馬灣舊村+石仔灣碼頭小海灘碼頭+ 青馬橋底+燈塔+蘆葦芒草+大嶺頭
兩個人影吓相,  新界,  神秘之地

舊村小木橋窺漁村風光!15分鐘登大嶺頭瞰3橋全景 馬灣秘道闖青馬橋底眺西草灣兼尋蘆葦五節芒打卡

瀏覽次數:1098
個人瀏覽過





馬灣向來係唔少本地人週末小旅行嘅好選擇,小島寧靜如國外,舊漁村風景怡人,新公園亦係打卡勝地,但其實馬灣又豈止咁少地方?識玩一定唔止係咁玩!適逢馬灣舊村已經逐步清拆,昔日漁村風光似乎不復見,今次編輯就帶大家步上僅餘嘅小木橋窺視漁村風光,再穿越一道秘密通道探索青馬橋底,眺望汀九橋,遠眺對岸西草灣,找尋秋季限定嘅芒草、蘆葦打卡,一條路線登上馬灣小山丘,俯視青馬全景及近距離直視汲水門大橋,路段難度極低,適合拍拖兩個人輕鬆郊遊。

馬灣舊村以往係唔少人嘅打卡勝地,但如果你有留意時事新聞,大概知道馬灣舊村已經被清拆封村,編輯實地印證,芳園書室已經被圍封,而馬灣舊村小路亦已經被鐵閘圍封,門口貼滿標示及警告字句,公眾已經唔可以進入舊村範圍,資料顯示從2021年4月初起至2024年3月底會進行工程,期間會封閉舊村地段,意味200多年歷史嘅古老漁村風景不再。

延伸閱讀﹕馬灣舊村丟空多年零發展 廢棄村落探險頹廢風滿滿

不過,現時公眾仍然可以前往馬灣舊村旁邊嘅石仔灣碼頭,由田寮村起步,經芳園書室後,穿過通往馬灣舊村嘅小徑,即可步行到石仔灣碼頭,腳程約需10分鐘。依循廢屋走向海邊,可以步向小海灘,海灘極細小,相當幽靜,只有一道小木橋連接小碼頭,對出可見一連串漁排,屬魚類養殖區,對岸為屯門公路、青龍頭方向。

石仔灣碼頭為工程進行期間嘅一個給予公眾使用嘅臨時碼頭,用作停泊小型漁船,供漁民上落。位置為馬灣西面海岸,可觀日落及夜景,而人群較少,該小碼頭漁村味甚濃,而木橋碼頭內嘅小木橋更恍如西環泳棚木橋,毋須排隊亦可以於木橋上打卡,而木橋背後風景更純樸,有如迷你版東方威尼斯!

離開石仔灣碼頭,折返原路,穿過馬灣公園,然後前行至馬灣消防局,就係此路線另一處目的地,可以同時窺視青馬大橋橋底風光,亦可從馬灣山頂遙望青馬大橋全景,而左右兩端更可分別觀望汀九橋、汲水門大橋,一條路線三橋全景一覽無遺!

由馬灣消防局步行至馬灣足球場,沿小路左邊走,頭頂為青嶼幹線,一直依循青嶼幹線走到盡頭,就會發現一個小通道入口。依小樓梯下行,只需一直沿路走向盡頭方向,青馬橋底就近在眼前。最盡頭位置為一個平地,可見白色燈塔,左邊為挪亞方舟主題公園、酒店,珀麗灣渡輪碼頭,右邊則為青馬大橋,可同時眺望汀九橋。

事實上,青馬大橋係全球最長行車鐵路雙用懸索吊橋,車輛可來往馬灣、青衣,甚至大嶼山、赤鱲角香港國際機場。從青馬大橋橋底窺探,對岸正正為西草灣,可觀黃昏夕陽靚景,而馬灣方向嘅青馬橋底未能完全觀望夕陽景色,但該位置則有另一番景象,遠眺青衣、汀九景緻,而以仰視角度觀望大橋,有時候會比俯視角度更壯觀。

