兩個人醫吓肚,  和你Taste,  港式

招牌豬骨煲材料充足滿口骨膠原 大角嘴靚煲皇賣高水準火鍋餐

瀏覽次數: 12
個人瀏覽過





位於旺角至大角嘴之間嘅靚煲皇小菜坊,屬低調良心店,即使當時被罰停晚市,仍堅持對客人好,唔會大鑼大鼓呻慘,亦唔會好似大角嘴一間靠黃之鋒、周庭加持過就將自己放高位嘅家庭式咖啡店(目前已結業),曾經未有被罰停晚市就喝罵客人,暗諷客人勿連累其被罰,感覺只為賺錢,恍惚變成政權打手。反而,小店更值得支持,店舖靠近旺角街市,面積唔大,以日式屏風分隔座位,以打邊爐為主,火鍋配料眾多,價錢比平常火鍋店貴,的確係可圈可點,不過質量上仍算不俗,值得拍拖兩個人去試一試。

當中招牌靚煲皇有細有大,價錢$218至$288,包含蝦乾、吊片、扇貝、豬骨、軟骨等,本身已經受到街坊歡迎,豬骨煲湯底濃郁,呈奶白色狀態,材料豐富,入口唔肥膩,湯底有大大舊豬骨、豬手,滿滿骨膠原,亦留有豬骨原味。

湯底特別加入扇具、蝦乾、銀魚乾等,扇貝雖唔太大隻,但總算新鮮而唔黐牙,更有紅蘿蔔、白蘿蔔、粟米等配料,令湯底更鮮甜,唔會太鹹,可以放心飲用。而湯底會不斷添加,所以豬骨煲會保持濃郁味道,唔會愈食愈淡。

雪花肥牛$88 份量唔算多,但有牛肉味,雪花已算均勻,脂肪唔多,淥幾秒就食得,肉質軟腍而唔韌。而極上黑豚肉$88 比牛肉厚少少,肥肉比牛多少少,色澤新鮮,有豬肉味,入口算易溶化,唔太肥膩。

豬紅$48 堅挺唔會一夾就散,夠滑溜,而份量亦唔算少;手打蝦滑$108 有少許鮮蝦味,入口爽口彈牙,質感軟綿;手打四寶丸$98 有4款唔同口味,每款有2粒,其實都唔太食得出邊4種口味,大概有牛肉丸、豬肉丸、鯪魚肉太、墨魚丸,每款質感都尚算彈牙,只係比較的骰。

美國桶蠔$188 為大大隻生蠔,只有5隻,但總算每隻都肥美兼大隻,非常飽滿,而且蠔味濃厚,亦有蠔嘅鮮味,淥熟後亦無蠔腥味,反而有豬骨湯味道,蠔肉鮮甜。

響鈴$58 貌似即炸,上枱脆卜卜,滿滿油光,放湯兩秒已吸附湯汁,明顯有別於平常打邊爐食到嘅響鈴,滲出微微豆香。雙併餃$88 包含韭菜餃和鮮蝦雲吞,每樣有四粒,份量算適中,餃皮、雲吞皮都偏薄,餡料唔算太豐富,但算新鮮,可以合格,略嫌雲吞豬肉比蝦肉重味。

炸午餐肉條$68 為熟食,毋須放火鍋內,反而幾有驚喜,餐肉切成小粒,表皮煎得香脆,再配搭狀似中式芥辣嘅醬料,略帶微辣味,而烏冬麵$20 則可以作飽肚之用。蒿荀$48 份量適中,入口爽脆,另有一盤野菜菜籃$68,包括有油麥菜、皇帝菜、西洋菜、菜芯苗,各款菜都夠新鮮,而且望落翠綠,淥過後亦夠爽脆,亦可吸附豬骨湯,同時可減少火鍋膩感。




E.A.Tips﹕

❶ 位處天橋旁邊,由旺角前行至大角嘴方向,經過旺角街市之後,到天橋就可以轉左。

❷ 啤酒$25至$45,汽水$15至$18。

❸ 醬芥每位$12,醬料有辣椒碎、蔥花、蒜蓉、炸蒜、芫荽,每枱另設有加一服務費。

❹ 可以自攜海鮮加料,每斤$100,呢方面低銷$200。

❺ 豬骨湯可以無限添加。

❻ 有免費茶水供應。

❼ 最好預先打電話訂位。

❽ 室內為非吸煙區,而室外則為吸煙區。

❾ 記得等帶子熟透先好揭蓋開波同飲豬骨湯。


靚煲皇

  • 旺角塘尾道18號嘉禮大廈地舖
  • 18:00 – 04:00
  • 2399 0812

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象
【野餐隨行】隨手買午餐登灣仔半山!跑馬地箕璉坊藏配水庫大草地緩跑徑
舊店傳承!灣仔70年老字號小食店細舖搬大舖 年輕人接手重現臘味糯米飯/港式街頭小食
愉景灣小歐洲度假風情 大嶼山稔樹灣菲人村旁藏長沙欄無人沙灘