秋季芒草:大石磨東北面荒屋
兩個人影吓相,  新界,  神秘之地

挑戰大石磨45度角斜路尋廢屋秋芒 邊境窺禁地瞰270度兩岸風光 山頂藏4K大電視風景!【芒草路線2021】

瀏覽次數:1783
個人瀏覽過





如果提到嘅行山路線位處邊境,你敢唔敢拍拖兩個人去?今次遊走嘅邊境小山丘為香港最北端位置,於羅湖、落馬洲之間,僅高約186米,但必須步行一道45度角斜坡嘅無盡上行路段,頂端座落一間已經荒廢嘅小屋,適合廢墟攝影,而天台頂端更有小路直通直昇機停機坪,既可找尋天空之城,亦可於芒草群打卡,更可環瞰270度香港及深圳兩岸景色。

今次小山位置為大石磨,基本上北端為邊境禁區,公眾可由南端河上鄉、羅湖懲教所為起點,經過河上鄉路,轉入快景路,再於一個小路口進入,路口極隱蔽,一個唔留神就會走過龍,通常該山路入口會有兩隻狗看守。由落車到山路入口,整段路都必須小心講嘢、小心動作,小心個人安全,好人一生平安。

北區 大石磨 邊境秋芒 270度風景 【點樣去? 點擊觀看】

依循小路登山,不難發現路段愈走愈陡峭,只有源源不絕嘅斜路,最斜一段斜坡更有至少45度角斜度,相當崎嶇,整段路需要步行約20至30分鐘,右邊可俯視菴邊、石馬,亦可眺望羅湖、沙嶺方向,甚至回望上水風景,直視則可見一個橙紅與白色相間嘅發射站。步上荒屋之前有一平地,位置為避車處,可以先作休息點,位置已經可以觀賞香港境內北區風景,盡頭小樓梯則為通往荒屋秘道。

該荒廢小屋於Google地圖全名為「大石磨東北面荒屋」,據悉荒屋曾經係昔日英軍留守嘅宿舍,由於靠近邊境,故主要用途係充當瞭望台,該哨崗用作監視對岸兼捉偷渡客,為軍事兵房用途。荒廢小屋下面有兩層樓,第三層則為天台,屋內所有電掣已經斷開,室內亦遍佈廢料,現時空無一人,已經荒廢,充滿陰森感覺,但確為廢墟攝影好地方。

荒屋依山而建,由荒屋步行上天台,可以觀賞比荒屋之下更遼闊嘅景觀,可放眼上水至羅湖方向景色,山下鄉村平原風景一覽無遺。而繼續上行,則可以拾級而上到達最頂端嘅直昇機停機坪位置。然後你會發現,步行上山時所見到嘅橙紅、白色相間嘅發射站就位處直昇機停機坪旁邊,其實係山頂一個訊號站。

大石磨小山適合秋高氣爽嘅時候前往,頂膏有海量芒草風景,想找尋秋芒嘅話,不妨前往打吓卡啦!而講到打卡,直昇機停機坪背後更有一座尤如「天空之城」嘅小屋,內裏悄悄躲藏一個4K大電視畫面,畫面背後為香港北區清幽景觀。事實上,該小屋係山頂上一個已經荒廢嘅哨站,牆身亦已經被人塗鴉。

事實上,大石磨其實有兩邊山頂,一端為山路,而另一端就係目前呢個大石磨副峰,即大石磨南脊位置,有指叫Crest Hill,兩個山頂高度相若,海拔僅高約186米,都與邊境禁區極為接近,整座山風景上充滿鄉郊味道,令人心曠神怡。

於直昇機停機坪居高臨下,可以從高空俯視山下景色,一端俯瞰上水市中心、大水管、河上鄉、梧桐河、雙魚河、塱原濕地等;另一端俯首則為料壆、馬草壟、古洞一帶,山下遍佈魚塘,前臨深圳河嘅蠔殼圍亦映入眼簾。此外,山頂位置亦可遠眺落馬洲、深圳河套一帶、深圳羅湖對岸大部份地方,對岸高樓大廈同邊境嘅鄉郊地帶構成強烈對比。

大石磨山頂不單可180度觀景,窺視禁地,而且可以270度瞰一河之隔嘅兩岸風光。小山頂同時係觀賞黃昏日落嘅好地方,雖然稍被直昇機停機坪西端嘅發電站阻擋,但夕陽靚景仍然盡收眼底,位置絕對係北區邊境一個後山,甚至係上水河上鄉後花園。