延伸閱讀﹕青馬橋底睇日落!青衣西草灣賞景打卡秘地 細山步行徑近三支香談心好地方

折返沿路,從秘道中段可見另一段小樹林秘道,路段綠樹成蔭,穿過小樹林隧道後,即可到達另一邊海旁位置,可見唔少釣魚客,位置望馬灣海峽之餘,亦可眺望中環至薄扶林一帶。

而釣魚客背後則為青馬大橋,草叢堆中既可見蘆葦,亦有低地可見嘅五節芒,位置同時係芒草勝地。芒草雖然一般生長於山上,但五節芒就可以喺低地發掘,長而密集,花穗較短而豎起;而蘆葦花穗則蓬鬆如絮,感覺毛絨絨,色澤為褐色至灰白色,現時有少量芒毛層層堆疊,隨風擺動時仍難以遮掩浪漫感覺。

打完卡過後,折返剛才秘密通道,然後轉往另一道小山路,可以直接通往登山徑,該山徑為馬灣大嶺頭,另外重有兩個小路口可以進入大嶺頭,非常方便。大嶺頭僅座一座高約69米嘅小山峰,位處馬灣南端,全程輕鬆易行,需時極短,15分鐘內可以登上山頂。

登山徑已經舖設樓梯、仿木紋扶手,而且設有休憩涼亭,循樓梯拾級而上,於大嶺頭山頂可俯視青馬大橋全景,環瞰青馬海峽,船隻不時穿梭其中,碧海藍天海岸線令人心曠神怡。穿過一座涼亭可以到達山頂標高柱,繼續前行會見到唔少村民祖墳,另一個紅色涼亭前可近距離觀望汲水門大橋景緻,重有被列為古蹟嘅燈籠洲燈塔,甚至眺望對岸大嶼山五鼓嶺。

再穿過青嶼幹線橋底,一直依小斜坡向下行,會發現路段可通往旅遊巴停車場,旁邊則為馬灣足球場,即係剛才嘅入口處,可見大嶺頭係三面皆可進入,四通八達,只係環繞而行,可算係一個馬灣後花園。




E.A.Tips :

❶ 巴士路線 NR330, NR331, NR331S, NR332, NR334 可以到達馬灣,分別可於荃灣或葵芳等上車,NR331可來往荃灣市中心,NR331S則可來往荃灣如心廣場,而NR332就係來往葵芳新都會廣場,而NR330則來往青衣城,至於NR334就係來往機場。而中環2號碼頭乘搭渡輪航線,亦可到達馬灣珀麗灣碼頭。

❷ 馬灣舊村已經被鐵絲網圍繞,無法入內,而且門口有CCTV監控。

❸ 可以到石仔灣碼頭小海灘感受漁村,小碼頭為者時開放予居民使用嘅碼頭。

❹ 由馬灣消防局出發,沿青嶼幹線底步行,經過馬灣足球場,前行到盡頭,可以找尋一條小秘密通道,前往白色燈塔及青馬大橋橋底位置。

❺ 大嶺頭有3個入口可以進入,基本上可以環繞而走,折返馬灣消防局。第一個路口係由燈塔秘道前往山路匯合點,第二個路口係由中華電力有限公司馬灣變電站路口左邊小路進入,第三個路口係穿過青嶼幹線後轉右再直行到盡頭。第三個路口係第一、二個路口嘅相反方向步行,而第一、二個路口係同一個方向步行。

❻ 由馬灣公園步行約5分鐘,即可到達大嶺頭山路入口。

❼ 建議先遊舊村旁小碼頭,再穿過馬灣公園,經秘道前往青馬橋底,然後到訪芒草、蘆葦影相地,最後於黃昏時份登上大嶺頭,俯視青馬大橋全景及夕陽靚景。

❽ 大嶺頭有唔少村民祖填,經過時謹記保持安靜,免得騷擾先人。

❾ 最好先於馬灣大街上補給。

❿ 記得自己垃圾自己帶走。

馬灣舊村石仔灣碼頭至馬灣消防局﹕

石仔灣碼頭

  • 馬灣

馬灣消防局至馬灣燈塔﹕

馬灣燈塔至芒草地﹕

馬灣消防局至大嶺頭﹕

大嶺頭

  • 荃灣Unnamed Road

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高