新蒲崗街坊燒臘舖移師太子始創中心友利冰室中西合璧賣勻意粉燒味漢堡包

新蒲崗有一間燒味店，以養生燉湯拼港式燒味受到街坊歡迎，惟近月突然結業，原來係同荔枝角快餐店合併，移師鬧市，新店位處太子始創中心，以為拍拖兩個人縱然對菜式選擇意見不一都無所謂，皆因同一間餐廳可以同時食西餐、快餐、中餐。

小店為友利冰室，荔枝角店叫勿當奴，取自港版金拱門嘅麥當勞諧音，玩味十足。顧名思議，勿當奴以快餐為主，餐點通通倒模麥記出品，係一間快餐替代品嘅好去處。現時，太子店嘅勿當奴餐人均為$42至$48，比如係巨無罅、將軍噢堡、豬柳強、脆弱雞腿包，同樣包含漢堡包、薯條、汽水，甚至單骨脆香雞翼。

太子店終於近一至兩個月進駐始創中心開店，友利冰室同時Crossover友利坊、勿當奴，貫徹荔枝角店嘅趣味同惡搞風格，以麥記於通公仔為主調，用色鮮艷，壁畫色彩繽紛，充滿幽默感，相當搶眼，裝潢滲出本土意味。

延伸閱讀﹕美式快餐款款噱頭十足！荔枝角玩味小店勿當奴倒模「港版金拱門」

新蒲崗店原為一間純燒味店，主要向區內街坊賣燒味同養生燉湯，而今次太子店就繼續有四季燉湯餐$79，內有燒味雙拼加一款燉湯，而且包一碟油菜、一碗白飯，同一款餐點嘅價錢係比新蒲崗店時貴幾蚊。而燉湯款式就較新蒲崗店明顯少，由9款減至3款，只係3款燉湯款式貌似比新蒲崗店矜貴同滋補。

除咗脆皮乳豬，有蜜汁叉燒、脆皮燒鵝、佛山燻蹄、玫瑰豉油雞、瑤柱貴妃雞、脆皮燒腩仔，脫離咗街坊店模式嘅純燒味店，水準似乎稍有退步，燒鵝皮雖然仍舊油光滿滿，皮脆可口，但皮下脂肪比之前多咗啲，肉質亦較乾柴，油雞則多為雞胸肉，肉質反而算軟嫩，醬汁濃淡適宜，但就唔足以撈飯。整體肉量同飯量都充足，但總係欠缺之前純燒味店出品嘅感覺。

3款燉湯有花膠螺頭燉雞、新鮮海底椰南北杏螺頭燉赤肉、椰子桃膠燉雞，皆對女士特別有效，可滋陰養顏、清熱潤肺。當中花膠螺頭燉雞包含花膠、螺頭、雞肉，燉湯鮮甜，有一大塊花膠片同一塊螺肉，飲完唔會覺得口渴，燒味偏鹹，配上清甜不濁嘅燉湯可以解鹹同減低肥膩感。

延伸閱讀﹕新蒲崗老區隱藏$46燒味飯 9款滋味健康燉湯任揀

其他中日式菜式有叉燒炒蛋飯、生薑豚肉丼、芝牛丼、吉牛丼等，至於西式菜式當中，既有白汁海鮮焗飯、草飼牛柳絲蛋包飯、粒粒鰻魚蛋包飯、鮮茄焗厚切豬扒飯、冬蔭功海鮮炒意粉、蕃茄羅勒牛肉溫泉蛋意粉等，當中必試係中西Crossover嘅馳名菜式乳豬卡邦尼意粉$68，創意十足。

意粉彈牙度不過不失，卡邦尼忌廉醬汁夠濃稠，有Creamy感，有唔少芝士粉，唔算太膩，麵條可以掛汁。而乳豬有3件，唔太大件，或者因為過咗出爐時間，乳豬皮軟淋，皮下脂肪亦多，但比燒鵝肉更少肉香同油香，不過就幾厚身，帶有鹹香，配上乳豬醬都仍可以接受。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 近月嘅太子店位處始創中心地庫，扶手電梯落去就會見到。

❸ 套餐加$8可轉配自家製樽仔茶或熱飲，包含菊花茶、富士蘋果伯爵茶、洛神花茶、樽仔奶茶、檸檬伯爵茶、羅漢果茶等。

❹ 二人餐可免費配汽水。

❺ 一端有醬料自助區，可以自取，點餐後亦可自取飲品。

❻ 燒味餐要留意係無乳豬，如果要乳豬，就只能配其他款式，例如意粉，或者貴啲。

EATWO

Miss A

【區區有小店2024】長沙灣16間尚存本土餐廳推介！隱藏泰國菜／人氣餃子／軟殼蟹吐司｜長沙灣美食推薦2024

兩個人旅吓行

專題

E.A.Tips :

友利坊 x 友利冰室 x 勿當奴