E.A.Tips :

❶ 如果於上水站公共小巴總站乘搭小巴路線進入,可以乘搭小巴路線51K,於總站羅湖懲教所落車,51號亦可直接到達河上鄉祠堂。

❷ 若步行前往,則可以由大水管穿過雙魚河、河上鄉村,前往羅湖懲教所為起點。

❸ 山路入口離羅湖懲教所僅約10分鐘,由河上鄉路轉入快景路,中途可見單車客常逗留嘅羅太豆花,不過多為馬路,需要小心安全,盡量靠邊走。

❹ 全段斜路非常陡峭,斜坡幅度甚大,最好使用行山仗,路段亦間中有碎石,需要特別小心安全,走約20至30分鐘可以到達頂端,位置為荒屋之下。

❺ 穿過3層荒屋,就可以步行到更頂端嘅直昇機停機坪。

❻ 最頂端位置就可以見到山上佈滿芒草。

❼ 山路入口有狗隻看守,要小心步行,千其唔好挑釁,基本上唔會有太大危險。

❽ 有啲人會為咗慳腳骨力已揸車上山,但該路段極陡峭,會好傷車,而且只為單程路段,如果有對頭車就會好麻煩。

❾ 謹記自己垃圾自己帶走。

❿ 頂端並無遮擋,荒屋位置會有蚊蟲,所以最好預先做好防曬、防蚊措施。

❿ 雖然路段正常唔會經過羅湖練靶場,但都最好先於政府新聞公告網站留意練靶日子同位置,免得隨時誤走錯靶場範圍,大石磨西南方會有紅旗標示練靶地。

❿ 荒屋有一個蜜蜂竇,謹記小心安全,唔好觸碰牌巢。

❿ 記得唔好為打卡而採摘芒草,當日編輯見到直昇機停機坪地上有兩條已掉落嘅芒草,已放於原地,大概係其他人循環再用之芒草,讀者可以於地上拾起影吓相。

❿ 殖民地時代英國石砌軍徽並非於此路線,而係於大石磨另一邊山路,但該段路較複雜,此路段就比較簡單。

大石磨東北面荒屋

  • 上水古洞河上鄉大石磨
  • 24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


樓上咖啡店自選高水準五品料理!旺角西洋菜南街神秘角落點只賣咖啡綠茶
【野餐隨行】大埔商場便攜素食便當/一口雲吞蝦籽麵 元洲仔全海景公園Chill住歎咖啡
上水Homy Cafe 9月尾結業 咖哩雞扒香口惹味 上水千萬公廁旁小公園野餐
【野餐隨行】上水罨耷微舖小食醬汁乃精華所在 市中心野餐地有枱有櫈兼參觀豪華公廁?
太安樓起家!筲箕灣東大街人氣雪糕班戟 暖笠笠法式甜品配涼浸浸雪糕球 歎埋消暑雪頂茶飲啖啖舔舔脷
近大潭水塘!陽明山莊僅存殖民時代皇冠電話亭 紅噹噹包廂懷舊味濃
【野餐隨行】油麻地一級歷史建築鬧市空中花園野餐 神秘台式廚師發辦$100有找!
【野餐隨行】石硤尾池畔叢林小餐廳歎日式超靚便當 街角文具店兼賣醉雞麻醬蕎麥麵
大角嘴迷你威尼斯西餐廳Risotto出色 中西合璧加臘味賣Fusion?
【野餐隨行】小西灣角落港式下午茶 鬆軟夾餅拼金黃雞蛋仔粒粒飽滿
大角嘴海南雞專門店外賣孖寶套餐人均$79 除咗雞飯重有乜?
【邊境一日遊】尖鼻咀濕地5分鐘登龜山眺后海灣 沙橋村蠔殼田絕美夕陽餘暉
大隱隱於市!尖沙嘴鬧市藏維多利亞時代百年歷史建築物 遊走法定古蹟探視紅磚遊廊金字瓦頂
【野餐隨行】長洲歎人氣沙嗲牛米通 堤邊樹蔭全海景野餐 甜品有炸芒果糯米糍!
採環保餐盒+餐具!土瓜灣舊區鐵路便當地道台式口味 3款配菜期期轉換主食足料
【野餐隨行】元朗11款人氣名物瀑布蛋治有咩特別?大棠燒烤場變草地野餐場