家收睇日韓台港陸嘅電影,所以唔使再擔心留喺屋企無戲睇啦!

收費﹕Now E $78/月、Now E $780/年

電影精選﹕ 《鐵道家族》、《南荒的童話》

Now E﹕https://www.nowe.com/

Now E 限定開放免費頻道 |圖片來源︰ NOW E 網站截圖

(4)HBO GO

HBO頻道都可以喺NowTV睇到,最近亦可以免費收睇。HBO嘅新劇同美國基本上同步,但就未有中文字幕,可能需要等多一、兩日先有。而即日起至4月30日期間訂閱,每月78蚊之餘,仲有電影點播券乙張!

HBO GO基本上主打荷里活電影、HBO電影同原創劇集,仲有紀錄片,超逾400套任你揀。仲可以一次過睇晒HBO HD、HBO Signature、HBO Family、HBO Hits同CINEMAX幾條直播頻道。

神劇之選﹕ 《Game of Thrones》(《權力遊戲》)

收費﹕Now E $78/月、Now E $780/年

HBO GO﹕https://www.hbogoasia.hk/

HBO嘅新劇同美國基本上同步 |圖片來源︰ HBOGO 網站截圖

(5)Viu

黃色Viu係另一個香港流動煲劇平台,一般可以喺手機、平板電腦或PC上收睇,日韓台陸嘅節目都已經獲得最新授權,而且有晒繁體中文字幕,韓劇更加追貼當地首播日,4小時後就有得睇!

當中有韓劇《天氣好的話,我會去找你》,係一套好有文藝質感嘅韓劇,由國民女神朴敏英主演,故事講述女主角因母親係殺人犯而被排斥,形成孤獨性格,遇到男主角後,寂寞的心有咗靠依,兩人有唔少甜蜜鏡頭呢。

而日劇《偽證破解家》就夠晒同步,今年1月先上映,由濱邊美波主演,之前佢喺《狂賭之淵》已經令人眼前一亮,今次既有女主角賣萌樣,又有偵探故事,首集仲有激罕嘅出浴鏡頭添!

日劇推介﹕ 《偽證破解家》
韓劇精選﹕ 《天氣好的話,我會去找你》

收費﹕免費(有廣告、標清質量);$28/月可升級會員服務,支援Smart TV同投放功能

Viu﹕https://www.viu.com/ott/hk/

VIU.COM亦被叫稱為黃色Viu |圖片來源︰ VIU 網站截圖

(6)Amazon Prime Video

Amazon Prime Video主打歐美電影,包含逾15000套電視劇同電影,當中有唔少自家製電視劇同電影作品,包括《Marvel》系列電影同奧斯卡獲獎電影《Manchester by the Sea》等。

Amazon Prime Video暫時僅提供月費計劃,仲有7日免費試用,同Netflix有相似地方,可以3人夾錢用一個帳戶,每人每月只需約16蚊。

美劇精選﹕ 《The Good Fight》(桃色風暴)、《Jack Ryan》

收費﹕5.99美元/月(折合約HK$47)

Amazon Prime Video﹕https://www.primevideo.com/

Amazon Prime Video主打歐美電影 |圖片來源︰ Amazon Prime Video 網站截圖

(7)hulu

hulu係一個屬於Disney旗下嘅影視節目付費平台,有唔少原創劇集,已獲得授權播放節目,曾經只供應俾美國用戶,目前香港用戶都可以收睇。而Live TV月費Plan仲有逾60條channel可以睇,包含ABC、CNN同NBA直播。

當中,必睇節目包括金球獎得獎美劇《The Handmaid’s Tale》、樂隊披頭四紀錄片《The Beatles: Eight Days A Week – The Touring Years》等。

美劇精選﹕ 《The Handmaid’s Tale》
紀錄片精選﹕ 《The Beatles: Eight Days A Week – The Touring Years》

收費﹕基本5.99美元/月(折合約HK$47)、無廣告11.99美元/月(折合約$93)、Live TV 54.99美元/年(折合約$427)

hulu﹕https://www.hulu.com/welcome

hulu屬於Disney旗下嘅影視節目付費平台 |圖片來源︰ hulu網站截圖

(8)Apple TV Plus

最後仲有Apple TV Plus,係蘋果公司嘅OTT服務,可隨選視訊訂閱服務,上年先發佈同推出,提供唔少自家製電視劇。

只需購買Apple裝置,喺90日內換領優惠,即可免費睇足一年,如果鐘意睇歐美劇嘅朋友,適合揀Apple TV Plus。

美劇精選﹕ 《The Morning Show》、《重見光明》

收費﹕$38/月(可6人共同使用,提供7日免費試用)

Apple TV Plus﹕https://www.apple.com/hk/apple-tv-plus/

Apple TV Plus |圖片來源︰ apple tv+網站截圖

小編講吓嘢﹕

Netflix無庸置疑係最有質素嘅影視平台,而且update得好快,經常有新電影或劇集推出,而且最平可以23蚊一個月,絕對係收費平台嘅首選。不過,黃色Viu亦係值得睇嘅影視平台,本身Viu可以免費睇, 又有多啲日劇可供選擇, Viu嘅日劇只係比楓林網本身慢一集,如果唔介意標清同有廣告,真係最好嘅正版影視平台,至於Now E就比較適合鍾意睇電影嘅朋友,而香港人要支持香港免費電視台就一定要睇ViuTV啦。


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!