[sp_html5video category=”1675″]
阿銀冰室
隨著科技發展同時代變遷，舊式文具店日漸減少，細細個返學用嘅舊式文具買少見少，相信各位80后、90后對舊式文具都有一定記憶，以舊式文具專賣店聞名嘅「銀の文房具」，最近直接將舊式文具同飲食界連繫，打造極懷舊嘅傳統冰室，玩味十足，80后、90后拍拖情侶不妨去懷舊一番呀！
選址旺角上海街618號嘅阿銀冰室，以舊式文具設計，室內裝潢滿滿懷舊特色。據了解，店長為舊式文具店「銀の文房具」嘅本地收藏家，曾開放展覽區展出來自世界各地嘅收藏品，最近稱想將銀の文房具結合飮食文化，故將文房具同傳統冰室融合，一枱一櫈都充滿玩味，讓各位舊式文具控都可以隨便欣賞。
文具向來壽命有限，舊式文具歷史悠久，已經變成70后、80后、90后嘅共同回憶。今次阿銀冰室特設櫥窗俾大家近距離觀賞一系列舊式文具，玻璃長櫃内從左到右放滿唔同種類、形狀獨特嘅舊式文具，包括大大小小嘅神奇筆盒、A至Z間尺同擦膠等，全部文具手工精緻，令人目不暇給，似足一間舊式文具博物館。
最近武漢肺炎肆虐，餐廳亦做足抗疫措施，包括為客人量度體溫同設有消毒用品。走入冰室，室內裝潢甚有心思，滿滿懷舊風情，最啱鍾意打卡嘅你！餐牌更以小學黑板設計，每張枱玻璃下都有各款舊式文具裝飾，牆上竟然仲有曾灶財嘅經典墨寶！最初Miss A同Mr E兩個人以為又係扮冰室嘅茶餐廳，估唔到都有傳統冰室應該有嘅嘢。
餐廳剛剛開張，試試午餐同下午茶，Miss A覺得下午茶小食同炒粉麵類比較出色，Mr E則覺得辣椒醬更值得推介，因為食得出係傳統舊式辣椒醬。法蘭西多士係港式經典茶點，西多士炸成金黃色，內餡加入咗花生醬，入口層次更豐富，啖啖有牛油香之餘，亦有花生香味。
而最難得嘅係有滾水蛋，有「和尚跳海」之稱嘅滾水蛋，將生雞蛋加入熱滾水，然後自己按喜好加入適量砂糖，再趁熱攪拌，雞蛋形成蛋花，最後變成淡黃色的飲品。滾水蛋同法蘭西多士都係傳統冰室必備嘅產物，但隨時代變遷已消失得七七八八，估唔到今時今日仲有新餐廳會推出呢種傳統產物。
值得一提，門口設有小書枱，新開張期間每位客人可以任揀一款舊式文具作紀念，小編竟然搵到一粒Hello Kitty擦膠，當然亦有其他更好嘅書簿文具可供選擇。
阿銀冰室
地址﹕旺角上海街618號3樓301A及302號舖
延伸閱讀﹕旺角黑布街冷泡養生茶 健康無糖夏天極解渴
延伸閱讀﹕台風旺角店 平價日式拉麵有超水準
